"ދިވެހިރާއްޖޭގެ ޓޯޓްގެ ގާނޫނު" ގެ ނަމުގައި 212 ސަފުހާގެ މުހިންމު އިލްމީ ފޮތެއް ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު އިއްޔެ ނެރުއްވައިފި އެވެ.
ޖުމްލަ 12 ޗެޕްޓަރަކަށް ބަހާލައިގެން ލިޔުއްވާފައިވާ މި ފޮތުގައި ޓޯޓުގެ އާންމު އުސޫލުތަކާއި، އިހުމާލުގެ މަދަނީ ކުށްތަކުގެ އިތުރުން، އަމަލީ ދާއިރާގައި ދިމާވާ ގިނަ ކަންތައްތަކަކަށް ވަނީ ތަފްސީލީ ގޮތެއްގައި އަލިއަޅުވާލާފަ އެވެ.
އެގޮތުން، އަދާކުރަންޖެހޭ ރައްކާތެރިކަމުގެ ވާޖިބުތަކާއި، މީހުންގެ މުދަލަށާއި އިގުތިސާދަށް ދޭ ގެއްލުންތަކުގެ އިތުރުން، އާންމު އުނދަގޫ ނުވަތަ ތުރާލުގެ މައްސަލަތަކާއި، ހުއްދަ ނެތި މީހެއްގެ ތަނަކަށް ވަނުމާއި، އަބުރާ ބެހުމުގެ މައްސަލަތައް މި ފޮތުގައި ބަޔާންކޮށްފައިވެ އެވެ.
މީހެއްގެ ޒާތީ ދިރިއުޅުމުގެ ހައްގުތަކާއި، ޓޯޓުގެ ދާއިރާއިން ދައުލަތުގެ އިދާރާތަކުން އުފުލަންޖެހޭ ޒިންމާތަކާއި، ގެއްލުމުގެ ބަދަލު ހޯދުމުގެ އުސޫލުތައް ވެސް އެ ފޮތުގައި ވަނީ ހިމަނާފަ އެވެ.
ފޮތުގައި ލިޔުއްވާފައިވާ ގޮތުގައި، ޓޯޓަކީ މަދަނީ އިލްތިޒާމުތަކުގެ ގާނޫނުގެ ތެރޭގައި ހިމެނޭ މަދަނީ ގޯސްތަކެވެ. މިއީ ކޮންޓްރެކްޓާ ހިލާފުވުމާއި އަމާނާތްތެރިކަމުގެ ވާޖިބާ ހިލާފުވުން ފަދަ މަދަނީ ގޯސްތަކާ ތަފާތު، ނަމަވެސް ކޯޓު މެދުވެރިކޮށް އެކަމަށް ފަރުވާއެއް ނުވަތަ ބަދަލެއް ލިބޭ ކަންކަމެވެ.
މީގެ ތެރޭގައި މީސްމީހުންގެ ޖިސްމާއި ނަފުސަށް ދޭ އަނިޔާ އާއި، ފަރުވާކުޑަ ނުވަތަ ބެލުމެއް ނެތް އަމަލެއްގެ ސަބަބުން ލިބޭ ގެއްލުމުގެ އިތުރުން، ދައުލަތުގެ މުވައްޒަފުން މަގާމުގެ ބާރު ނަހަމަ ގޮތުގައި ބޭނުންކޮށްގެން ދޭ ގެއްލުންތައް ވެސް ހިމެނެ އެވެ.
މި ފޮތަކީ ރާއްޖޭގެ ގާނޫނީ ނިޒާމުގެ ތެރޭގައި ހިމެނޭ ޓޯޓުގެ އެކި ބާވަތްތަކާއި އެކަންކަމުގައި އަމަލުކުރާނެ ގޮތްތައް ބަޔާންކޮށްދޭ، ގާނޫނީ ދާއިރާގެ ބޭފުޅުންނަށާއި އާންމުންނަށް ވެސް ބޭނުންތެރި މަސައްކަތެކެވެ.
މި ފޮތުގައި ދިވެހިރާއްޖޭގެ ކޯޓުތަކުގައި ހިންގާފައިވާ މިފަދަ މައްސަލަތައް މިސާލުގެ ގޮތުގައި ފާހަގަ ކުރައްވާފައިވެ އެވެ. މީގެ ފޮތެއްގެ އަގަކީ 450ރ. އެވެ.
