ހިޔާ ފްލެޓުތަކާއި އެހެނިހެން ހައުސިން ޔުނިޓުތަކުން ލިބެން ޖެހޭ ކުލި ނުލިބޭނަމަ ހައުސިން ޑިވަލޮޕްމަންޓު ކޯޕަރޭޝަން (އެޗްޑީސީ)ން ނަގާފައިވާ ލޯނުތައް އަނބުރާ ނުދެއްކޭނެ ކަމަށް އޮޑިޓު އޮފީހުން މިއަދު ބުނެފި އެވެ.
ހިޔާ ފްލެޓުތަކުގެ އަގާއި ކުލި ކަނޑައެޅި ގޮތުގެ މައްޗަށް ތައްޔާރުކުރި އޮޑިޓާ ގުޅިގެން މިއަދު ބޭއްވި މާލިއްޔަތު ކޮމިޓީގެ ބައްދަލުވުމެއްގައި އޮޑިޓު އޮފީހުން މިކަންބޮޑުވުން ހިއްސާކުރީ މިހާރު ވެސް ކުލި ނުދައްކާ ނިސްބަތް ބޮޑުކަން ފާހަގަކުރަމުންނެވެ. އެގޮތުން، މިހާރު ވެސް 30 ޕަސެންޓު ޑީފޯލްޓު އުޅޭކަން އޮޑިޓު އޮފީހުން ކޮމިޓީގައި ފާހަގަކުރި އެވެ.
މިއީ އެޗްޑީސީ ފަދަ ދަރަނި ބޮޑު ކުންފުންޏަކަށް ދެމެހެއްޓެނިވި ގޮތެއްގައި ވިޔަފާރި ކުރެވޭނެ ގޮތެއް ނޫން ކަމަށް ވެސް އޮޑިޓު އޮފީހުން ފާހަގަކުރި އެވެ.
އޮޑިޓާ ޖެނެރަލް އޮފީހުން ކޮމިޓީއާ ހިއްސާކުރި މައުލޫމާތަށް ބަލާއިރު އެޗްޑީސީން 700 މިލިއަން ޑޮލަރަށް ވުރެ ގިނަ ލޯނު ނަގާފައި އެބަހުއްޓެވެ. އޭގެ ތެރެއިން 434 މިލިއަން ޑޮލަރުގެ ލޯނު ގުޅެނީ ހިޔާ ފްލެޓުތަކާ އެވެ. މީގެ ތެރެއިން ބޮޑެތި ހުރިހާ ލޯނެއް ނެގީ ދައުލަތުން ގެރެންޓީ ދީގެން ކަމުން އެ ކުންފުންޏަށް ލޯނު ނުދެއްކިއްޖެ ހާލަތެއްގައި ޒިންމާވާން ޖެހެނީ ދައުލަތުންނެވެ.
އެޗްޑީސީއަށް ލިބެން ޖެހޭ ފައިސާ ނުލިބޭތީ ކުންފުނީގެ ހަރަދުތައް ފޫބައްދަން ފިނޭންސް މިނިސްޓްރީން ސޮވަރިން ލޯނު ވެސް ނަގާފައި އެބަހުއްޓެވެ. އެކަމަކު އަދިވެސް ކޭޝް ފްލޯ މެނޭޖުކުރަން އިތުރު ލޯނުތަކެއް ނަގަން ޖެހޭ ކަމަށް އޮޑިޓު އޮފީހުން ފާހަގަކުރި އެވެ.
މީގެ ތެރޭގައި ހިޔާ ފްލެޓުތައް ތަރައްގީކުރަން އިންޑަސްޓްރިއަލް އެންޑް ކޮމާޝަލް ބޭންކު އޮފް ޗައިނާ (އައިސީބީސީ)ން ނަގާފައިވާ 368 މިލިއަން ޑޮލަރުގެ ލޯނު ދައްކަން އެޗްޑީސީން ވިއްކަން މަސައްކަތް ކުރަމުން އަންނަ 200 މިލިއަން ޑޮލަރުގެ ބޮންޑެއް ވެސް ހިމެނެ އެވެ.
މިހާ ދަރަނި ބޮޑު އިރު، އެޗްޑީސީއަށް އާމްދަނީ ލިބޭ ގޮތަށް ހިންގާ ސްކީމުތަކުން ބަރާބަރަށް ފައިސާ ނުލިބޭ ނަމަ އެ ލޯނުތައް މެނޭޖުނުކުރެވޭނެ ކަމަށް އޮޑިޓު އޮފީހުން ފާހަގަކުރި އެވެ. އެހެންކަމުން، އެއްބަސްވެފައިވާ ގޮތަށް ބަރާބަރަށް ކުލި ދެއްކުމަކީ ކުއްޔަށް ހިފާ ފަރާތުގެ ޒިންމާއެއް ކަމަށް ވެސް އޮޑިޓު އޮފީހުގެ ބޭފުޅުން ކޮމިޓީގައި ފާހަގަކުރި އެވެ.
އޮޑިޓު އޮފީހުން ކޮމިޓީގައި މި ކަންބޮޑުވުން ހިއްސާކުރީ، ހިޔާ ފްލެޓުތަކުގެ ކުލި ބޮޑު ކަމަށް ބުނެ ކުލި ނުދައްކާނެ ކަމަށް ބައެއް ފަރާތްތަކުން ބުނަމުންދާ ދަނޑިވަޅެއްގަ އެވެ.
އެޗްޑީސީން މި ފްލެޓުތަކުގެ ކުލި ނަގަން ފެށީ މީހުންނާ ތަޅުދަނޑި ހަވާލުކުރިތާ ހަތް މަސް ފަހުންނެވެ.
