ރަޝިއާ ފަހަތަށް ޖައްސާލުމަށްފަހު އަހަރުގެ މިހާތަނަށް އެންމެ ގިނައިން ޓޫރިސްޓުން އަންނަނީ ޔޫކޭ މާކެޓުން ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ކޮވިޑު ބަލިމަޑުކަމުގެ ދުވަސްވަރު ބޯޑަރު އަލުން ހުޅުވާލީއްސުރެ ރާއްޖޭގެ ޓޫރިޒަމް "ޑޮމިނޭޓު" ކުރަމުން ދިޔަ ރަޝިއާ މާކެޓުން އަންނަ ޓޫރިސްޓުންގެ އަދަދުތައް މަދުވީ ރަޝިއާ-ޔޫކްރެއިން ހަނގުރާމައިގެ ސަބަބުންނެވެ. އެކަމަކު ފުރަތަމަ ހީކުރި ވަރުގެ ބޮޑު ލޮޅުމެއް ރަޝިއާ މާކެޓަށް ވެސް ނާންނަކަން ފާހަގަކުރެވެ އެވެ.
ޓޫރިޒަމް މިނިސްޓްރީން އެންމެ ފަހުން އާންމުކުރި ޑެއިލީ އަޕްޑޭޓު ރިޕޯޓު ދައްކާ ގޮތުގައި ޔޫކޭ ނަގާފައި ދެވަނައިގައި އަދިވެސް އޮތީ ރަޝިއާ އެވެ. ތިންވަނައިގައި އިންޑިއާ އޮތް އިރު ގަދަ ފަހެއްގައި ދެން ހިމެނެނީ ޖަރުމަނާއި އިޓަލީ އެވެ.
އެންމެ ގިނައިން ޓޫރިސްޓުން އަންނަ ގައުމުތަކުގެ ލިސްޓުން ފާހަގަކުރެވޭ އަނެއް ކަމަކީ އެ ލިސްޓުން ޔޫކްރެއިން މިހާރު ފެންނަން ނެތުމެވެ. ޔޫކްރެއިންގެ ބަދަލުގައި ގަދަ 10 އެއްގެ ލިސްޓުން ޖާގަ ހޯދީ ސައުދީ އަރަބިއްޔާ އެވެ.
ޓޫރިޒަމްގެ މާޗު މަހުގެ ތަފާސްހިސާބުތައް
- ޓޫރިސްޓުން – 146،905
- ޑެއިލީ އެވަރޭޖު – 4،739
- 2022-2021 އަށް ކުރިއެރުން – 37.9 ޕަސެންޓު
ޖުމްލަކޮށް ބަލާއިރު ރާއްޖޭގެ ޓޫރިޒަމް ސިނާއަތް ފެންނަނީ ވަރުގަދަކޮށެވެ. މަހުންމަހަށް ބަލާއިރު ކުޑަ ވެއްޓުމެއް އައި ނަމަވެސް ދުވާލަކު ރާއްޖެ އަންނަ ޓޫރިސްޓުންގެ އެވަރެޖާއި ޖުމްލަ އަދަދުތައް ވެސް ކުރީ އަހަރަށް ވުރެ ރަނގަޅެވެ.
އަހަރުގެ މިހާތަނަށް 437،587 ޓޫރިސްޓުން ރާއްޖެ އައިސްފައިވާއިރު، މިއީ ވެސް މިދިޔަ އަހަރުގެ މި މުއްދަތާ އަޅާ ބަލާއިރު ބޮޑު ކުރިއެރުމެކެވެ.
ޓޫރިޒަމް މިނިސްޓްރީން އަމާޒުކުރަނީ މި އަހަރުގެ ނިޔަލަށް ދެ މިލިއަން ޓޫރިސްޓުން ގެންނާށެވެ. އެކަމަކު މި އަދަދަށް ޓޫރިސްޓުން އަންނަން މިހާރަށް ވުރެ އެރައިވަލްސް މަތިވާން ޖެހެ އެވެ.
