ކުރީގެ ރައީސް އަބްދުﷲ ޔާމީން އަބްދުއްގައްޔޫމު ދިރިއުޅުއްވާ ހ. ދޫވެހިގައި ދަމާފައިވާ "އިންޑިއާ އައުޓް" ބެނާ ފުލުހުން އެގެޔަށް ވަދެ ނަގައިފި އެވެ.
އިދިކޮޅު ޕްރޮގްރެސިވް ކޯލިޝަން ތަރުޖަމާނު ހީނާ ވަލީދު ވިދާޅުވީ ރައީސް ޔާމީންގެ ގެކޮޅު ކައިރީގައި 10 ވަރަކަށް ފުލުހުން މިއަދު އެކަމަށްޓަކައި ހަރަކާތްތެރިވި ކަމަށެވެ.
މިހާރު އެ ފުލުހުން ދޫވެއްސަށް ވަދެ އެ ބެނާ ވަނީ ނަގައިފަ އެވެ. މީގެ އިރުކޮޅެއް ކުރިން ޕީޕީއެމް އޮފީހުގައި ދަމާފައިވާ "އިންޑިއާ އައުޓް" ބެނާ ވެސް ފުލުހުން ކޯޓު އަމުރެއްގެ ދަށުން މީގެ އިރުކޮޅެއްކުރިން ނަގާފައިވާކަމަށް އޭނާ ވިދާޅުވި އެވެ.
"ކޯޓު އަމުރަކާ އެކު ވަނީ. އެކަމަކު އެ އަމުރުގައި އޮންނަނީ ބަލާފާސްކުރުމަށް. އެއްޗެއް ގެންދިޔުމަށް ނެގުމަކަށް ނޫން. އަޅުގަނޑުމެންގެ ވަކީލު ވެސް އެބަ ހުންނެވި އެތަނުގައި،" ހީނާ ވިދާޅުވި އެވެ.
ޔާމީންގެ ގެކޮޅުގައި ދަމާފައި ހުރި ބެނާ. ފޮޓޯ: ސޯޝަލް މީޑިއާ
ޔާމީން ދިރިއުޅުއްވާ ގެކޮޅުގައި "އިންޑިއާ އައުޓް"ގެ 50 އަކަށް ފޫޓުގެ އެ ބެނާ ދެމިތާ އަދި ދެ ދުވަސްވީއިރު، ފުލުހުން ވަނީ އެއީ ވަކި ގައުމަކާ ދެކޮޅަށް ހިންގާ ނަފުރަތުގެ އަމަލެއްކަމަށް ބުނެ އެ ބެނާތައް ނެގުމަށް އަންގައިފަ އެވެ.
ޔާމީންގެ ގެކޮޅުގެ އިތުރުން ވެރިރަށް މާލޭގެ އެހެން ބައެއް ގެތަކުގައި ވެސް ވަނީ އެފަދަ ބެނާތަކެއް ދަމައިފަ އެވެ.
