ރައީސް އޮފީހުގެ ލީގަލް އެފެއާޒް މިނިސްޓަރު ކަމުގައި ހުރެ އައިޝަތު އާޒިމާ ޝުކޫރު، އޭރު ވެރިކަމުގައި ހުންނެވި ރައީސް އަބްދުﷲ ޔާމީންއަށް މަނީ ލޯންޑާކުރުމަށް މަގުފަހިކޮށްދިން ކަމަށް ތުހުމަތުވާ މައްސަލައާއި، އެއަމަލާއި ގުޅިގެން ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ ސާބިތުކުރުމަށް ދައުލަތުން ހެއްކެއްގެ ގޮތުގައި އެމަނިކުފާނުގެ ނަން ހުށަހަޅައިފި އެވެ.
ދައުލަތުގެ ބަންޑާރަ ނައިބު ކަމުގެ މަގާމު ވެސް ފުރުއްވި އާޒިމާ ޝުކޫރަށް ކުރާ މި ދައުވާއަށް ތިން އަހަރު ވެގެން ދިޔައިރު، އެކިފަހަރު މަތިން ގާޒީން ބަދަލުވެ، މައްސަލަ މަޑުޖެހިފައި އޮންނަތާ ގިނަ ދުވަަސްތަކެއް ވެފައިވާތީ، އެ މައްސަލައާ އެންމެ ފަހުން ހަވާލުވެވަޑައިގެންނެވި ކްރިމިނަލް ކޯޓުގެ ގާޒީ އަލީ އާދަމް ވަނީ އެ ދައުވާގެ އަޑުއެހުންތައް އަލުން ފަށައިފަ އެވެ.
އެގޮތުން ކްރިމިނަލް ކޯޓުގައި މިއަދު ކުރިއަށް ދިޔަ އަޑުއެހުމުގައި، އާޒިމާއަށް ކުރާ ދައުވާތައް ސާބިތުކުރުމަށް ދައުލަތުން ހެކި ހުށަހަޅާފައިވާއިރު، ދިފާއީ ހެކިވެސް ހުށަހަޅާފައި ވެއެވެ. މަދަނީ މިންގަނޑުން އެ މައްސަލަ ކުރިއަށް ގެންދިއުމަށް ނިންމީ އާޒިމާގެ މައްޗަށް ކުރާ ދެ ދައުވާ ސާބިތު ކުރުމަށް ގިނަ ހެކިތަކެއް ދައުލަތުން ހުށަހަޅާފައިވާތީ ކަމަށް ގާޒީ ވިދާޅުވި އެވެ.
އެ މައްސަލަ ކުރިއަށް ގެންދިއުމަށް ގާޒީ ނިންމެވީ އެ މަރުހަލާގައި، ހެކިތަކުގެ ފުނަށް ދީރާސާ ކުރަން ނުޖެހޭނެ ކަމަށް ވިދާޅުވެެ އެވެ. އަދި އެ ދައުވާ ސާބިތުކުރުމަށް ދައުލަތުން ހުށަހަޅާފައިވާ ހެކިތަކުން، އެފަދަ ކަމެއް ހިނގައިފައިވާކަމަށް ގާޒީއަށް ގަބޫލުކުރެވޭތީ އެވެ.
އެގޮތުން އެމްއެމްޕީއާރުސީގެ ހިޔާނާތް ހިނގިއިރު، އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސްއަކަށް ހުންނެވި މުއައްވިޒު ރަޝީދުއާއި، އެ ކޮމިޝަނުގެ ރައީސްއަކަށް އޭރު ހުންނެވި ހަސަން ލުތުފީވެސް ދައުލަތުން ހުށަހެޅި ހެކިވެރިންގެ ތެރޭގައި ހިމެނެ އެވެ.
އެ ދައުވާތައް ނަފީކުރުމަށް ވަރުގަދަ ދިފާއުތަކެއް، އާޒިމާ ނެންގެވި އެވެ. އަދި މަދަނީ މިންގަނޑާ ގުޅިގެން ގާނޫނީ ބޮޑު ބަހުސެއްވެސް މިއަދު ކޯޓުގައި ހިނގި އެވެ.
ދައުލަތުގެ ތުހުމަތުތަކަށް އާޒިމާ ނެންގެވި ދިފާއުތައް
އާޒިމާ ވިދާޅުވީ ދައުލަތުން އޭނާގެ މައްޗަށް ދައުވާކުރަނީ ދެ ހެއްކެއްގެ މައްޗަށް ބިނާކޮށް ކަމަށެވެ. އެއީ އޭސީސީ އަށް ލަފައެއް ދިނުމާއި ޔާމީންގެ ފައިސާ ޖަމާކުރިކަން އަންގައި ނޯޓެއް ފޮނުވިކަން އޭނާ ފާހަގަކުރި އެވެ.
ދައުވާ ސާބިތުކުރުމަށް ދައުލަތުން ހުށަހެޅި ހެކިތަކާ ގުޅިގެން އާޒިމާ ވިދާޅުވީ އޭނާ އޭސީސީއަށް ލަފައެއް ނުދެއްވާ ކަމަށާއި އެފަދަ އެއްވެސް ހެއްކެއް ވެސް ނެތް ކަމަށެވެ. އަދި އޭނާ ފޮނުއްވި ނޯޓްގައި އެކައުންޓް ނަންބަރު އޮތީ ނުބައިކޮށް ކަމަށާއި، ދައުލަތުން އޭނާގެ މައްޗަށް ދައުވާ އުފުލީ އެކަން އެނގިހުރެ ކަމަށެވެ.
"އަޅުގަނޑު ލިޔެފައި މި އޮތް ނޯޓްގައި އެސްކްރޯ އެކައުންޓްގައި ބެހެއްޓުމަށް ވެފައިވާ އެއްބަސްވުމާ އެއްގޮތަށް ބޭންކް އޮފް މޯލްޑިވްސްގައި ހުޅުވާފައިވާ ނަންބަރު އެކައުންޓަށް ފައިސާ ޖަމާކުރި ވާހަކަ ދެންނެވީމޭ ކިޔާފައި، އަޅުގަނޑު ސޮއިކުރި އިރު މި ނޯޓްގައި މި އޮތީކީ ބީއެމްއެލްގެ، ދައުލަތުން އެ ވިދާޅުވާ އެކައުންޓް ނަންބަރެއް ނޫން."
އާޒިމާ ވިދާޅުވި ގޮތުގައި އޭރު އޭނާއަކީ ދައުލަތުގެ ވަޒީރެއްކަމުން ނޯޓެއް ފޮނުވަން އޭނާއަށް އެންގުމުން އެކަން ކުރުމަށް ބުނާނީ އެހެން މުވައްޒަފުން ގާތުގަ އެވެ. އެ ސިޓީ ލިޔެގެން ގެނައި އޭގައި އޮތް ކުށެއް ފާހަގަނުކުރެވި ސޮއިކުރެވުނުކަމަށް އޭނާ ވިދާޅުވި އެވެ.
އަދި އެއީ ލިޔުމުގެ ކުށެއްކަން ދައުލަތަށްވެސް އެނގޭ ކަމަށާއި، ޝަރީއަތަށް އެ ލިޔުން ހުށަހެޅިއިރުވެސް އެ އެކައުންޓް ނަމްބަރުގެ ތިރީގައި ރޮނގުދަމާފައިވާކަން އޭނާ ފާހަގަކުރި އެވެ.
"އަޅުގަނޑަކީ އޭސީސީއަށް ލަފާ ދޭން ހުރި މީހެއް ވެސް ނޫން. އަޅުގަނޑަކީ ރައީސުލްޖުމްހޫރިއްޔާގެ އޮފީހުގެ އިސް ލީގަލް އޮފިސަރު،" އޭސީސީއަށް ލަފާދިން ކަމަށް ބުނެ ދައުލަތުން ހުށަހަޅާފައިވާ ހެއްކާ ގުޅިގެން އާޒިމާ ވިދާޅުވި އެވެ.
ކުރީގެ ރައީސް ޔާމީންއަށް މަނީ ލޯންޑާކުރަން މަގުފަހިކޮށްދިން ކަމަށް ބުނެ އުފުލާފައިވާ ދައުވާއާ ގުޅިގެން އާޒިމާގެ ދިފާއަކަށް ނެންގެވީ އެމްއެމްޕީއާރުސީގެ ހިޔާނާތާ ގުޅިގެން ޔާމީންގެ މައްޗަށް އުފުލާފައިވާ ގއ. ވޮޑަމުލާގެ މައްސަލަ ސާބިތު ނުވާ ކަމަށް މިދިޔަ އަހަރުގެ ނޮވެމްބަރު މަހު ސުޕްރީމް ކޯޓުން ނިންމާފައިވާ ކަމެވެ. އެހުކުމް އޮތްހާ ހިނދަކު އެނާގެ މައްޗަށް އެ ދައުވާތައް ކުރެވިދާނެ ކަމުގައި އާޒިމާ ގަބޫލުނުކުރައްވަ އެވެ.
"ޔާމީންގެ މައްސަލަ ތިން މަރުހަލާގައި ކުރިއަށް ދިޔައިރުވެސް، އަޅުގަނޑުގެ ވާހަކަ ދައުލަތުން އެއްވެސް މަރުހަލާއެއްގައި ފާހަގަކޮށްފައި ނުވޭ،" ސުޕްރިމް ކޯޓުގެ ނިންމުން އޮއްވާ އޭނާގެ މައްޗަށް ކުށް ސާބިތު ނުވާނެ ކަމަށް ފާހަގަކުރައްވަމުން އާޒިމާ ވިދާޅުވި އެވެ.
"ސުޕްރިމް ކޯޓުގެ ނިންމުން ދެމިއޮތްހާ ހިނދަކު އަޅުގަނޑުގެ މައްޗަށް ދައުވާ ސާބިތުނުވާނެ."
