ކުރީގެ ރައީސް އަބްދުالله ޔާމީންގެ ގެކޮޅު, "ދޫވެހި" އަދި ޕީޕީއެމް އޮފީހުގައި ނަގާފައި ހުރި "އިންޑިއާ އައުޓް"ގެ ބޮޑު ބެނާ ނެގުމަށް ފުލުހުން އެ ދެ ގެއަށް ވަނުމުގެ ހުއްދައާއެކު ކޯޓު އަމުރު ނެރުއްވި ފަނޑިޔާރަށް އިންޒާރު ދިން މައްސަލަ ބަލައިދިނުމަށް ޖުޑީޝަލް ސާވިސް ކޮމިޝަންގެ ފަރާތުން ފުލުހުންނަށް ހުށަހަޅައިފި އެވެ.
ފަނޑިޔާރު ގަން ހިންގުވުމަށް ގޮވާލައި ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި އެމަނިކުފާނުގެ ތަރުޖަމާނަކަށް ހުންނެވި އައްބާސް އާދިލް ޓުވިޓާގައި ލިޔުނު މައްސަލައިގައި ޖިނާއީ ތަހުގީގެއް ހިންގުމަށް ފުލުހުންގެ ކިބައިން އެދިފައިވާނެ ކަމަށް ޖޭއެސްސީން މި ނޫހަށް މައުލޫމާތު ދެމުން ބުންޏެވެ.
ޖޭއެސްސީގެ ފަރާތުން އެ މައްސަލަ ފުލުހުންނަށް ހުށަހެޅިއިރު، ފަނޑިޔާރުންނަށް ދޭ އެފަދަ އިންޒާރުތަކަކީ ކުޑަ ކަމެއް ނޫން ކަމަށް ޖޭއެސްސީގެ މެންބަރު އަބްދުލްމާނިއު ހުސެއިން އޮތީ ވިދާޅުވެފަ އެވެ. އެ މައްސަލައިގައި ޖިނާއީ ތަހުގީގެއް ކުރުމަށް އޭނާ ވެސް ވަނީ ގޮވާލައިފަ އެވެ.
އިއްޔެ ފަތިހުގެ ވަގުތުގައި "އިންޑިއާ އައުޓް" ބެނާ ނެގުމަށް ކޯޓު އަމުރު ނެރެދެއްވީ ކުރިމިނަލް ކޯޓުގެ ގާޒީ މުހައްމަދު މިސްބާހެވެ. އެ އަމުރުގެ ދަށުން ޔާމީންގެ ގެކޮޅާއި ޕީޕީއެމް އޮފީހުގައި ނަގާފައި ހުރި ބޮޑު ދެ ބެނާ ފުލުހުން ނެގި އެވެ.
އެކަމާ ގުޅިގެން އިދިކޮޅު, ޕީޕީއެމްގެ ފާޑުކިޔުން ވަރަށް ބޮޑަށް އަމާޒުވެފައިވަނިކޮށް, ޔާމީންގެ ވެރިކަމުގައި ކަސްޓަމްސްގެ ކޮމިޝަނަރުކަން ކުރެއްވި އައްބާސް އާދިލް ރިޒާ ކުރެއްވި ޓުވީޓުގައި ގޮވާލާފައި އޮތީ އާންމުން ނިކުމެ ފަނޑިޔާރު މިސްބާހަށް އަނިޔާ ކުރުމަށެވެ.
އައްބާސް އާދިލް ރިޒާއަކީ އިންޑިއާ ކުންފުނި ޖީއެމްއާރު އަތުން އެއާޕޯޓު ހޯދުމަށް ވަރަށް ބޮޑަށް މަސައްކަތް ކުރި އެކަކެވެ. އޭނާ ފިނޭންސް މިނިސްޓްރީގެ ސްޓޭޓް މިނިސްޓަރަކަށް ބަދަލުކުރީ ޖީއެމްއާރުގެ މައްސަލައިގައި އޭރު ރާއްޖޭގައި ހުންނެވި އިންޑިއާ ސަފީރަށް އަމާޒުކޮށް ކުރި ތުހުމަތުތަކަކަށް ފަހު އެވެ.
އޭނާ ވަނީ 2020 ވަނަ އަހަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ހަށިކޮޅުގައި އަލިފާން ޖެހުމަށް ވެސް ލައިވް ޓީވީ ޕްރޮގްރާމެއްގައި ގޮވާލާފަ އެވެ. އެ މައްސަލަ ފުލުހުން ވަނީ ބަލައިފަ އެވެ.
