ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެމްބަރަކު ހޮވުމަށް އިއްޔެ ބޭއްވި ބައި- އިލެކްޝަންގެ ވޯޓު އަލުން ވޯޓު ގުނައި ދިނުމަށް އެދި މޯލްޑިވްސް ނެޝަނަލް ޕާޓީ (އެމްއެންޕީ)އިން ހުށަހެޅި ޝަކުވާ ބަލަމުން އަންނަ ކަމަށް އިލެކްޝަންސް ކޮމިޝަން (އީސީ)އިން މިއަދު ބުނެފި އެވެ.
އިއްޔެ ކުރިއަށް ދިޔަ މި ބައި އިލެކްޝަން އެމްއެންޕީގެ ކެންޑިޑޭޓް އާމިނަތު ޝީޒާ ބަލިކޮށް ޕީޕީއެމްގެ ކެންޑިޑޭޓް ފާތިމަތު ނާޒިމާ ކާމިޔާބު ކުރީ އެންމެ ވޯޓެއްގެ ތަފާތުންނެވެ. ޝީޒާއަށް 358 ވޯޓު ލިބުނު އިރު ނާޒިމާއަށް ލިބުނީ 359 ވޯޓެވެ.
"އިއްޔެގެ އިންތިހާބާ ގުޅިގެން އެމްއެންޕީގެ ޝަކުވާއެއް ލިބިފައި އޮތީ، އެ މައްސަލަ އަންނަނީ ޝަކުވާ ކޮމިޓީން ދިރާސާ ކުރަމުން،" އީސީގެ ނައިބު ރައީސް އިސްމާއިލް ހަބީބް ވިދާޅުވި އެވެ.
ހަބީބް ވިދާޅުވީ ވޯޓު ގުނުމާމެދު ގޮތެއް ނިންމާނީ ޝަކުވާ ކޮމިޓީން ނިންމާ ގޮތެއްގެ މައްޗަށް ކަމަށެވެ.
އެމްއެންޕީން ވޯޓު އަލުން ގުނަން އެދުނީ އެންމެ ވޯޓެއްގެ ފަރަގުން އިންތިހާބުގެ ނަތީޖާ ކަނޑައެޅުނުއިރު ވޯޓުގައި ގިނަ މައްސަލަތަކެއް ފާހަގަވެފައިވާތީ ކަމަށް އެ ޕާޓީން ވަނީ ބުނެފަ އެވެ.
އެ ޕާޓީގެ ނައިބު ރައީސް ވިލިމާލެ ދާއިރާގެ މެންބަރު އަހްމަދު އުޝާމް ވިދާޅުވީ ގިނަ އަދަދެއްގެ ބާތިލް ވޯޓު ގުނީ އެންމެ ރަނގަޅަށް ނޫން ކަމަށް އެ ޕާޓީގެ އޮބްޒާވަރުން ބުނެފައިވާ ކަމަށެވެ.
މި އިންތިހާބު ބޭއްވީ ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއްވެ، މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގައި ވިލިމާލެ ދާއިރާ ތަމްސީލު ކުރައްވަމުން ގެންދެވި މެމްބަރު، އައިމިނަތު އީމާން ނިޔާވުމާ ގުޅިގެންނެވެ.
މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގައި ޖުމްލަ 17 މެމްބަރުން ތިބޭއިރު، އޭގެ މެޖޯރިޓީ އޮތީ އެމްޑީޕީއަށެވެ. އެއީ އެމްޑީޕީގެ 12 މެންބަރުންނެވެ. ދެން ތިބެނީ ޕީޕީއެމްގެ މެމްބަރަކާއި އަދާލަތު ޕާޓީ އާއި އެމްއާރުއެމްގެ މެމްބަރެއްގެ އިތުރުން މިނިވަން ދެ މެމްބަރެކެވެ.
