ރާއްޖޭން ހާރިޖީ ގުޅުން ގާއިމްކޮށްފައިވާ ގައުމުތަކާ މެދު ނަފުރަތު އުފެދޭ ގޮތަށް ދައްކާ ވާހަކަތައް ހުއްޓުވަން ރައީސް އިބްރާހީމް މުހައްމަދު ސޯލިހް ނެރުއްވާފައިވާ ރިޔާސީ ގަރާރު އިންސާފުން ތަންފީޒު ކުރާނަމަ ޗައިނާއާ ދެކޮޅަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދައްކަވާ ވާހަކަތައް ވެސް ހުއްޓުވަންޖެހޭނެ ކަމަށް އިދިކޮޅު ޕީޕީއެމް/ޕީއެންސީން މިއަދު ބުނެފި އެވެ.
އިދިކޮޅު ކޯލިޝަނުން މިއަދު މެންދުރުފަހު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުލްރަހީމް އަބްދުﷲ ވިދާޅުވީ ކޮންމެ ގައުމަކުން ވެސް ހަމަހަމަ އުސޫލުތަކެއް ގެންގުޅޭ ކަމަށް ބުނާ މި ސަރުކާރުގެ އަމަލުތައް ހުރީ އެއާ އިދިކޮޅަށް ކަމަށެވެ. އެންމެ ފަހުން ރައީސް ނެރުއްވި ރިޔާސީ ގަރާރު ވެސް ތަންފީޒު ކުރަނީ އެއްވެސް ހަމަހަމަ ކަމެއް ނެތި ކަމަށް އަބްދުއްރަހީމް ވިދާޅުވި އެވެ.
"އަޅުގަނޑުމެންނަށް މި ފެންނަނީ ރައީސް ނަޝީދު ހަމަ ދެއިރު ދެދަޅަ އަށް ޗައިނާއަށް ހަމަ ހިތު ހުރިހާ އެއްޗެއް ގޮވަމުންދާ ތަން، ކީއްވެގެން ހެއްޔޭ އެ ގައުމުގެ އިއްޒަތާއި އަނބުރާ ކަރާމަތަށް އުނިކަން އަންނާނެ ކަމަށް ރައީސަށް [ރައީސް ސޯލިހަށް] ގަބޫލު ނުކުރެއްވެނީ،" އަބްދުއްރަހީމް ވިދާޅުވި އެވެ.
ނަޝީދުގެ ވާހަކަތައް ނުހުއްޓުވައި، ޕީޕީއެމް ޕީއެންސީން ކުރިއަށް ގެންދާ "އިންޑިއާ އައުޓް" ކެމްޕޭނަކީ އިންޑިއާގެ ކަރާމާތަށް އަސަރު ކުރާ ކެމްޕޭނެއް ކަމަށް ބުނެ ހުއްޓުވާތީ އަދުރޭ ކަންބޮޑުވުން ފާޅުކުރެއްވ އެވެ. އަދުރޭ ވިދާޅުވީ އެ އުސޫލުން ނަޝީދު ގެންދަވަނީ ޗައިނާގެ ކަރާމާތަށް އަރަމުން ކަމަށެވެ.
"އިންޑިއާ އަށް ރައްދުވާ ގޮތަށް އެއްޗެއް ބުނީމާ އިންޑިއާގެ އިއްޒަތާއި އަބުރާއި ކަރާމަތް ގެއްލޭ ކަމަށް ވަންޏާ، އެ ނޫން ގައުމުތަކާ ދޭތެރޭގައި އެ ގޮތަށް އަމަލުކުރީމާ ވެސް ހަމަ އެ އިއްޒަތާއި ގަދަރާއި ކަރާމަތް ގެއްލޭނެ، ޗައިނާގެ ކަރާމާތާއި އިއްޒަތް ގެއްލޭ ގޮތަށް ނަޝީދު ދައްކާ ވާހަކަތައް ހުއްޓުވަން ވެސް ރިޔާސީ ގަރާރެއް އޮންނަން ޖެހޭނެ،" އަބްދުއްރަހީމް ވިދާޅުވި އެވެ.
ޕީޕީއެމް ޕީއެންސީން ގެންދާ "އިންޑިއާ އައުޓް" ހަރަކާތް ހުއްޓުވަން މުއައްސަސާތަކަށް އަންގައި ރައީސް އިބްރާހިމް މުހައްމަދު ސޯލިހް ވަނީ މިދިޔަ މަހުގެ 21 ވަނަ ދުވަހު ރިޔާސީ ގަރާރެއް ނެރުއްވައިފަ އެވެ.
"އިންޑިއާ އައުޓް" އެ ހަރަކާތަކީ ރާއްޖޭގެ ގާނޫނުލްްއުގޫބާތުން ޖިނާއީ ކުށެއްގެ ގޮތުގައި ކަނޑައަޅައި މަނާކޮށްފައިވާ އަމަލުތަކުގެ ތެރެއިން ވަކި ނަސްލަކަށް ނުވަތަ ނަސަބަކަށް ވީތީ ދަތިކޮށް ފުރައްސާރަކޮށް ތަފާތުކުރުންފަދަ އަމަލެއް ކަމުގައި ރިޔާސީ ގަރާރުގައި ވަނީ ކަނޑައަޅައިފަ އެވެ.
އެ ގަރާރަކީ ޣައިރު ގާނޫނީ ގަރާރެއް ކަމަށް ބުނެ ގަރާރު ބާތިލް ކުރަން އިދިކޮޅު ފަރާތްތަކުން ވަނީ ސިވިލް ކޯޓަށް މައްސަލައެއް ހުށަހަޅައިފަ އެވެ. އިދިކޮޅު ފަރާތްތަކުން ގަބޫލު ކުރަނީ، އެ ގަރާރުގެ ސަބަބުން ގާނޫނު އަސާސީން ކަށަވަރުކޮށްދީފައިވާ ހިޔާލު ފާޅު ކުރުމާއި އެއްވެ އުޅުމުގެ މިނިވަން ކަމާއި ސިޔާސީ ހަރަކާތް ހިންގުމުގެ ހައްގު ހަނި ކުރެވިގެންދާތީ ކަމަށް ބުނެ އެވެ.
އިންޑިއާގެ އަސްކަރީ އެހީ ހޯދަން ސަރުކާރުން ގެންގުޅޭ ސިޔާސަތުތައް އޮތް ގޮތުން ރާއްޖޭގެ މިނިވަންކަމަށް އަސަރު ކުރާނެ ކަމަށް ބުނެ އިދިކޮޅު ފަރާތްތަކުން ދެ ގައުމުގެ ސަރުކާރަށް ވެސް ބޮޑެތި އެތައް ތުހުމަތެއް ކުރެ އެވެ. މި ތުހުމަތުތައް ދެ ގައުމުގެ ސަރުކާރުން ވެސް ދަނީ ދޮގު ކުރަމުންނެވެ.
ސަރުކާރުގެ އިސް ބޭފުޅުންނާއި، އެމްޑީޕީގެ އިސް ބޭފުޅުން ވިދާޅުވާ ގޮތުގައި އިންޑިއާގެ އަސްކަރީ އެހީ ހޯދަން ސަރުކާރުން ގެންގުޅޭ ސިޔާސަތުގެ ބޭނުމަކީ ރާއްޖެއަށް ނުރައްކާތެރި މަސްތުވާތަކެއްޗާއި ހަތިޔާރު އެތެރެ ކުރުން ހުއްޓުވުމާއި ޓެރަރިޒަމްގެ ހަރަކާތްތައް ހުއްޓުވޭނެ އަސްކަރީ ގާބިލްކަން އިތުރު ކުރުމެވެ.
