އިއްޔެ އިރު އޮއްސެން ކައިރިވެފައި ހުއްޓާ ށ. ކަނޑިތީމުން އެއް އަހަރުގެ ފިރިހެން ކުއްޖަކު ގެއްލިގެން ހޯދަން ފެށި ވާހަކަ މުހުސިނާ އަބްދުﷲގެ ދަރިފުޅު އައިސް ބުނުމުން އޭނާއަށް ދުއްވައިގަނެވުނީ ހުރި ދިމާލުން ގޮނޑުދޮށަށެވެ. އޭނާގެ ފަހަތުން އިތުރު މީހަކުވެސް އެ ދިމާއަށް ދިޔަ އެވެ.
އޭރު އެހިސާބުގަނޑުގެ އެހެން މީހުންވެސް ހާސްކަމާ އެކު އުޅުނީ ގެއްލުނު ކުއްޖާ ފެނޭތޯ އެވެ.
"އަޅުގަނޑުވެސް ދިޔައީ އެ ކުއްޖާ ގެ ކައިރި ގެ އަކަށް، އެ އަވަށުގަ ހުރި ގެ އަކަށް ރޯދަ ވީއްލަން. ދަރުފުޅު އައިސް ބުނީ ކުއްޖަކު ގެއްލިގެން އެބަ ހޯދައޭ. އެހެން ބުނީމަ އަޅުގަނޑުވެސް ދުވެފަ ނިކުތީ ގޮނޑުދޮށަށް. ނޭންގެ ކީއްވެ ކަމެއް އެހެން ބުނީމަ ހަމަ ދުވެފަ އަޅުގަނޑަށް ނިކުމެވުނީ ގޮނޑުދޮށަށް،" އެ ހިތްދަތި ހާދިސާ "އަދަދު" އަށް ކިޔައިދެމުން މުހުސިނާ ބުންޏެވެ.
ކުޑަކުއްޖާ މޫދުގަައި މަރުވެފައި އޮއްވާ ފުރަތަމަ ފެނުނީ މުހުސިނާއަށެވެ.
މުހުސިނާއާ އޭނާއާ އެކީގައި ދިޔަ ދެވަނަ މީހާއާ ދެމީހުން ގޮނޑުދޮށަށް ފޭބީ ދެ މީހުން ދެ މަގަކުންނެވެ.
"އަނެއް މީހާއަށް ފޭބުނީ ކުއްޖާ އޮތް ތަނާ ކައިރިމަގުން. އެކަމަކު އޭނަގެ ލޮލުގަވެސް އަޅައިނުގަތީ. ދެން އެހެން ބަލަމުން އަންނަނިކޮށް އަޅުގަނޑަށް ފެނުނީ މޫދުގަ ފެނުނީ ފެންމަތީގަ އޮއްވާ. ފެނިގެން އަޅުގަނޑު ނެގީ،" މުހުސިނާ ބުންޏެވެ.
"ނެގިއިރު މަރުވެފަ ކަމެއް އަޅުގަނޑަކަށް ނުވެއް އެނގޭ. ފެނުނީމަ އެގަޑީގަ ހާސްވެފަ ހުރީމަ. އަޅުގަނޑު އޭނާ ގޮވައިގެން އެއްގަމަށް އެރިތަނާ އެހެން މީހަކު އައިސް ނަގައިގެން ގެންދިޔައީ،"
އޭނާ ބުނި ގޮތުން ނަމަ މޫދުން ކުއްޖާ ނެގި ހިސާބުގެ ފުން މިނަކީ ބޮޑުމީހެއްގެ ފައިގެ ތަނބިކަށި ކިރިޔާ ފޮރުވޭވަރުގެ ފުންމިނެވެ.
ކަނޑިތީމުން "އަދަދު"އާ ވާހަކަ ދެއްކި އެހެން މީހަކު ބުނީ ކުއްޖާ މަރުވެފައި އޮއްވާ ފެނުނު ސަރަހައްދު އަލަށް މީހުން އާބާދުވާން ފަށާފައިވާ ހިސާބާ ކައިރި ކަމަށެވެ. އެ ހިސާބަކީ މޫދާވެސް ފުދޭވަރަކަށް ކައިރި ހިސާބެއް ކަމަށް އޭނާ ބުންޏެވެ. ނަމަވެސް ކުއްޖާ މަރުވީ ކިހިނެތް ކަމެއް ނުވަތަ މޫދަށް ދިޔައީ ކިހިނެތްކަމެއް އެއްވެސް މީހަކަށް ނޭނގޭ ކަމަށް އޭނާ ބުންޏެވެ.
އެ ރަށު މީހުން ބުނާ ގޮތުންނަމަ ކުއްޖާ ގެއްލިގެން ހޯދަން ފެށީ ހަވީރު 5:45 ހާއިރު އެވެ. ކުއްޖާ މަރުވެފައި އޮއްވާ ފެނުނީ 6:30 ހާއިރު އެވެ.
މަރުވި ކުއްޖާއަކީ އެ އާއިލާގެ އެންމެ ހަގު ކުއްޖާ އެވެ. އޭގެ އިތުރުން އެ އާއިލާގައި އަންހެން ކުއްޖަކާއި ފިރިހެން ކުއްޖަކު ހުރެ އެވެ.
އެއް އަހަރުގެ ކުއްޖަކު މަރުވެފައި ވާއިރު މީގެ ކުރިންވެސް މޫދަށް ގެނބިގެން ކުޑަކުދިން ރާއްޖޭގައި މަރުވެފައި އެބަހުއްތެވެ. އެގޮތުން މި އަހަރު ޖެނުއަރީ މަހު ހުޅުމާލޭގެ ސްވިމިން ޕޫލަކަށް ގެނބިގެން ހަތަރު އަހަރުގެ ކުއްޖަކު މަރުވި އެވެ.
އަދި މިދިޔަ އަހަރު ވަނީ ފައިނުގައި މޫދަށް އެރި އުޅުނު ފަސް އަހަރު ކުއްޖަކުވެސް ގެނބިގެން މަރުވެފަ އެވެ.
