ރޯދަ މަހާ ދިމާކޮށް ސައުދީ އަރަބިއްޔާއިން މި އަހަރު ރާއްޖެއަށް ހަދިޔާ ކުރި 50 ޓަނުގެ ކަދުރު މި ހަފްތާ ތެރޭގައި ބަހަން ފަށައިފި އެވެ.
އާންމު ގޮތެއްގައި ސައުދީން ހަދިޔާކުރާ ކަދުރު ރޯދަ މަސް ފެށުމުގެ ކުރިއަށް ލިބެ އެވެ. އެހެންނަމަވެސް މި އަހަރު ރޯދަ މަސް ނިމުނު އިރު ވެސް ކަދުރެއް ނުލިބެ އެވެ. އިސްލާމިކް މިނިސްޓްރީން ކުރިން ބުނީ ކަދުރު ލިބުން ލަސްވީ ސައުދީން ކަދުރު ފޮނުވުމުގައި ލަސްތަކެއް އުޅުމުންނެވެ.
"ރާއްޖެއަކީ ސައްތައިން ސައްތަ މުސްލިމް ގައުމަކަށް ވީހިނދު، 1443 ވަނަ އަހަރު ދިވެހިރާއްޖޭގެ ރައްޔިތުންނަށް ބެހުމަށް ސައޫދީ އަރަބިއްޔާގެ ސަރުކާރުން ދެއްވާފައިވާ 50 ޓަނު (25,000 ޕަކެޓު) ކަދުރު މި މިނިސްޓްރީއަށް ވަނީ ލިބިފަ. މާލެ ސިޓީއާއި، އައްޑޫ ސިޓީއާއި، ފުވައްމުލަކު ސިޓީއާއި، ކުޅުދުއްފުށި ސިޓީ އަދި އަތޮޅުތަކުގެ ރަށްރަށަށް ކަދުރު ބަހާނީ، މީހުން ދިރިއުޅޭ ގޭބިސީތަކުގެ ތެރެއިން ކަދުރު ބަލައި ހާޒިރުވާ ތަރުތީބުން،" ކަދުރު ބެހުމާ ގުޅޭ ގޮތުން މިނިސްޓްރީން ކުރި އިއުލާނުގައި ބުނެފައިވެ އެވެ.
ފަގީރުންގެ ގޭބިސީތަކަށް އެއް ޕެކެޓުގެ އުސޫލުން ބެހުމަށް ފަހު ކޮންމެ 100 ގޭބިސީއަކަށް ޖެހެނީ 26 ޕަކެޓް ކަދުރު ކަމަށާއި އެ ބަހާނީ ވެސް ބަލައި އަންނަ ތަރުތީބުން ކޮންމެ ގޭބިސީއަކަށް ޕެކެޓެއް މިނިސްޓްރީން ވަނީ ބުނެފަ އެވެ.
މި މަހުގެ 16 އިން މި މަހުގެ ނިޔަލަށް ކަދުރު ބެހުމަށް ހަމަޖެހިފައިވާއިރު، މާލޭގައި ކަދުރު ބަހާނީ އިސްލާމިކް މަރުކަޒުގަ އެވެ. އަދި ރަށްރަށުގައި ބަހާނީ އެ ރަށެއްގެ ރަށު ނުވަތަ ސިޓީ ކައުންސިލުގަ އެވެ.
