ހޯމް މިނިސްޓަރު އިމްރާން އަބްދުﷲ އާއި އެޓާނީ ޖެނެރަލް އިބްރާހީމް ރިފްއަތާ ދެބޭފުޅުންގެ ތެރެއިން ކޮންމެވެސް އެއް ބޭފުޅަކު ރައްޔިތުންގެ މަޖިލީހަށް އިތުރުފުޅު ހައްދަވާފައިވާ ކަމަށް ބެލެވޭތީ މަޑުއްވަރީ ދާއިރާގެ ޕީއެެންސީ މެމްބަރު އާދަމް ޝަރީފު މިއަދު މަޖިލީހަށް މައްސަލައެއް ހުށަހަޅުއްވައިފި އެވެ.
މަޖިލީިހުގެ ގަވައިދުގެ 179 ވަނަ މާއްދާގެ ދަށުން އާދަމް ޝަރީފު ހުށަހެޅުއްވި މައްސަަލައިގައި ބުނެފައި އޮތީ، ކޯޓުތަކުގައި މަސްތުވާތަކެތީގެ މައްސަލަތަކުގައި ގަސްތުގައި ގޯސްހަދާ ފުލުހުން އެބަތިބި ކަމަށް އެޓާނީ ޖެނެރަލް އިބްރާހީމް ރިފްއަތު މަޖިލީހުގެ ޖުޑިޝަރީ ކޮމިޓީގައި ވިދާޅުވެފައި ވަނިކޮށް ހޯމް މިނިސްޓަރު އިމްރާން އަބްދުﷲ މަޖިލީހަށް ލިއުމުން ދެއްވި ޖަވާބެއްގައި އެކަން ދޮގުކުރައްވާފައިވާ ކަމަށެވެ.
އެހެންކަމުން އެ މައްސަލައިގަިއ ކޮންމެވެސް އެއް ވަޒީރަކު އިތުރުފުޅު ހައްދަވާފައިވާ ކަމަށް އެ މައްސަލައިގައި ބުނެ އެވެ. އޭގެ ތެެރެއިން އިތުރުފުޅު ހެއްދެވި ވަޒީރަކު ގާނޫނު އަސާސީގެ 98 ވަނަ މާއްދާއާ ހިލާފުވެފައިވާ ކަމަށް ގަބޫލުކުރެވޭތީ، އެކަން ބަލައި ފިޔަވަޅު އަޅަން އާދަމް ޝަރީފު ހުށަހެޅުއްވި މައްސަލައިގައި ގޮވާލާފައިވެ އެވެ.
މަޑުއްވަރީ ދާއިރާގެ މެމްބަރު އާދަމް ޝަރީފު މަޖިލީހުގެ ޖަލްސާއެއްގައި ވާހަކަ ދައްކަވަނީ.
އެ މައްސަލަ މަޖިލީހަށް ބަލައިގަނެ ބަހުސްކުރަން ފާސްކުރީ އެކަމަށް ނެގި ވޯޓުގައި ބައިވެރިވެވަޑައިގެންނެވި 31 މެމްބަރުންގެ ތެރެއިން 18 މެމްބަރަކު ވޯޓު ދެއްވައިގެންނެވެ. އެ މައްސަލަ ބަލައިގަންނަން ނުފެންނަ ކަމަށް ވޯޓުދެއްވީ 13 މެމްބަރެކެވެ. ވަކިކޮޅަކަށް ވޯޓު ނުދެއްވާ މެމްބަރަކު ނެތެވެ.
މަސްތުވާތަކެތީގެ މައްސަލަތަކުގައި ނިޒާމުގެ ތެރޭގައި ހުރި ލޫޕްހޯލްތައް ބޭނުންކޮށްގެން ގަސްތުގައި ގޯސްހަދާ ފަރާތްތައް ފުލުހުންގެ ތެރޭގައި ތިބި ކަމަށް އެޓާނީ ޖެނެރަލް އިބްރާހީމް ރިފްއަތު މިދިޔަ މަހު ވިދާޅުވި ނަމަވެސް, ހޯމް މިނިސްޓަރު އިމްރާން އަބްދުﷲ މިމަހުގެ 14 ވަނަ ދުވަހު މަޖިލީހަށް ލިޔުމުން ދެއްވި ޖަވާބެއްގައި އެވާހަކަ ދޮގުކުރެއްވި އެވެ.
ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި އޭޖީ ދެއްކެވި އެ ވާހަކައާ ގުޅިގެން ލިޔުމުން ޖަވާބު ހޯއްދަވަން މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ކުރެއްވި ސުވާލަކަށް ފޮނުއްވި ޖަވާބުގައި އިމްރާން ވިދާޅުވީ ފުލުހުންނަކީ އެކަށީގެންވާ ތައުލީމާއި ތަމްރީނު ލިބިގެން އިހުލާސްތެރިކަމާ އެކު މަސައްކަތް ކުރާ ގާބިލު ބައެއް ކަަމަށެވެ. އަދި އޭޖީ އެވިދާޅުވި ފަދަ ގޮތަކަށް ގަސްތުގައި ގޯސްހަދާ ބަޔަކު ފުލުުހުންގެ ތެރޭގައި ތިބިކަމަށް ބުނުމަކީ އެންމެ ރަނގަޅުގޮތެއް ނޫން ކަމަށް ވެސް އިމްރާން ވިދާޅުވި އެވެ.
ކޯޓުތަކުގައި މައްސަލަތައް ލަސްވާ މައްސަލައާ ގުޅޭ ގޮތުން ކަމާ ބެހޭ އިދާރާތަކުގެ ވެރިންނާ އެކު ރައްޔިތުންގެ މަޖިލީހުގެ ޖުޑިޝަރީ ކޮމިޓީން 17 ފެބްރުއަރީގައި ބޭއްވި ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ރިފްއަތު ވިދާޅުވީ، ގޯސްހަދާ ފަރާތްތައް ފުލުހުންގެ އިދާރާއާއި ތަހުގީގީ އެހެން އިދާރާތަކުގައި ވެސް އެބަތިބި ކަމަށެވެ. އޭނާ ވިދާޅުވީ އެފަދަ ފަރާތްތަކުން ގޯސް ހަދަނީ ރޭވިގެން އިންތިޒާމްވެގެން ކުރާ ކަމެއްގެ ގޮތުގަ އެވެ.
"ހާއްސަކޮށް މަސްތުވާތަކެތީގެ މައްސަލަތަކުގައި ހަމަ ރޭވިގެން އިންތިޒާމްވެގެން ވެސް އެބަ ތަހުގީގީ އިދާރާތަކުގެ މެދުގައި ނޫނީ ފުލުހުންގެ ތެރޭގައި ނޫނިއްޔާ ދައުލަތުގެ އެހެން ތަންތަނުގައި ވެސް އެބަ ތިބި ހަމަ ގޯސް ހަދާ މީހުން،" ރިފްއަތު އެ ދުވަހު ވިދާޅުވި އެވެ.
