ޏ. ފުވައްމުލަކު ނެރު ކައިރިއަށް މިއަދު ޑައިވިނަށް ފޭބި ދެ މީހުންގެ ތެރެއިން ހާލު ދެރަވެ ހޮސްޕިޓަލަށް ގެންދިޔަ މީހާ އިތުރު ފަރުވާއަށް ދ. ކަނޑިންމަ ރިސޯޓަށް ފޮނުވުމަށް މަސައްކަތް ކުރަމުންދާ ކަމަށް ކައުންސިލުން ބުނެފި އެވެ.
މިއަދު ހަވީރު ހިނގި އެ ހާދިސާގައި އޭގެ ތެރެއިން އެކަކު ގެއްލިގެން ދަނީ ހޯދަމުންނެވެ.
ފުވައްމުލަކުން ވާހަކަ ދެއްކި މީހަކު "އަދަދު" އަށް ބުނީ ފުވައްމުލަކު ހޮސްޕިޓަލުގައި ފަރުވާ ދެމުން އަންނަ މީހާ އިތުރު ފަރުވާއަށް ކަނޑިންމަ ރިސޯޓަށް ފޮނުވުމުގެ މަސައްކަތް ކުރަމުންދާ ކަމަށެވެ.
އެއީ ޑައިވިނަށް ގޮސް އުޅުމުގެ ތެރޭގައި ޑީކޯވާ މީހުންނަށް ފަރުވާދިނުމަށް ބޭނުންވާ ހާއްސަ އާލާތްތައް ފުވައްމުލަކާ އެންމެ ކައިރިން ހުންނަނީ އެ ރަށުގައި ކަމަށްވާތީ އެވެ.
"ޗެމްބަރަށް ލުމަށް ކަނޑިންމައަށް ފޮނުވުމުގެ މަސައްކަތް ކުރަމުން މިހާރު ދަނީ،" އޭނާ ބުންޏެވެ.
އޭނާ ވިދާޅުވީ މިހާތަނަށް އެ ހާދިސާ ހިނގާފައި ގޮތާއި ހިނގަން މެދުވެރިވި ގޮތް ސާފު ނުވާ ކަމަށެވެ.
އެމްްއެންޑީއެފުން ބުނީ ޑައިވިނަށް މީހަކު ގެއްލުނުކަމުގެ ރިޕޯޓް ލިބިގެން އޭނާ ހޯދުމުގެ މަސައްކަތް ކޯސްޓްގާޑް ސަދަން އޭރިއާ ކޮމާންޑުން ކުރަމުން އަންނަ ކަމަށެވެ. ގެއްލުނީ 35 ވަރަކަށް އަހަރުގެ ފިރިހެނެއް ކަމަށާއި ގެއްލުނު އިރު އޭނާ ލައިގެން ހުރީ ކަޅުކުލައިގެ ޑައިވިން ސޫޓެއް ކަމަށް މައުލޫމާތު ލިބިފައިފާ ކަމަށް ވެސް ބުންޏެވެ.
ޑައިވިންއާއި ސްނީކްލިންއަށް ގޮސްގެން އުޅެނިކޮށް މަރުގެ ތަފާތު ހާދިސާ ރާއްޖޭގައި ވަނީ ހިނގާފައެވެ. މިއަހަރުވެސް މިފަދަ އެތައް ހާދިސާއެއް ހިނގާފައި ވާއިރު ޑައިވް ކޮށް ފީނާ ހަދާމީހުން، ކަމުގެ ތަމްރީނު ހޯދައިގެން އެކަން ކުރުމަށް ކަމާބެހޭ ފަރާތްތަކުން ދަނީ އިރުޝާދު ދެމުންނެވެ. އަދި ހަމަ އެހެންމެ ޑައިވްކޮށް ފީނާ ހަދާ މީހުން ގިނަ ސަރަހައްދު ތަކުގައި ޑިކޮމްޕރެޝަން ޗެމްބާ ބެހެއްޓުމުގެ ވާހަކައަކީވެސް ދައްކަމުން އަންނަ ވާހަކަ އެކެވެ.
ނަމަވެސް މިއަދާ ހަމައަށް މިމަސައްކަތުގައި އަމަލީ ފިޔަވަޅެއް އެޅިފައެއް ނުވެއެެވެ.
