އަންނަ ޖޫން މަހުން ފެށިގެން ރާއްޖޭގައި އަމަލުކުރަން ފަށާ މަދަނީ އިޖުރާއަތުގެ ގާނޫނު އާންމުންނަށް ކިޔައިދީ އަހުލުވެރިކުރުމަށްޓަކައި ސުޕްރީމް ކޯޓުގެ ފަނޑިޔާރު ހުސްނުއްސުއޫދު ފޮތެއް ނެރުއްވައިފި އެވެ.
"ދިވެހިރާއްޖެގެ މަދަނީ އިޖުރާއަތު ދެނެގަތުން" މި ނަމުގައި ފަނޑިޔާރު ސުއޫދު މިއަދު ނެރުއްވި ފޮތް މިހާރު އޮންލައިންކޮށް ފަނޑިޔާރު ސުއޫދުގެ ވެބްސައިޓް އިން ހިލޭ ލިބެން ހުންނާނެ އެވެ. ޖުމްލަ 218 ސަފްހާގެ އެ ފޮތާއި ގުޅޭގޮތުން ފަނޑިޔާރު ސުއޫދު "އަދަދު" އަށް ވިދާޅުވީ އެ ފޮތަކީ ކުރިޔަށް އޮތްތަނުގައި ރާއްޖޭގެ ގާނޫނީ ނިޒާމުގައި މުހިންމު ދައުރެއް އަދާކުރާނެ މަދަނީ އިޖުރާއަތުގެ ގާނޫނު އާންމުންނަށް ކިޔައިދިނުމަށް ތައްޔާރުކުރެއްވި ފޮތެއް ކަމަށެވެ.
"އާންމުންނަށް ވީހާވެސް ކިޔައިދިނުން ހަގީގަތުގަ ބޭނުމަކީ. އާންމުން އަހުލުވެރިކުރުވުން މަދަނީ އިޖުރާއަތުގެ ގާނޫނަށް،" ސުއޫދު ވިދާޅުވި އެވެ.
އެ ފޮތުގައި އެއްބަސްވުންތަކުގެ މައްސަލަތައް ބެލުމުގެ އިހްތިސާސް ލިބިގެންވަނީ ކޮން ކޯޓަކަށްކަމާއި ބޭރު ގައުމެއްގެ ކޯޓަކަށް ހުށަހެޅިފައިވާ މައްްސަލައެއް ރާއްޖޭގެ ކޯޓަކަށް ހުށަހެޅިއްޖެ ނަމަ ދެން އަމަލުކުރަންވީ ގޮތާއި، މަދަނީ މައްސަލަތަކުގައި ދައުވާކުރަން އޮންނަ މުއްދަތާއި ގުޅޭ ގޮތުން މިދިޔަ ޑިސެމްބަރު މަސްތެރޭ ތަސްދީގުކުރި މަދަނީ އިޖުރާއަތުގެ ގާނޫނުގައި ބުނާ ވާހަަކަތައް ތަފްސީލުކޮށް ހިމަނާފައިވެ އެވެ.
އަދި އިހުމާލާއި ފަރުވާކުޑަކުރުމުގެ މައްސަލަތަކާއި މެޑިކަލް ނެގްލިޖެންސްގެ މައްސަލަތަކަށް ވެސް ގާނޫނުގައި އަމަލުކުރަން އޮންނަ ގޮތް ކިޔައިދީފައި ވެ އެވެ. ހަމައެއާއެކު މަދަނީ މައްސަލަތަކުގައި ޣައިރު ހާޒިރުގައި މައްސަލަ ކުރިޔަށްގެންދެވޭނެ ހާލަތްތަކާއި ކުރިޔަށް ނުގެންދެވޭނެ ހާލަތްތައް ފަދަ ކަންކަމަށް ވެސް އެ ފޮތުގައި އަލިއަޅުވާލާފައި ވެ އެވެ. އޭގެ އިތުރުން ވެސް އެ ގާނޫނުގެ ހުރިހާ މުހިންމު ބައެއްހެން އެ ފޮތުގައި ތަފްސީލުކޮށް ފަނޑިޔާރު ސުއޫދު ވަނީ ކިޔައިދެއްވާފަ އެވެ.
ފަނޑިޔާރު ސުއޫދުގެ ފޮތް ހާއްސަކޮށްފައިވާ މަދަނީ އިޖުރާއަތުގެ ގާނޫނަކީ ކޯޓުތަކަށް ހުށަހެޅޭ މަދަނީ މައްސަލަތަކުގައި ޝަރީއަތުގެ ކުރީގެ އިޖުރާއަތުތަކާއި، އެފަދަ މައްސަލަތަކުގެ ޝަރީއަތުގެ މަރުހަލާތައް ހިނގާނެ ގޮތާއި، އެފަދަ މައްސަލަތަކުގެ މައްޗަށް ހެކި ހިނގާނެ ގޮތްތަކާއި، އެފަދަ މައްސަލަތަކާމެދު ގޮތެއް ނިންމުންފަދަ މަދަނީ މައްސަލަތަކުގެ އާންމު އުސޫލުތައް ބަޔާންކުރާ ގާނޫނެވެ.
މަދަނީ އިޖުރާއަތާއި ގުޅޭ ހާއްސަ ފޮތެއް ފަނޑިޔާރު ސުއޫދު ނެރުއްވިއިރު، މީގެ ކުރިން އޭނާ ވަނީ ރާއްޖޭގެ ބިމާބެހޭ ގާނޫނުގެ ފޮތަކާއި، ކުންފުންޏާ ބެހޭ ގާނޫނުގެ ފޮތެއްގެ އިތުރުން ކޮންޓްރެކްޓާއި ޝަރީއަތުގައި ހެކިބަސް ނެގުން އަދި ޓޯޓު ލޯ އާ ގުޅެ ގޮތުން ވެސް ފޮތްތަކެއް ނެރުއްވާފަ އެވެ. އެ ފޮތްތަކަކީ ރާއްޖޭގައި ގާނޫނުކަން ކިޔަވާ ދަރިވަރުން އަދި އެ ފަންނުގެ ގިނަ ބަޔަކު ބޭނުންކުރާ ފޮތްތަކެކެވެ.
