"ސޮނީ ސްޕޯޓްސް ފެޝަން" ގެ ނަން ބަދަލު ކުރަން ނިންމައި، ފިހާރައަށް ކިޔާނެ ރީތި އާ ނަމެއް ހުށަހަޅައިގެން 25،000ރ. ހޯދޭނެ ފުރުސަތެއް ސޮނީ ސްޕޯޓްސް ކުންފުނިން ހުޅުވާލައިފި އެވެ.
"ސޮނީ ސްޕޯޓްސް ފެޝަން" ނަމުގައި ސޮނީ ސްޕޯޓްސްގެ ދެ ފިހާރައެއް މާލޭގައި ހުރެ އެވެ. އަމީނީ މަގު މީރާ ކުރިމަތީ އެއް ފިހާރަ ހުންނައިރު، އަނެއް ފިހާރަ ހުންނަނީ މަޖީދީ މަގު ހެންވޭރު ދަނޑު ކައިރީގަ އެވެ.
ކުއިކްސިލްވާ، ރޮކްޒީ، ބިލަބޮންގް، ރިޕްކާލް ފަދަ ބްރޭންޑްތަކުގެ ތަކެތި ވިއްކާ އެ ދެ ފިހާރައަށް ކިޔާނެ އާ ނަމެއް ހުށަހަޅާން ސޮނީ ސްޕޯޓްސް ފެޝަންގެ ފޭސްބުކް ޕޭޖްގައި ވަނީ ހުޅުވާލައިފަ އެވެ.
މި ފުރުސަތުގައި ބައިވެރިވުމަށް ސޮނީ ސްޕޯޓްސް ފެޝަންގެ ފޭސްބުކް ޕޭޖަށް ފޮލޯ ކުރަން ޖެހެ އެވެ. އަދި ހުށަހަޅަން ބޭނުންވާ ނަން ޕޭޖްގެ ޕޯސްޓަށް ކޮމެންޓްކޮށް، އެ ކޮމެންޓްގައި ފޭސްބުކް ތިން އެކުވެރިއެއް ޓެގް ކުރަން ޖެހެ އެވެ. އަދި އެ ޕޯސްޓް ފޭސްބުކްގައި ޝެއާ ކުރުމުން ބައިވެރިވެވުނީ އެވެ.
ސޮނީ ސްޕޯޓްސް ފެޝަން ފިހާރައަށް އާ ނަމެއް ދިނުމަށް ހުށަހެޅޭނީ އެންމެ ނަމެއް ވެސް ނޫނެވެ. ކޮންމެ މީހަކަށް ވެސް އެތައް ނަމެއް ހުށަހެޅިދާނެ އެވެ. ނަމަވެސް، އެކަކަށް ވުރެ ގިނަ ބަޔަކު އެއް ނަމެއް ކޮމެންޓް ކޮށްފައިވާނަމަ، ބަލާނީ އެ ނަމެއް ފުރަތަމަ ކޮމެންޓް ކުރި މީހާއަށެވެ. ކޮމެންޓް ކުރި ނަންތަކުން ސޮނީ ސްޕޯޓްސް އަށް ކަމުދާ ތިން ނަމެއް އިހްތިޔާރު ކުރާނެ އެވެ.
މި މަހުގެ 30 ވަނަ ދުވަހުގެ މެންދުރު 12 ޖެހުމާ ހަމައަށް ހުޅުވާލާފައިވާ ފުރުސަތާ ގުޅޭ ގޮތުން ސޮނީ ސްޕޯޓްސް އިން ބުނީ، އެ ކުންފުނިން އިހްތިޔާރު ކުރާ ތިން ނަން ފޭސްބުކްގައި ޕޯސްޓް ކުރެވޭނެ އެވެ.
ޓޮޕް ތިން ނަމުގެ ތެރެއިން ފިހާރައަށް ކިޔާ ނަން އިހްތިޔާރުކޮށް ފޭސްބުކް ޕޭޖްގައި އިއުލާން ކުރާނީ އަންނަ މަހުގެ ދެ ވަނަ ދުވަހު އެވެ.
