ނޫޑްލްސްގެ ވާހަކަ ދައްކާއިރު ލިސްޓްގެ ކުރިއަށް އިންޑޮނީޝިއާ ނައިހެއް ނުދާނެ އެވެ. އެއީ ދެވަނަ އަށް އެންމެ ގިނައިން ނޫޑްލްސް ބޭނުންކުރާ ގައުމެވެ. އެއްވަނައިގައި އޮތީ އާބާދީ އެންމެ ބޮޑު ޗައިނާ އެވެ.
ދިގު ތާރިހަކާ ގުޅިފައިވާ ނޫޑްލްސްގެ ނުފޫޒު އޭޝިއާގެ ގައުމުތަކުން ފެށިގެން ދުނިޔޭގެ ހުރިހާ ބިތަކަށް ވަނީ ފޯރައިފަ އެވެ. ނަމަވެސް އެންމެ ވަރުގަދައީ، ޗައިނާގެ އިތުރުން އާޝިއާން ގައުމުތަކުގަ އެވެ. ކޮންމެ ގައުމެއްގައި ވެސް އެ ބައެއްގެ އަމިއްލަ ސްޓައިލެއްގައި ނޫޑްލްސްގެ ކެއުންތައް އެކި ނަން ނަމުގައި، އެކި ރަހަތަކުގައި ތައްޔާރުކުރެ އެވެ.
ޖަޒީރާ މި ރާއްޖެ އަށް ވެސް ނޫޑްލްސްގެ ރަހައިގެ ނުފޫޒު ފޯރާފައިވާއިރު، އާބާދީ ކިތަންމެ މަދު ވިޔަސް ނޫޑްލްސް ބޭނުންކުރާ މިންވަރު ނިސްބަތުން މައްޗަށް ދިޔަ އެވެ. ބާޒާރުން ކުރިން ލިބެނީ މަދު ބްރޭންޑެކެވެ. ނަމަވެސް ނޫޑްލްސްގެ ޑިމާންޑް މަތިވެ، ނަން ހުސްނުވާ ވަރަށް ބްރޭންޑްތައް މިހާރު ގިނަވެއްޖެ އެވެ.
ރާއްޖެއަށް އެތެރެކުރާ ގިނަ ނޫޑްލްސް އަކީ އިންޑޮނީޝިއާގެ އުފެއްދުމެވެ. މި ލިސްޓަށް އެންމެ ފަހުން އިތުރުވީ، ސަނީ އެންޓަޕްރައިޒަސްއިން ތައާރަފުކުރި "ބާލީ ކިޗެން" ނޫޑްލްސް އެވެ.
ނޫޑްލްސްއޭ ބުނުމުން ހިތަށް އަރައިގެން ދާނީ ނޫޑްލްސް ވިއްޔާ މާބޮޑު ތަފާތެއް ނުހުންނާނެ ކަމެވެ. އެއީ ކުށްހީއެއް ކަމާއި ހަގީގަތެއް ނޫންކަން، ބާލީ ކިޗެން މުޖައްރިބުކޮށްދެނީ، އޭގެ ރަހަ އާއި އުފައްދާފައިވާ ގޮތުންނެވެ.
ތައްޔާރީ ބައެއް ކާނާ އުފައްދާއިރު، ރަހަ ގެނައުމަށްޓަކައި އެމްއެސްޖީ (މޮނޮސޯޑިއަމް ގްލަޓަމޭޓް) ނުވަތަ އެޑިޑިވް ކޯޑް ނަންބަރު 621 އާޓިފިޝަލް މާއްދާއެއް އެއްކުރެ އެވެ. ބާލީ ކިޗެންގެ ޕެކެޓްގެ ބޭރު ބަލާލުމުން، "ނޯ އެމްއެސްޖީ އެޑެޑް" ލިޔެފައިވާނެ އެވެ. އެ ބުނެދަނީ މި ނޫޑްލްސް އަށް ރަހަ ގެނައުމަށްޓަކައި އާޓިފިޝަލް އެއްވެސް މާއްދާއެއް އެއްކޮށްފައި ނެތް ކަމެވެ. ހަމައެކަނި މިއެއް ނޫނެވެ. އާޓިފިޝަލް ކުލައެއް ވެސް މި ނޫޑްލްސް ތައްޔާރުކުރުމުގައި ބޭނުމެއް ނުކުރެ އެވެ.
"ހަގީގަތުގައި މިއީ އާންމުކޮށް ހުންނަ ނޫޑްލްސްއަށް ވުރެ ސިއްހަތަށް ފައިދާހުރި ނޫޑްލްސްއެއް. އެހެންވެ އަޅުގަނޑުމެން މި ތައާރަފުކުރީ ވެސް،" ސަނީ އެންޓަޕްރައިޒަސްގެ މެނޭޖިން ޑިރެކްޓަރު އަބްދުﷲ ދީދީ ވިދާޅުވި އެވެ.
މި ނޫޑްލްސްގެ 30 ޕެކެޓްގެ ކޭހެއްގެ ހޯލްސޭލްކުރާ އަގަކީ 175ރ. އެވެ.
