އުރީދޫ މޯލްޑިވްސް އާއި މިޝަން ފޯ މައިގްރެންޓް ވޯކާސް މޯލްޑިވްސް ގުޅިގެން މާލޭގައި ދިރިއުޅޭ ބިދޭސިންނަށް 9600 އަށް ވުރެ ގިނަ ރޯދަ ވީއްލުން ނިމިދިޔަ ރޯދަ މަހުގެ ތެރޭގައި ބަހައިފި އެވެ.
ރާއްޖޭގައި ދިރިއުޅޭ ބިދޭސިންގެ ހައްގުގައި މަސައްކަތްކުރާ ޖަމއްޔާއެއް ކަމަށްވާ މިޝަން ފޯ މައިގްރަންޓް ވޯކާސް މޯލްޑިވްސްއާ ގުޅިގެން މިދިޔަ އަހަރު ވެސް އުރީދޫން ރޯދަ ވީއްލުން ބަހާފައިވެ އެވެ.
ދަ ސްޕޭސް އާއި އުރީދޫ މޯލްޑިވްސްގެ އިތުރުން މަމަކްއާ ގުޅިގެން ހިންގި މި ހަރަކާތުގައި ދުވާލަކު ގާތްގަނޑަކަށް 200 އެއްހާ މީލް ޕެކް ބަހާފައިވެ އެވެ.
އިފްތާރް މީލް ޕެކް ބެހުމުގެ ހަރަކާތް ނިންމާލާފައި ވާއިރު، ޖުމްލަ 9600 އަށްވުރެ ގިނަ މީލް ޕެކް ބަލާފައިވާ ކަމަށް މިޝަން ފޯ މައިގްރަންޓް ވޯކާސް މޯލްޑިވްސް އިން ބުނެ އެވެ.
އެ ޖަމިއްޔާއިން ހާމަ ކުރާ ގޮތުގައި، މިއީ ވޭތުވެދިޔަ އަހަރާއި އަޅާބަލާއިރު ދެގުނަ އިތުރު އަދަދެކެވެ.
މި ހަރަކާތުގައި އާންމުންނަށްވެސް ބައިވެރިވެވޭނެ އިންތިޒާމު ހަމަޖައްސާފައި ވާއިރު މި ހަރަކާތަށް އާންމުންގެ ފަރާތުން ޖުމްލަ 170،000 އަށްވުރެ ގިނަ ރުފިޔާ ވަނީ ހަދިޔާ ކޮށްފައިވާ ކަމަށް އެ ޖަމިއްޔާއިން ބުންޏެވެ.
މީގެ އިތުރުން އެ ޖަމިއްޔާއިން ބުނީ "ޑޮނޭޓް އަ މީލް، ހެލްޕް ސޭވް އަ ލައިފް" މި މޮޓޯގެ ދަށުން ކުރިއަށްގެންދިޔަ މި ހަރަކާތަށް އާންމުންގެ ފަރާތުން ވަރަށް ބޮޑު ތަރުހީބެއް ލިބިފައިވާއިރު، ޗައިނާ ގާޑަން އާއި ދިރާގުގެ ފަރާތުންވެސް ވަރަށް ބޮޑު އެއްބާރުލުމެއް ލިބިފައިވާ ކަމަށެވެ.
މި ހަރަކާތުގައި މީލް ޕެކް ބެހުމަށްޓަކައި ހަރަކާތްތެރިވެފައިވަނީ މިޝަން ފޯ މައިގްރަންޓް ވޯކާސްގެ ވޮލަންޓިއަރުންނެވެ. އެގޮތުން 20 އަށްވުރެ ގިނަ ވޮލަންޓިއަރުން މި ހަރަކާތުގައި ބައިވެރިވެފައިވެ އެވެ.
