ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީ އަދި އޭނާގެ އާއިލާގެ ބައެއް މެންބަރުންގެ ހިއްސާ އޮންނަ ކުންފުންޏެއް ކަމަށްވާ، ކިންގްސް ކެޕިޓަލް ހޯލްޑިންގްސް އިން މަނީ ލޯންޑަރިން ކުރާ ކަމުގެ ތުހުމަތުކޮށް، އަލްހާން ފުލުހަށް ހާޒިރުވާން މިއަދު ޗިޓު ފޮނުވައިފި އެވެ.
ފުލުހަށް ހާޒިރުވުމަށް އަންގައި އަލްހާނަށް ފޮނުވާފައިވާ ޗިޓުގައި ބުނެފައިވާ ގޮތުން ރާއްޖޭގެ މާލީ ސެކިއުރިޓީގެ ގާނޫނާއި ގަވައިދުތަކާ ހިލާފަށް އިންވެސްޓްމަންޓް ސްކީމެއް ތައާރަފްކޮށް މަކަރާއި ހީލަތުން ގިނަ އަދަދެއްގެ ފައިސާ ހޯދައި އެ ފައިސާ ލޯންޑާކޮށްފައިވާ ކަމުގެ ތުހުމަތު އެ ކުންފުނީގެ މައްޗަށް ކުރެވޭ ކަމަށެވެ.
މި މައްސަލައިގައި ސުވާލު ކުރުމަށް އަލްހާން ފުލުހަށް ހާޒިރުވާން އަންގާފައިވަނީ އަންނަ އަންގާރަ ދުވަހުގެ ރެއަށެވެ.
ފުލުހުން ފޮނުވި ޗިޓު ޓްވިޓާގައި ހިއްސާކޮށް، އަލްހާން ބުނީ ފުލުހުން ކުރަމުން އަންނަ ތަހުގީގަކީ އެއްވެސް އަސާސެއް ނެތި، ސިޔާސީ ބަޔަކު އަޑީގައި ތިބެގެން "ވިޔަފާރި ހުއްޓުވަން" ކުރަމުން އަންނަ ކަމެއް ކަމަށެވެ.
އޭނާ އާއި އޭނާ ހިއްސާވާ ކުންފުނިން ގާނޫނު އަސާސީއާ ހިލާފު އެއްވެސް ކަމެއް ކޮށްފައިނުވާނޭ ކަމަށް ބުނާ ވާހަކަ އަލްހާން ވަނީ ތަކުރާރުކޮށްފަ އެވެ.
މިދިޔަ މާޗް މަހުގެ 10 ވަނަ ދުވަހު، އެމްއެމްއޭ އިން ނުސީދާކޮށް ކިންގްސް ފޮރެކްސްއާ ދެކޮޅަށް ބަޔާން ނެރެ، ބީއެމްއެލްގައި ހުޅުވާފައިވާ ކިންގްސް ކެޕިޓަލް ހޯލްޑިންސްގެ އެކައުންޓްތައް ފްރީޒް ކުރީ، ކުޑަ މުއްދަތެއްގައި ބޮޑު ފައިދާއެއް ހޯދައިދޭނެ ކަމަށް ބުނެ މީހުންގެ އަތުން ފައިސާ ނަގައިގެން ބޮޑު ފްރޯޑެއް ހިންގަމުން އަންނަ ކަމަށް ތުހުމަތު ކޮށްފަ އެވެ.
