އިންޑިއާއާ މެދު ނަފުރަތު އުފެދޭ ގޮތަށް ހިޔާލު ފާޅުކުރުން މަނާކޮށް ރައީސް އިބްރާހީމް މުހައްމަދު ސޯލިހް ނެރުއްވި ރިޔާސީ ގަރާރާ ހިލާފަށް، އިދިކޮޅު ޕީޕީއެމްގެ އޮފީހުގައި ދަމާފައި ހުރި ބެނާއެއް، ރޭ މެންދަމު ވަގުތެއްގައި ފުލުހުން ނަގައިފި އެވެ.
ސަތަރިން ތައްޔާރުކޮށްފައިވާ އެ ބެނާގައި އިންޑިއާގެ ދިދަ ގޮތަށް އެ ކުލަތައް ލައި، އިނގިރޭސިން ހަމައެކަނި ލިޔެފައި އޮތީ "އައުޓް" އެވެ. މިގޮތަށް ބެނާތައް ތައްޔާރުކޮށް ނަގަން ފެށީ "އިންޑިއާ އައުޓް" ޖަހައިގެން ދަމާ ބެނާތައް ކޯޓު އަމުރު ހޯދައިގެން ފުލުހުން ނަގަން ފެށުމުންނެވެ.
ޕީޕީއެމް އޮފީސް ސަރަހައްދު ކައިރިއަށް ފުލުހުން އެއްވެ ބެރިކޭޑް ޖެހީ ރޭ ގާތްގަނޑަކަށް 2:30 ހާއިރެވެ. އެ ސަރަހައްދުގައި ފުލުހުން ފޯރިމަރަން ތިބެފައި 3:30 ހާއިރު ޕީޕީއެމް އޮފީސް ތެރެއަށް ވަދެ އެ އޮފީހުގައި ދަމާފައިވާ ގާތްގަނޑަކަށް ހަތަރު ފޫޓުގެ ބެނާ ނެގި އެވެ.
މީގެ ކުރިން މާލޭގެ އެކި ތަންތަނުގައި ދަމާފައި ހުރި "އިންޑިއާ އައުޓް" ބެނާތަކާއި ޕީޕީއެމްގެ އޮފީހުގެ އިތުރަށް ޕީޕީއެމްގެ ލީޑަރު އަދި ކުރީގެ ރައީސް އަބްދުﷲ ޔާމީންގެ ގެކޮޅުގައި ދަމާފައި ހުރި ބެނާއެއް ވެސް ފުލުހުން ނެގި އެވެ.
ރާއްޖޭގައި އިންޑިއާމެދު ނަފުރަތު އުފެއްދުމަށް އިދިކޮޅު ކޯލިޝަނުން ކުރިޔަށްގެންދާ ހަރަކާތް ހުއްޓުވަން އިދާރާތަކަށް އަންގައި ރައީސް ގަރާރެއް ނެރުއްވީ މިދިޔަ އޭޕްރީލް މަހުގެ 21 ވަނަ ދުވަހުގަ އެވެ.
"އިންޑިއާ އައުޓް"އެ ހަރަކާތަކީ ރާއްޖޭގެ ގާނޫނުލްްއުގޫބާތުން ޖިނާއީ ކުށެއްގެ ގޮތުގައި ކަނޑައަޅައި މަނާކޮށްފައިވާ އަމަލުތަކުގެ ތެރެއިން ވަކި ނަސްލަކަށް ނުވަތަ ނަސަބަކަށް ވީތީ ދަތިކޮށް ފުރައްސާރަކޮށް ތަފާތުކުރުންފަދަ އަމަލެއް ކަމުގައި ރައީސްގެ ގަރާރުގައި ފާހަގަކުރެ އެވެ.
އެ ގަރާރަކީ ޣައިރު ގާނޫނީ ގަރާރެއް ކަމުގައި އިދިކޮޅު ފަރާތްތަކުން ގަބޫލު ކުރަނީ، އެ ގަރާރުގެ ސަބަބުން ގާނޫނު އަސާސީން ކަށަވަރުކޮށްދީފައިވާ ހިޔާލު ފާޅު ކުރުމާއި އެއްވެ އުޅުމުގެ މިނިވަން ކަމާއި ސިޔާސީ ހަރަކާތް ހިންގުމުގެ ހައްގު ހަނި ކުރެވިގެންދާތީ ކަމަށް ބުނެ އެވެ.
އިންޑިއާގެ އަސްކަރީ އެހީ ހޯދަން ސަރުކާރުން ގެންގުޅޭ ސިޔާސަތުތައް އޮތް ގޮތުން ރާއްޖޭގެ މިނިވަންކަމަށް އަސަރު ކުރާނެ ކަމަށް ބުނެ އިދިކޮޅު ފަރާތްތަކުން ދެ ގައުމުގެ ސަރުކާރަށް ވެސް ބޮޑެތި އެތައް ތުހުމަތެއް ކުރެ އެވެ. މި ތުހުމަތުތައް ދެ ގައުމުގެ ސަރުކާރުން ވެސް ދަނީ ދޮގު ކުރަމުންނެވެ.
ސަރުކާރުގެ އިސް ބޭފުޅުންނާއި، އެމްޑީޕީގެ އިސް ބޭފުޅުން ވިދާޅުވާ ގޮތުގައި އިންޑިއާގެ އަސްކަރީ އެހީ ހޯދަން ސަރުކާރުން ގެންގުޅޭ ސިޔާސަތުގެ ބޭނުމަކީ ރާއްޖެއަށް ނުރައްކާތެރި މަސްތުވާތަކެއްޗާއި ހަތިޔާރު އެތެރެ ކުރުން ހުއްޓުވުމާއި ޓެރަރިޒަމްގެ ހަރަކާތްތައް ހުއްޓުވޭނެ އަސްކަރީ ގާބިލްކަން އިތުރު ކުރުމެވެ.
ރިޔާސީ ގަރާރު ބާތިލުކުރުން ޕީޕީއެމްއިން ވަނީ ސިވިލް ކޯޓަށް ހުށަހަޅައިފަ އެވެ.
