އިންޑިއާގެ ނިއު ދިއްލީގައި ބާއްވާ ހަތް ވަނަ ރައިސިނާ ޑައިލޮގްގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މާދަމާ ފުރާވަޑައިގަންނަވާނެ ކަމަށް މަޖިލީހުގެ އިދާރާއިން ބުނެފި އެވެ.
މި މަހުގެ 25 އިން 27 އަށް ބާއްވާ މި ކޮންފަރެންސްގައި މޫސުމަށް އަންނަ ބަދަލުތަކާއި ފާގަތި ދިރިއުޅުމާ ހުރި ގުޅުމުގެ މައްޗަށް ނަޝީދު ވާހަކަ ދައްކަވާނެ ކަމަށް މަޖިލީހުގެ އިދާރާއިން ބުނެ އެވެ. އަދި ގައުމުތައް ދަރަނިވެރިވުމާއި ދަރަނީގެ ސަބަބުން އެ ގައުމުތަކުގެ ބިމުގެ މިލްކުވެރިކަން ގެއްލެމުންދިއުމާ ގުޅޭ ގޮތުން އެ މަނިކުފާނު ވާހަކަ ދައްކަވާނެ އެވެ.
ނަޝީދުގެ މި ދަތުރުފުޅުގައި އިންޑިއާގެ ގާނޫނު ހަދާ މަޖިލީހުގެ ރައީސް އާއި އިންޑިއާގެ އެކްސްޓާނަލް އެފެއާޒް މިނިސްޓަރުގެ އިތުރުން އެ ގައުމުގެ އިސް އޮފިޝަލުންނާ ބައްދަލުކުރައްވާނެ އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީ އާއި އޮބްޒާވާ ރިސާޗް ފައުންޑޭޝަން ގުޅިގެން ކޮންމެ އަހަރަކު ބާއްވާ ބައިނަލްއަގުވާމީ މި ކޮންފަރެންސްގައި ނަޝީދުގެ އިތުރުން، އެންވަޔަރަމެންޓް މިނިސްޓަރު އައިމިނަތު ޝައުނާ މިފަހަރު ވާހަކަ ދައްކަވާނެ އެވެ.
މި ކޮންފަރެންސްގައި އިންޑިއާ އާއި މި ސަރަހައްދުގެ ގައުމުތަކުގެ އިތުރުން ދުނިޔޭގެ ގިނަ ގައުމުތަކެއްގެ އިސް ވެރިންނާއި، އެކި ދާއިރާތަކުގެ މާހިރުންނާއި ވިޔަފާރިވެރީންގެ ތެރެއިން 200 އަށް ވުރެ ގިނަ ބޭފުޅުން ވާހަކަ ދައްކަވާނެ އެވެ.
