އޭޝިއާގެ ތަރައްގީވަމުން އަންނަ ގައުމުތަކާއި ޕެސިފިކުގެ ޖަޒީރާ ގައުމުތައް ހިމެނޭ ގޮތަށް، މި އަހަރު އެންމެ ބާރު ދުވެލީގައި ކުރިއަރާނީ ރާއްޖޭގެ އިގުތިސޯދު ކަމަށް އޭޝިއަން ޑިވަލޮޕްމަންޓް ބޭންކު (އޭޑީބީ)އިން ލަފާކޮށްފި އެވެ.
އަހަރަކު އެއް ފަހަރު އެ ބޭންކުން ނެރޭ އޭޝިއަން ޑިވަލޮޕްމަންޓް އައުޓްލުކްގައި ހިމަނާފައިވާ 46 ގައުމުގެ ތެރެއިން ދެ ޑިޖިޓުގައި ކުރިއަރާނެ ކަމަށް ލަފާކުރާ ހަމައެކަނި އިގުތިސޯދަކީ ވެސް ރާއްޖެ އެވެ.
އިގުތިސޯދީ ދުވެލި ބާރު ވާނެ ކަމަށް އެ ރިޕޯޓުގައި ބުނި ނަމަވެސް، ރަޝިއާ-ޔޫކްރެއިން ހަނގުރާމައިގެ ސަބަބުން ޓޫރިސްޓުންގެ އަދަދު 10 ޕަސެންޓު ދަށަށް ދާނެ ކަމަށް އެ ބޭންކުން ލަފާކުރެ އެވެ. އެއީ 1.18 މިލިއަން ޓޫރިސްޓުންނެވެ.
މިއީ މި އަހަރަށް ފާސްކުރި ބަޖެޓުގައި ލަފާކުރި 1.6 މިލިއަން ޓޫރިސްޓުންނަށް ވުރެ ބައި މިލިއަނެއްހާ މަދު އަދަދެކެވެ.
ޓޫރިޒަމަށް ލޮޅުމެއް އައި ނަމަވެސް އިގުތިސޯދު މި މިންވަރަށް ކުރިއަރާނެ ކަމަށް އޭޑީބީން ލަފާކުރި ސަބަބުތަކުގެ ތެރޭގައި ފާހަގަކުރީ ކޮންސްޓްރަކްޝަން ސިނާއަތެވެ. އެގޮތުން މިހާރު ފަށާފައިވާ މާލެ-ތިލަފުށި ބްރިޖު މަޝްރޫއާއި މި އަހަރު ފަށަން ރާވާފައިވާ ގުޅިފަޅު ޕޯޓް މަޝްރޫއުގެ ސަބަބުން ކޮންސްޓްރަކްޝަން ސިނާއަތަށް ބޮޑު ކުރިއެރުމެއް އަންނާނެ ކަމަށް ބެލެވެ އެވެ.
މި ލަފާކުރުންތަކަށް ހުރި ގޮންޖެހުންތަކުގެ ގޮތުގައި އޭޑީބީން ފާހަގަކުރީ މިހާރަށް ވުރެ ނުރައްކާތެރި ކޮވިޑު ވޭރިއަންޓެއް ފެތުރުމުގެ ބިރާއި ރަޝިއާ-ޔޫކްރެއިން ހަނގުރާމަ ދިގުލައިގެން ދިޔުމެވެ.
މި ދެ ކަމަކީ ވެސް ޓޫރިޒަމް އިތުރަށް ހީނަރުވެ، އޭގެ އަސަރު ދައުލަތުގެ އާމްދަނީއަށް ކުރާނެ ކަންކަމެވެ. އެއާ އެކީ، ހަރަދުތައް ހަމަޖެއްސުމާއި ދަރަނި އަދާކުރުމުގެ ގާބިލިއްޔަތަށް އަސަރު ކުރާނެ ކަމަށް އޭޑީބީން ބުންޏެވެ.
ތެލުގެ އަގާއި މިނިމަމް ވޭޖާ ހެދި އިންފްލޭޝަން މަތި ވާނެ
ދިވެހި އިގުތިސޯދަށް އޮތް އަނެއް ނުރައްކަލަކީ މުދަލުގެ އަގު އުފުލުމެވެ. މިގޮތުން މި އަހަރުގެ ތެރޭގައި އިންފްލޭޝަން (މުދަލުގެ އަގު އުފުލޭ ނިސްބަތް) ތިން ޕަސެންޓަށް އުފުލޭނެ ކަމަށް އޭޑީބީން ލަފާކުރެ އެވެ.
މިއީ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ން 2.6 ޕަސެންޓަށް ވުރެ މަތީ އަދަދެކެވެ.
އިންފްލޭޝަން މައްޗަށް ދާނެ ކަމަށް ބެލެވޭ މައިގަނޑު ސަބަބަކީ އިގުތިސޯދީ ހަރަކާތްތަކަށް ކޮންމެހެން ބޭނުންވާ ތެލުގެ އިމްޕޯޓުތަކުގެ އަގު އުފުލުމެވެ. އަނެއް ސަބަބަކީ ޖެނުއަރީން ފެށިގެން ތަންފީޒުކުރަން ފަށާފައިވާ މިނިމަމް ވޭޖެވެ.
މުދަލުގެ އަގު އުފުލުނު ނަމަވެސް އަވައްޓެރި ގައުމުތަކާއި އޭޝިއާ ސަރަހައްދުގެ ގިނަ ގައުމުތަކާ އަޅާކިޔާ އިރު ރާއްޖޭގެ އިންފްލޭޝަން މަތިވާ މިންވަރު ކުޑަ އެވެ. އޭޑީބީގެ މެމްބަރު ގައުމުތަކުގެ އިންފްލޭޝަން ހުންނާނެ ކަމަށް ލަފާކުރާ 3.7 ޕަސެންޓުގެ އެވަރެޖަށް ވުރެ ވެސް ކުޑަ އެވެ.
