އިނގިރޭސިވިލާތުގެ ވެރިރަށް ލަންޑަނުގައި މިއަދު ފަށާ 9 ބޯލް ވޯލްޑް ޗެމްޕިއަންޝިޕްގައި ރާއްޖޭގެ ގައުމީ ޓީމްގެ ހަސަން ޝާޒް މުހައްމަދު އާއި މުހައްމަދު ޝަރީފް (ޝަރީ) ވާދަކުރަން ތައްޔާރުވެއްޖެ އެވެ.
މިއަދުން ފެށިގެން މިމަހުގެ 10 ވަނަ ދުވަހުގެ ނިޔަލަށް ކުރިއަށްދާ 9 ބޯލް ވޯލްޑް ޗެމްޕިއަންޝިޕްގައި ދުނިޔޭގެ އެކި ގައުމުތަކުން 128 ކުޅުންތެރިން ވާދަކުރެ އެވެ. މި މުބާރާތުގައި ވާދަކުރާ ފާހަގަކޮށްލެވޭ ކުޅުންތެރިންގެ ތެރޭގައި މިދިޔަ އަހަރު މި މުބާރާތް ކާމިޔާބުކުރި އޮސްޓްރިއާގެ އަލްބިން އޫޝަން ހިމެނެ އެވެ.
އޫޝަންވަނީ މިދިޔަ މަހު ނިމުނު މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް ރާއްޖެ އައިސްފަ އެވެ. އަދި އެ ދަތުރުގައި ރާއްޖޭގެ ބިލިއާޑް ކުޅުންތެރިންނާއި ބައްދަލުކޮށް އޭނާގެ ތަޖުރިބާވެސް އޫޝަން ހިއްސާކުރި އެވެ.
މި މުބާރާތުގައި ދިވެހިރާއްޖެއިން ވާދަކުރަނީ ރޭންކިންގެ އެއްވަނައިގައި އޮތް ހަސަން ޝާޒް އާއި ދެ ވަނަ ޝަރީފް (ޝަރީ) އެވެ.
މި ދެ ކުޅުންތެރިންގެ ތެރެއިން ޝާޒް ކުޅޭ ފުރަތަމަ މެޗުގައި މިއަދު ނުކުންނާނީ މުބާރާތުގައި 15 ވަނަ އަށް ސީޑުކޮށްފައިވާ ހަންގޭރީގެ ޗެމްޕިއަން އޮލިވާ ޒޮލްނޮކީއާ ދެކޮޅަށެވެ. ރާއްޖޭގެ ޝަރީފް ނުކުންނާނީ މުބާރާތުގެ 38 ވަނަ ސީޑު އެމެރިކާގެ ހަންޓާ ލޮމްބާޑޯ އާ ދެކޮޅަށެވެ.
ޑަބަލް އެލިމިނޭޝަން އުސޫލުން ކުރިއަށްދާ މުބާރާތުގެ ފުރަތަމަ ބުރުގެ މެޗުތައް ކުޅޭނީ "ރޭސް-ޓު-9" އަށެވެ. 64 ކުޅުންތެރިން ކެޓުމުން ދެން ކުޅޭ ހުރިހާ މެޗެއްވެސް ކުޅޭނީ ފުރަތަމަ 11 ފްރޭމް ހޯދާ ކުޅުންތެރިއެއް މޮޅުވާ ފޯމެޓަށެވެ. އޭގެ ފަހުން ފައިނަލް މެޗު ކުޅޭނީ "ރޭސް-ޓު-13" ފްރޭމަށެވެ.
މި މުބާރާތުގެ އެއް ވަނަ ހޯދާ ކުޅުންތެރިއަކަށް 60،000 ޑޮލަރުގެ ފައިސާގެ އިނާމެއް ލިބެ އެވެ.
