މާލެ ސަރަހައްދުގެ މިސްކިތްތައް ފޮޅާ ސާފުކުރުމުގެ މަސައްކަތާއި ސަހަރާތައް ސާފުކުރުމުގެ މަސައްކަތް ހިނގާނުހިނގާ ގޮތް ބެލުން ހިމެނޭހެން ސިޓީ ކައުންސިލްގެ ޒިންމާގެ ތެރޭގައި ހިމެނޭ ހަ މަސައްކަތްތަކެއް އައުޓްސޯސްކުރަން މަސައްކަތް ފަށައިފި އެވެ.
އެ މަސައްކަތްތައް އައުޓްސޯސްކުރުމަށް ޓަކައި މާލޭ ސިޓީކައުންސިލުން ހަރަދުކުރަން ނިންމާފައިވާ އަދަދުތައް އާންމުކުރަން އެ ކައުންސިލުން ދެކޮޅު ހެދި އެވެ.
މިދިޔަ ބުދަ ދުވަހާއި ބުރާސްފަތި ދުވަހު ކުރި ހަ އިއުލާނެއްގައި އޮތް ގިނަ މަސައްކަތްތަކަކީ ފަންނީ ލަފައަށް ބޭނުމެއް ނުވާ، ހަމައެކަނި ސުޕަވިޝަން އަދި މޮނިޓާކުރުން އެކަނި ހިމެނޭ މަސައްކަތްތަކެކެވެ.
އެއީ:
- މާލެ/ހުޅުމާލެ/ވިލިމާލެ ސަހަރާތައް ސާފުކުރުމުގެ މަސައްކަތް މޮނިޓާކޮށް ބަލަހައްޓަދޭނެ ފަރާތެއް ހޯދުމަށް.
- މާލޭގައި މުނިސިޕަލް ހިދުމަތްތައް ފޯރުކޮށްދެމުންދާ ގޮތް ސުޕަވައިޒްކޮށްދޭނެ ފަރާތެއް ހޯދުމަށް.
- ހުޅުމާލޭގެ މުނިސިޕަލް ހިދުމަތްތައް ފޯރުކޮށްދެމުންދާ ގޮތް ސުޕަވައިޒްކޮށް އެ އިދާރާއަށް ރިޕޯޓްކޮށްދޭނެ ފަރާތެއް ހޯދުމަށް.
- މާލޭގެ މިސްކިތްތައް ފޮޅާ ސާފުކުރުމުގެ މަސައްކަތް މޮނިޓާކޮށް ބަލަހައްޓަދޭނެ ފަރާތްތަކެއް ހޯދުމަށް.
- ހުޅުމާލެ މިސްކިތްތައް ފޮޅާ ސާފުކުރުމުގެ މަސައްކަތް މޮނިޓާކޮށް ބަލަހައްޓަދޭނެ ފަރާތެއް ހޯދުމަށް.
- ދިރިއުޅުމަށްޓަކައި ގެދޮރު ކުއްޔައް ދިނުމާ ބެހޭ ޤާނޫނުގެ ދަށުން ސިޓީ ކައުންސިލުން ކުރާ މަސައްކަތްތައް ވިލަރެސްކޮށް ހިންގުމަށް ބޭނުންވާ ފަންނީ އެހީތެރިކަން ހޯދުމަށް.
އެ މަސައްކަތްތަކަށް ޝައުގުވެރިވާ ކުންފުނިތަކާއި ފަރުދުން އަދި ޕާޓްނާޝިޕްތަކަށް ވެސް ބީލަން ހުށަހެޅޭނެ ކަމަށް އިއުލާނުތަކުގައި ބުންޏެވެ. އެ މަސައްކަތްތަކަށް ހޮވޭ ކުންފުނިތަކަށް ނުވަތަ ފަރުދުންނަށް ދޭން ކަނޑައަޅާފައިވާ އަގުތަކުގެ ތަފްސީލު ހޯދަން "އަދަދު"ން ސުވާލުކުރުން މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވީ، އެ މައުލޫމާތު ސިޓީ ކައުންސިލްގެ އެކަމާ ގުޅޭ ފަރާތްތަކުން ހޯދުމަށެެވެ.
ސިޓީ ކައުންސިލްގެ މީޑިއާ ޑިޕާޓްމެންޓާ ސުވާލުކުރުމުން، ސްޕޯކްސްޕާސަން މަރިޔަމް ޝިއުނާ ވިދާޅުވީ އެ މައުލޫމާތު ހާމަކުރަނީ މައުލޫމާތު ހޯދައި ލިބިގަތުމުގެ ހައްގުގެ ދަށުން އެކަމަށް އެދި ފޯމު ހުށަހެޅުމުން ކަމަށެވެ.
އިއުލާންކުރި މަސައްކަތްތަކާ ގުޅޭ ގޮތުން މުއިއްޒު ވިދާޅުވީ، ގާތްގަނޑަކަށް 360 އަކަށް މުވައްޒަަފުން ގެންގުޅޭ މާލެ ސިޓީ ކައުންސިލްގައި މިހާރު ވެސް ސުޕަވައިޒްކުރުމާއި މޮނިޓާކުރުމަށް މުއައްޒަފުން މަދު ކަމަށެވެ. އަދި އެހެންކަމުން އެ މަސައްކަތް ކުރަން ބަޔަކު ހޯދުމަކީ އެންމެ ރަނގަޅު ގޮތްކަމަށް ދެކޭ ކަމަށް މުއިއްޒު ވިދާޅުވި އެވެ.
"އަޅުގަނޑުމެންގެ ނެތް އެވަރަކަށް ސްޓާފުންނެއް. ދެން މިގޮތަސް މި ނަގާ ފަރަތްތަކަކީ ކޮންމެ ދުވަހަކު ހެން އެ މަސައްކަތްތައް މޮނިޓާކޮށް އެތަންތަނުގައި ހުރި މައްސަލަތައް ހައްލުކުރުމަށް ސީދާ ކައުންސިލަށް ރިޕޯޓުކުރާނެ، ކައުންސިލްގައި ސްޓޭޝްނެވެގެން ތިބޭނެ ބައެއް،" މުއިއްޒު ވިދާޅުވި އެވެ.
އެ މަސައްކަތްތަކަކީ ސިޓި ކައުންސިލުން އައުޓްސޯސްކުރާ މަސައްކަތްތަކެއް ނޫން ކަމަށް ވެސް އޭނާ ވިދާޅުވިި އެވެ. އަދި މިހާރު އެ އިއުލާންކޮށްފައި ހުރި މަސައްކަތްތަކަކީ އެއީ ގިނަ މައްސަލަތަކެއް ހުރި ތަންތަން ކަމަށް މުއިއްޒު ވިދާޅުވި އެވެ.
"މިސާލަކަށް ސަހަރާތަކަށް ބަލާއިރުގަ، އެތަންތަނުގަ ހަމައެކަނި ސާފުކުރުމެއް ނޫން ކުރިޔަށްދަނީ. އެ މަސައްކަތަށްޓަކައި މައުލޫމާތު ސެޝަނުގައި އަދި އާންމުކުރާނެ، އެތަނުގެ މަރާމާތުގެ މަސައްކަތްތައް ކަހަލަ ބައެއް ކަންކަން ވެސް އަދި،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި ސިޓީ ކައުންސިލްގައި ސުޕަވިޝަންގެ މަސައްކަތްތައް ކުރެވޭ ވަރަށް މުވައްޒަފުން މަދުއިރު، ރައްޔިތުންނަށް ދެން ޖެހޭ އެންމެ ރަނގަޅު ފެންވަރުގެ ހިދުމަތްތައް ދިނުމުގައި މިފަދަ ކަމެއް ކުރުމަކީ އިސްރާފެއް ނޫނެވެ.
ސިޓީ ކައުންސިލުން މިފަހުން ސިޔާސީ ގޮތުން ވަޒީފާ ދެމުންދާކަމަށާއި ދެފުށްފެންނަ ގޮތެއްގައި މަސައްކަތް ނުކުރާކަމަށް ބުނެ ބައެއް ފަރާތްތަކުން ކުރިމަތިކުރާ ފާޑުކިޔުންތަކަށް ވެސް މުއިއްޒު ރައްދު ދެއްވި އެވެ. އެކަމާ ސުވާލުކުރުމުން މުއިއްޒު ވިދާޅުވީ މިހާރު އޮތް ސިޓީ ކައުންސިލަކީ އެއްވެސް ގޮތަކަށް ސިޔާސީ ނުވާނެ ކައުންސިލެއް ކަމަށެވެ.
"ހަމަ އެމްޑީޕީ މެމްބަރުން ވެސް ކަމަކަށް އެދިގެން ބުނެފިއްޔާ ނުލާހިކު އަވަހަށް އެކަން ކޮށްދެން. ސަރުކާރުން ވެސް މިނިސްޓްރީތަކަށް ވެސް މިދަނީ ހަމަ އެހެން. އަޅުގަނޑުމެން މީހުން ނަގާއިރު ބަލަނީ އެންމެ ފެންވަރު ރަނގަޅު މީހުން ނެގޭތޯ ހަމަ. ސިޔާސީކޮށް ވަޒީފާ ދީފައި ނުވާނެ،" މުއިއްޒު ވިދާޅުވި އެވެ.
