މިއަހަރު ހައްޖަށް ދިޔުމަށް ދިވެހިރާއްޖެއަށް ލިބުނީ އެންމެ 453 ކޯޓާ ކަމަށް ބައެއް ނޫސްތަކުން ބުނި ނަމަވެސް ސައުދީ އަރަބިއްޔާގެ ސަރުކާރުން ރަސްމީކޮށް ދިވެހި ސަރުކާރަށް އެކަން އަންގާފައިނުވާ ކަމަށް އިސްލާމިކް މިނިސްޓްރީން މިއަދު ބުނެފި އެވެ.
ރާއްޖެއިން ހައްޖަށް ދާން މިފަހަރު ލިބުނީ 453 މީހުންނަށް ކަމަށް މީޑިއާގައި ރިޕޯޓް ކުރީ "ދި ހޮލީ މޮސްކްސް" ގެ ނަމުގައި ހިންގާ ނުރަސްމީ ޓުވިޓާ އެކައުންޓަކާ ހަވާލާދިނުމަށްފަހު އެވެ. ނަމަވެސް މި ނޫހާ ވާހަކަ ދައްކަމުން އިސްލާމިކް މިނިސްޓްރީގެ މީޑިއާ އޮފިޝަލު އަފްރާހު އިސްމާއިލް ވިދާޅުވީ މީޑިއާއިން ރިޕޯޓް ކުރީ ސައްހަ އަދަދެއްކަން އަދި ނޭނގޭ ކަމަށެވެ.
"އަޅުގަނޑުމެންނަށް އަދި ރަސްމީކޮށް އެއްވެސް މައުލޫމާތެއް ނުލިބޭ. އެ މައުލޫމާތު ލިބުނުހާ އަވަހަކަށް އަޅުގަނޑުމެން އެ މައުލޫމާތު އާންމުންނާ ހިއްސާ ކުރާނަން،" އަފްރާހު ވިދާޅުވި އެވެ.
ހައްޖު ދުވަސް އަންނަ ގާތްގަނޑަކަށް ދެ މަސް ދުވަހަށްވެފައިވާއިރު މިއީ ކޮވިޑް-19 ގެ ބަލިމަޑުކަމަށްފަހު 2020 ވަނަ އަހަރުގެ ހައްޖު ކެންސަލް ކުރިފަހުން ދުނިޔެއަށް ހުޅުވާލައިގެން ގެފުޅަށް ޒިޔާރަތް ކުރުމަށް ލިބޭ ފުރަތަމަ ފުރުސަތެވެ.
މިދިޔަ އަހަރުގެ ހައްޖުގައި ބައިވެރިވެވުނީ ހަމައެކަނި ކޮވިޑް-19 އާ ދެކޮޅަށް ވެކްސިން ޖަހާފައި ތިބި ސައުދީ އަރަބިއްޔާގެ 60،000 މީހުންނަށެވެ. އެ ނޫނީ ކޮންމެ އަހަރު ވެސް ގާތްގަނޑަކަށް 2.5 މިލިއަން މީހުން ގެފުޅަށް ޒިޔާރަތް ކުރެ އެވެ.
މިފަހަރު ހައްޖަށް އެއް މިލިއަން މީހުންނަށް ސައުދީ އަރަބިއްޔާއިން ވަނީ ހުއްދަ ދީފަ އެވެ. އެކަމަކު މިފަހަރު ވެސް ހައްޖަށް ދެވޭނީ ވެކްސިންގެ ޑޯޒުތައް ފުރިހަމަކޮށްފައިވާ މީހުންނަށެވެ. އަދި ސައުދީ އަރަބިއްޔާއަށް ފުރުމުގެ 72 ގަޑިއިރުގެ ތެރޭގައި ޕީސީއާރް ޓެސްޓެއް ވެސް ހަދަންޖެހެ އެވެ.
