ނ. ވެލިދޫގައި އިދިކޮޅު ޕީޕީއެމުން ހިންގާ އޮފީހަށް ކޯޓު އަމުރަކާއެކު ފުލުހުން ވަދެ، "އިންޑިއާ އައުޓް" ޖަހާފައި ހުރި ބައެއް ތަކެތި ރޭގެ ވަގުތެއްގައި ގެންގޮސްފި އެވެ.
ފުލުހުންގެ ބެލުމުގެ ދަށަށް ގެންދިޔައީ އިންޑިއާ އައުޓް ލިޔެފައި ހުރި ދިދަތަކަކާއި ޓީޝާޓުތަކަކާއި ކެންވަސްތަކެއް ކަމަށް މި ނޫހާ ވާހަކަ ދައްކަވަމުން އެރަށު ކައުންސިލުގެ ޕީޕީއެމް މެންބަރު އަބްދުﷲ ފާއިގު ވިދާޅުވި އެވެ. އަދި އެ ތަކެތި ގެންދިޔައީ އިންޑިއާ އައުޓް ކެމްޕެއިން މަނާ ކުރައްވާ ރައީސް އިބްރާހިމް މުހައްމަދު ސޯލިހު ނެރުއްވި ގަރާރަށް ހަވާލީ ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން ގަބޫލެއް ނުކުރަން އެއީ ސައްހަ ގަރާރެއް ކަމަކަށް، ޕާޓީން މި ކެމްޕެއިނު ކުރިއަށް ގެންދާހާ ހިނދެއްގައި އަޅުގަނޑުމެން ހުއްޓައެއް ނުލާނަން،" ފާއިގު ވިދާޅުވިއެވެ.
ޕީޕީއެމް އޮފީހުގައި ހުރި ބައެއް ތަކެތި ގެންދިޔުމުގެ އިތުރުން، ނަފްރަތު އުފެދޭ ގޮތަށް ހުރި ސާމާނު ނެގުމަށް 12 ގަޑިއިރުގެ މުހުލަތެއް ދިން ކަމަށް ވެސް އޭނާ ވިދާޅުވި އެވެ.
ވެލިދޫ ޕީޕީއެމް އޮފީސް ފުލުހުން ފާސްކުރުމުގެ ތެރެއިން--
ރާއްޖެއިން އިންޑިއާއާމެދު ގެންގުޅޭ ސިޔާސަތާ ދެކޮޅަށް ޗައިނާއަށް ތާއީދު ކުރައްވާ ކުރީގެ ރައީސް އަބްދުﷲ ޔާމީން ލީޑު ކުރައްވާ އިންޑިއާ އައުޓް ކެމްޕެއިން ހުއްޓުވުމަށް ރައީސް ގަރާރެއް ނެެރުއްވީ އޭޕްރީ 21، ގަ އެވެ.
އިންޑިއާ އައުޓް ހަރަކާތަކީ ރާއްޖޭގެ ގާނޫނުލްްއުގޫބާތުން ޖިނާއީ ކުށެއްގެ ގޮތުގައި ކަނޑައަޅައި މަނާކޮށްފައިވާ އަމަލުތަކުގެ ތެރެއިން ވަކި ނަސްލަކަށް ނުވަތަ ނަސަބަކަށް ވީތީ ދަތިކޮށް ފުރައްސާރަކޮށް ތަފާތުކުރުންފަދަ އަމަލެއް ކަމުގައި ރައީސްގެ ގަރާރުގައި ބުނެފައިވެ އެވެ.
ނަމަވެސް ޕީޕީއެމުން ބުނެފައި ވަނީ އެ ގަރާރަކީ ގައިރު ގާނޫނީ ގަރާރެއް ކަމަށެވެ. އަދި އެ ގަރާރު ބާތިލް ކުރުމަށް ވަނީ ކޯޓަށް މައްސަލައެއް ވެސް ވައްދައިފަ އެވެ. އިދިކޮޅު ފަރާތްތަކުން ގަބޫލު ކުރަނީ، އެ ގަރާރުގެ ސަބަބުން ގާނޫނު އަސާސީން ކަށަވަރުކޮށްދީފައިވާ ހިޔާލު ފާޅު ކުރުމާއި އެއްވެ އުޅުމުގެ މިނިވަން ކަމާއި ސިޔާސީ ހަރަކާތް ހިންގުމުގެ ހައްގު ހަނި ކުރެވިގެންދާތީ ކަމަށް ބުނެ އެވެ.
އިންޑިއާގެ އަސްކަރީ އެހީ ހޯދަން ސަރުކާރުން ގެންގުޅޭ ސިޔާސަތުތައް އޮތް ގޮތުން ރާއްޖޭގެ މިނިވަންކަމަށް އަސަރު ކުރާނެ ކަމަށް ބުނެ އިދިކޮޅު ފަރާތްތަކުން ދެ ގައުމުގެ ސަރުކާރަށް ވެސް ބޮޑެތި އެތައް ތުހުމަތެއް ކުރެ އެވެ. މި ތުހުމަތުތައް ދެ ގައުމުގެ ސަރުކާރުން ވެސް ދަނީ ދޮގު ކުރަމުންނެވެ.
