އުރީދޫ ދިވެހި ޕްރިމިއާ ލީގުގައި މިރޭ ދަ ގްރާންޑޭ ސްޕޯޓްސް ކްލަބް އަތުން 5-0 އިން މޮޅުވެ، މާޒިޔާ ސްޕޯޓްސް އެންޑް ރެކްރިއޭޝަނުން ލީގުގެ އެއް ވަނައިގައި ފަސް ޕޮއިންޓަށް ލީޑުފުޅާކޮށްފި އެވެ.
މާޒިޔާ އެއް ވަނައިގައި އޮތީ 10 މެޗުން 27 ޕޮއިންޓާ އެކު އެވެ. ދެ ވަނައިގައި ކްލަބް އީގަލްސް އޮތީ ނުވަ މެޗުން 22 ޕޮއިންޓް ހޯދައިގެންނެވެ. އީގަލްސް މި ހަފްތާގައި ކުޅޭ މެޗުގައި އާދިއްތަ ދުވަހުގެރޭ ނުކުންނާނީ ސުޕަ ޔުނައިޓެޑް ސްޕޯޓްސް (ސަސް)އާ ދެކޮޅަށެވެ. އެ މެޗުން މޮޅުވެގެން އަލުން އީގަލްސް އަށް މާޒިޔާއާ ދެ ޕޮއިންޓަށް ގާތަށް ޖެހިލެވޭނެ އެވެ.
މޮޅެއް ނުލިބި، ގްރާންޑޭ އެންމެ ފުލުގައި އޮތީ 10 މެޗުން ޕޮއިންޓަކާ އެކު އެވެ.
މިރޭގެ މެޗު ފަށައިގެން ފުރަތަމަ މިނިޓުން ފެށިގެން މާޒިޔާ އިން ވަނީ ދަ ގްރާންޑޭ ހާފް ތެރޭގައި ބޯޅަ ހިފަހައްޓައިގެން ކުޅެ، އެޓޭކްކުރަން ފަށައިފަ އެވެ. މެޗުގެ ހަތަރު ވަނަ މިނިޓްގައި މާޒިޔާ އިން ލީޑުނެގި އެވެ. މިއީ އޭރިއާތެރެއަށް ހުރަސްވި ބޯޅައެއް މެއިން ކޮންޓްރޯލް ކުރުމަށް ފަހު ނާއިޒު ހަސަން (ދާދު) ޖެހި ގޯލެކެވެ. ޖެހިގެން އައި މިނިޓްގައި މާޒިޔާގެ ލީޑުފުޅާކޮށްދޭން ދާދު އަށް ލިބުނު ބޯޅަ ރަނގަޅަށް ފޮނުވާނުލެވުނެވެ.
މާޒިޔާ އިން ފުލުފުލުގައި އެޓޭކްކުރަމުން ދިޔައިރު، މެޗުގެ 22 ވަނަ މިނިޓްގައި އެ ޓީމުގެ ދެ ވަނަ ގޯލު ޖެހީ ސާބިއާގެ ޑިފެންޑަރު ނަމާންޏާ ކާޓާލް އެވެ. މިއީ އެ ޓީމުގެ ސްޕެއިން ޕްލޭމޭކަރު، ޓަނާ ޑޮމިންގޭޒް ނެގި ކޯނަރަކުން ކާޓާލް ބޮލުން ޖެހި ގޯލެކެވެ. އޭގެ 12 މިނިޓް ފަހުން، މެޗުގެ 34 ވަނަ މިނިޓްގައި މާޒިޔާ އިން ތިން ވަނަ ގޯލެއް ޖެހި އެވެ. މިއީ ދާދު ނެގި ހުރަހަކުން ހަމްޒާ މުހައްމަދު (ހަމްޕު) ބޮލުން ވައްދާލި ގޯލެކެވެ.
ދަ ގްރާންޑޭ އަށް މާޒިޔާ ގޯލުގައި ހުރި ނޭޕާލްގެ ގޯލްކީޕަރު ކިރަން ކުމާރް ޝެމްޝޮން ޓެސްޓްކޮށްލެވޭނެ އެއްވެސް ހަމަލާއެއް ފުރަތަމަ ހާފުގައި ފޮނުވާނުލެވުނެވެ.
މާޒިޔާ އިން ވަނީ ފުރަތަމަ ހާފު ނިމުމުގެ ކުރިން ހަތަރު ވަނަ ގޯލެއް ޖަހައިފަ އެވެ. މިއީ، މެޗުގެ 40 ވަނަ މިނިޓްގައި ސެއިން ވިންސެންޓްގެ ފޯވާޑް، ކޮނޭލިއަސް ސްޓެވާޓް (ކޯނޭ) ޖެހި ގޯލެކެވެ. އޭރިއާބޭރުން ކޯނޭ މި ގޯލު ޖެހީ ދަ ގްރާންޑޭގެ ކީޕަރު ހަސަން މުއާޒް ކުރިއަށް އަރައި، ހުއްޓައި އޭނާ ބޯމަތިން ބޯޅަ އޮއްސާލައިގެންނެވެ.
ދެ ވަނަ ހާފްގައި ދަ ގްރާންޑޭ އިން ފުރަތަމަ ހާފަށް ވުރެ ރަނގަޅަށް ކުޅެ، ފުރުސަތު ތަނަވަސްކުރަން މަަސައްކަތްކުރި އެވެ. އެކަމަކު، ގޯލެއް ޖެހޭ ވަރުގެ އެޓޭކެއް ކުރުން ވީ އުނދަގޫ ކަމަކަށެވެ.
މާޒިޔާގެ، ހަމްޕު ދެ ވަނަ ހާފުގެ ކުރީކޮޅުގައި ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. މެޗުގެ 68 ވަނަ މިނިޓްގައި ހަމްޕު ޖެހި ބޯޅައެއް ވަނީ ކީޕަރު މުއާޒް އަތުގައި ޖެހިފައި ހުރަސްދަނޑިއަށް އަމާޒުވެފަ އެވެ.
މާޒިޔާގެ ފަސް ވަނަ ލަނޑު ޖެހީ ބަދަލު ކުޅުންތެރިއެއްގެ ގޮތުގައި ދެ ވަނަ ހާފުގައި ކުޅެން އެރި، އަސަދުﷲ އަބްދުﷲ (އަސަކޮ) އެވެ. މެޗުގެ 79 ވަނަ މިނިޓްގައި މާޒިޔާ އަށް ލިބުނު ނުސީދާ ހިލޭ ޖެހުމެއްގައި، އޭރިއާ ރޮނގުކައިިރިން ޓަނާ ފޮނުވާލި ބޯޅަ ކީޕަރު މުއާޒް އަތުގައި ޖެހިފައި އަލުން ކުޅުމުގެ ތެރެއަށް އައުމުން ކާޓާލް ވަނީ ބޮލުން ގޯލު ކުރިމައްޗަށް ހުރަސްކޮށްލައިފަ އެވެ. އަސަދުﷲ ބޮލުން ގޯލަށް ބޯޅަ ވައްދާލިއިރު، ދަ ގްރާންޑޭ ކުޅުންތެރިން ތިބީ އޮފްސައިޑަށް އަތްނަގައިގެންނެވެ.
މެޗުގެ 83 ވަނަ މިނިޓްގައި އަސަދުﷲ ގޯލެއް ޖަހަން ބޮލުން ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ. އޭގެ ފަހުން، ގޯލު ކުރިމަތިން އަސަދުﷲ ބޮލުން ފޮނުވާލި ބޯޅަ ދިޔައީ އަރިމަތިންބޭރުންނެވެ.
ލީގުގައި މާދަމާރޭ ކްލަބް ގްރީން ސްޓްރީޓްސް ކުޅޭނީ ކްލަބް ވެލެންސިއާއާ އެވެ. މެޗު ފަށާނީ 22:00 ގަ އެވެ.
