މާލޭގެ ގެއެއް ބަލައި ފާސްްކޮށް، 42 ކިލޯއަށްވުރެ ގިނަ މަސްތުވާތަކެތި ހޯދި މައްސަލައިގައި ފުލުހުން ހައްޔަރުކޮށްފައިވާ ޕީޕަލްސް ނެޝަނަލް ކޮންގްރެސް ޕާޓީގެ ކައުންސިލް މެމްބަރު އަހުމަދު ހުސެއިން އެ ޕާޓީން ވަކިކޮށްފި އެވެ.
ފުލުހުން ހިންގި އޮޕަރޭޝަނެއްގައި އެ މަސްތުވާތަކެތި ހޯދާފައި ވަނީ ބުރާސްފަތި ދުވަހުގެ ރޭ އެވެ. އެ ތަކެތި ހޯދާފައި ވަނީ މ. ލަވްނެސްޓްގެ ތަޅުންގަނޑުގެ އަޑީގައި ކޮނެފައި ހުރި ކުޑަ ވަޅެއްގެ ތެރޭގަ އެވެ.
އަހުމަދު ހައްޔަރު ކޮށްފައި ވަނީ ރޭގަ އެވެ.
ޕީއެންސީން މިއަދު ނެރުނު ބަޔާނެއްގައި ބުނީ އެ ޕާޓީގެ ކައުންސިލް މެމްބަރެއްގެ ގޮތުގައި ހުރި އަހުމަދުގެ މައްޗަށް ކުރެވޭ ތުހުމަތެއްގައި އޭނާ ހައްޔަރުކޮށްފައިވާ ކަމުގެ މައުލޫމާތު ލިބިފައިވާ ކަމަށެވެ.
"އަހުމަދަށް ތުހުމަތުކުރާ މައްސަލަ ބެލުމަށްފަހު ޕާޓީގެ އަސާސީ ގަވާއިދުގައިވާ ގޮތުގެ މަތިން އޭނާ ޕާޓީގެ ކައުންސިލް މެމްބަރު ކަމުން ވަކި ކޮށް، އާންމު މެންބަރެއްގެ ގޮތުގައިވެސް ޕާޓީގެ އެއްވެސް ހަރަކާތެއްގައި ބައިވެރި ނުވެވޭ ގޮތަށް ސަސްޕެންޑް ކޮށްފައި،" އެ ޕާޓީން ބުންޏެވެ.
އެ ޕާޓީން ބުނިގޮތުގައި، ޕީއެންސީގެ ސިޔާސަތުތަކާ ހިލާފުވެ، ގާނޫނާ ހިލާފު ބޮޑެތި ކުށްތަކަށް އަރައިގަންނަ މެންބަރުންނާ މެދު ފިޔަވަޅު އެޅުމުގެ ބާރު އެ ޕާޓީއަށް ލިބިފައިވުމާއެކު، އަހްމަދު ހުސައިންގެ މައްޗަށް ދައުވާ ކުރުމަށް ނިންމާފައިވަނީ މީގެ ކުރިންވެސް އެފަދަ މައްސަލަތަކުގައި އަމަލުކުރާ ގޮތަށް ބެލުމަށް ފަހުގަ އެވެ.
"ހަމައެއާއެކު އަހްމަދު ހުސައިންގެ މައްޗަށް ކުރެވިފައިވާ ތުހުމަތުގެ މައްސަލަ ބަލައި ގާނޫނުގައިވާ ގޮތުގެ މަތިން ފިޔަވަޅު އެޅުން އަވަސް ކުރުމަށް ކަމާ ބެހޭ އެންމެހާ މުއައްސަސާތަކަށްވެސް ގޮވާލަމެވެ," ޕީއެންސީގެ ބަޔާނުގައިވެ އެވެ.
އަހްމަދު ހުސައިންގެ އިތުރުން، އެ މައްސަލާގައި އިތުރު މީހަކު ހައްޔަރުކޮށްފައިވީ ނަމަވެސް، އޭނާގެ ވަނަވަރެއް ފުލުހުން އާންމު ނުކުރެ އެވެ.
މަސްތުވާތަކެތީގެ މައްސަލައެއްގައި ޕީއެންސީގެ ކައުންސިލް މެންބަރެއް މީގެ ކުރިންވެސް ވަނީ ހައްޔަރު ކޮށްފަ އެވެ. އެ ޕާޓީއަށް ނިސްބަތްވާ ޝަހީބް އިބްރާހިމް މަސްތުވާތަކެތީގެ މައްސަލައެއްގައި ހައްޔަރުކޮށްފައިވާތީ ޕީއެންސީގެ ކައުންސިލް މެންބަރު ކަމުން އޭނާ ވެސް ވަނީ ސަސްޕެންޑްކޮށްފަ އެވެ.
