ވަކިވަކި ވިޔަފާރި ދާއިރާތަކާއި މަޝްރޫއުތަކުން ލިބޭ އާމްދަނީން ޓެކްސް އިސްތިސްނާ ދިނުމުގެ ގަވާއިދު ފިނޭންސް މިނިސްޓްރީން މިއަދު އާންމުކޮށްފި އެވެ.
މިއީ އާމްދަނީން ޓެކްސް ނެގުމުގެ ގާނޫނު (އިންކަމް ޓެކްސް ގާނޫނު) ގައި ރައީސުލްޖުމްހޫރިއްޔާއަށް ލިބިދީފައިވާ ޓެކްސް އިސްތިސްނާ ދިނުމުގެ ބާރުގެ ދަށުން، އިންކަމް ޓެކްސް ލުއި ދިނުމާ ގުޅޭ ގަވާއިދެކެވެ.
ގާނޫނުގައި އިސްތިސްނާ ދިނުމުގެ ބާރު ރައީސަށް ލިބިވަޑައިގެންނެވި ނަމަވެސް، އެއްވެސް އިސްތިސްނާއެއް ދިނުމާ މެދު ރައީސް ގޮތް ނިންމަވާނީ ވަޒީރުންގެ މަޖިލީހުގެ ސަބްކޮމިޓީއެއްގެ ލަފަޔާއި ވަޒީރުންގެ މަޖިލީހުގެ މަޝްވަރާގެ މަތިންނެވެ.
އިންކަމް ޓެކްސް އިސްތިސްނާ ލިބޭނެ ވިޔަފާރި ދާއިރާތައް ވެސް ނިންމާނީ ހަމަ މިގޮތުގެ މަތިންނެވެ.
އިސްތިސްނާ ދެވޭނެ ދާއިރާތައް ގަވާއިދުގެ ޖަދުވަލެއްގެ ގޮތުގައި ހިމަނަންވާނެ ކަމަށް ގަވާއިދުގައި ލިޔެފައި އޮތް ނަމަވެސް އަދި އެއްވެސް ދާއިރާއެއް އިސްތިސްނާ ކުރަން ނިންމާފައި ނުވާތީ އާންމުކޮށްފައެއް ނުވެ އެވެ.
މި ގަވާއިދުގައިވާ ގޮތުން އިންކަމް ޓެކްސް އިސްތިސްނާ ދިނުމުގައި ބަލާނީ ތިން ކަމަކަށެވެ. އެއީ:
- އިސްތިސްނާގެ ސަބަބުން ދައުލަތުގެ އާމްދަނީއަށް ކުރާނެ އަސަރު
- އިސްތިސްނާ ދިނުމުން އިގުތިސޯދީ ގޮތުންނާއި އިޖުތިމާއީ ގޮތުން ކުރާނެ ފައިދާ އާއި ގެއްލުން، އަދި
- އިސްތިސްނާ ދީގެން ހާސިލުވާން ބޭނުންވާ މަގުސަދު ހާސިލުވާނެ މިންވަރެވެ.
އޭގެ އިތުރުން، އިސްތިސްނާއަށް އެދޭ ވިޔަފާރި މަޝްރޫއުތަކުން ފުރިހަމަ ވާން ޖެހޭ ޝަރުތުތަކެއް ވެސް ވަނީ ކަނޑައަޅާފަ އެވެ. އެއީ:
- އިސްތިސްނާ ލިބޭ ވިޔަފާރި ނުވަތަ ވިޔަފާރިވެރިޔާ މީރާއަށް ހުށަހަޅާފައިވާ ހުރިހާ މައުލޫމާތު މިނިސްޓްރީއަށް ހާމަކުރަން އިންކާރު ނުކުރުން
- ވަކި ވިޔަފާރި މަޝްރޫއަކަށް އިސްތިސްނާ ދޭ ނަމަ، އެ ގާނޫނީ ޝަހުސަކުން (ލީގަލް އެންޓިޓީއަކުން) ކުރާ ހަމައެކަނި މަސައްކަތަކީ އެ މަޝްރޫއުގެ މަސައްކަތަށް ވުން
- ދައުލަތުގެ ހިލޭ އެހީން ހިންގާ ވިޔަފާރި މަޝްރޫއަކަށް ވުން ނުވަތަ، ސަރުކާރު މެޖޯރިޓީ ހިއްސާވާ ކުންފުންޏަކާ އެކު ވާ އެއްބަސްވުމެއްގެ ދަށުން ހިންގާ ވިޔަފާރި މަޝްރޫއަކަށް ވުން ނުވަތަ ރާއްޖޭގައި އިންވެސްޓު ކުރުމަށް ސަރުކާރާ އެކުވާ އެއްބަސްވުމެއްގެ ދަށުން ހިންގާ މަޝްރޫއެއް ނޫނީ ސައްތައިން ސައްތަ ސަރުކާރު ކުންފުންޏަކުން ހިންގާ ވިޔަފާރި މަޝްރޫއަކަށް ވުން
އެގޮތަށް އިސްތިސްނާ ލިބޭ ފަރާތްތަކުގެ ނަންތައް ގެޒެޓުގައި ޝާއިއުކޮށް އަދާހަމަ ކުރަން ޖެހެ އެވެ. އަދި، ގެޒެޓުގައި ޝާއިއުކުރާއިރު އިސްތިސްނާ ދީފައިވާ މުއްދަތާއި، ދިން ސަބަބާއި، އާމްދަނީއާ ގުޅުންހުރި އިންވެސްޓުމަންޓުގެ މިންވަރުގެ މައުލޫމާތު އާންމުކުރަން ޖެހެ އެވެ.
މި ގަވާއިދުގެ ދަށުން އިސްތިސްނާ ލިބޭ ވިޔަފާރިތަކަށް، އިސްތިސްނާ ދޭ ދުވަހުން ފެށިގެން 12 ދުވަހުގެ ތެރޭގައި މި ހުރިހާ މައުލޫމާތެއް ހިމެނޭހެން މި ލިސްޓު އަދާހަމަކުރަން ޖެހެ އެވެ.
މި އިސްތިސްނާ ލިބޭ ހުރިހާ މަޝްރޫއެއް ގާނޫނީ ވަކި ޝަހުސެއްގެ ގޮތުގައި ރަޖިސްޓްރީ ކުރަން ޖެހެ އެވެ. އަދި، އިސްތިސްނާ ލިބޭ އާމްދަނީގެ ރެކޯޑުތައް ވަކިން ބަލަހައްޓަން ޖެހެ އެވެ. އަހަރަކު އެއް ފަހަރު މުސްތަގިއްލު އޮޑިޓަރެއްގެ ފައިނޭންޝަލް ރިޕޯޓެއް ވެސް ހުށަހަޅަން ޖެހެ އެވެ.
އިސްތިސްނާ ދޭ ފަދައިން، އިސްތިސްނާ ބާތިލުކުރުމުގެ ބާރު ވެސް ރައީސްއަށް ލިބިވަޑައިގަންނަވަ އެވެ. އިސްތިސްނާ ބާތިލުކުރާ ހާލަތްތަކަކީ:
- ސައްހަ ނޫން މައުލޫމާތު ހިމަނައިގެން އިސްތިސްނާ ހޯދާފައިވާނަމަ
- މަޝްރޫއު ހުއްޓާލުން ނުވަތަ އެ ނަމުގައި އިތުރު ވިޔަފާރިއެއް ހިންގަން ފެށުން
- ވިޔަފާރިއެއްގެ މައްޗަށް ޖިނާއި ކުށެއް ސާބިތުވުން
- އިސްތިސްނާ ދިން މަގުސަދު ހާސިލުވުން
- އެކަށީގެންވާ ހެއްކާ އެކު އެއްވެސް ސަބަބަކާހުރި އިސްތިސްނާ ދިން މަގުސަދު ހާސިލު ނުވާނެ ކަމަށް ބެލެވުން، އަދި
- ޓެކްސް ނޫން ގޮތަކުން ދައުލަތަށް ސީދާ ގޮތުން ވިޔަސް ނުސީދާ ގޮތުން ވިޔަސް މާލީ ގެއްލުމެއް ލިބުން، ނޫނީ ލިބިދާނެ ކަމަށް ބެލެވުން، މިއެވެ.
މިއަދުން ފެށިގެން މި އުސޫލަށް އަމަލުކުރާނެ އެވެ.
މި އިސްތިސްނާ ދޭން ގާނޫނު އިސްލާހުކުރަން ސަރުކާރުން ހުށަހެޅި ސަބަބާ ގުޅިގެން ރައްޔިތުންގެ މަޖިލީހުގެ އިގުތިސޯދީ ފިނޭންސް މިނިސްޓަރު އިބްރާހިމް އަމީރު ވިދާޅުވީ، މިއީ ބޮޑެތި މަޝްރޫއުތަކަށް ފަހިކުރުމުގެ ގޮތުން ގެނައި ބަދަލެއް ކަމަށާއި މީގެ ސަބަބުން ބޮޑެތި އިންވެސްޓްމަންޓުތަކަށް ފުރުސަތު ހުޅުވިގެން ދާނެ ކަމަށެވެ.
