ވެރިރަށް މާލޭގެ މާފަންނުކޮޅުގައި ހުރި ގެއެއްގެ ތަޅުންގަނޑުގައި ވަޅުލާފައި ހުރި 50 ކިލޯއަށްވުރެ ގިނަ މަސްތުވާތަކެތި ފުލުހުން ހޯދައިފި އެވެ.
ފުލުހުންގެ ކުޑަކުދިންގެ މައްސަލަތައް ބަލާ ޔުނިޓުގެ ކުރިމަތީގައި ހުރި ދެ ބުރިއަށް ހަދާފައި ފަޅަށް ހުރި އެ ގެއަށް ކޯޓު އަމުރަކާއެކު ފުލުހުން ވަނީ ރޭ ދަންވަރު 3:00 ޖަހާކަންހާއިރެވެ. ފުލުހުންގެ ބެލުމުގެ ދަށުން ތަން ދޫކޮށްލީ ހެނދުނު 7:30 ކަންހާއިރެވެ.
އެ ގެ ހަދާފައި ހުރީ ވަރަށް އާދައިގެ ގޮތަކަށެވެ. ލަފާ ކުރެވޭ ގޮތުން މީހުން ދިރިނުއުޅޭތާ އަހަރުތަކެއްވެދާނެ އެވެ. ގޭގެ ބައެއް ފަރުނީޗަރާއި ކައްކާ ގެންގުޅޭ ސާމާނު ހުރި ނަމަވެސް އެތަކެތި ބޭނުންކޮށްފައި ހުރިހެން ހިއެއް ނުވެ އެވެ.
މަސްތުވާތަކެތި ހޯދި ގޭގެ ދެ ވަނަ ބުރި ހުރު ގޮތް: ފުލުހުން ވަނީ މުޅި އިމާރާތް ވަރަށް ރަނގަޅަށް ބަލައި ފާސްކޮށްފައި -- ފޮޓޯ: ހުސެއިން ފިޔާޒް މޫސާ
އެކަމާ ގުޅޭ މައުލޫމާތު ފުލުހުންގެ މީޑިއާ ޑިޕާޓްމަންޓުން އަދި ހާމައެއްނުކުރެ އެވެ. ނަމަވެސް މައުލޫމާތު އެނގޭ މީހަކު ނޫހުގައި ނަން ނުޖެހުމަށް ޝަރުތުކޮށް ބުނީ އެ ގެއިން ވަރަށް ގިނަ އަދަދެއްގެ މަސްތުވާތަކެތި ފެނުނު ކަމަށާއި އެ ހުރިހާ އެއްޗެހީގެ ބަރުދަން 50 ކިލޯއަށްވުރެ އިތުރުވާނެ ކަމަށެވެ.
ފުލުހުން ވަނީ ވެއެެތުވެދިޔަ ތިން އަހަރުގެ ތެރޭގައި ވަރަށް ގިނަ އަދަދެއްގެ މަސްތުވާތަކެތި އަތުލައި ޑްރަގް ނެޓްވޯކް ހިންގާ ބޮޑެތި ވަރަށް ގިނަ މީހުން ހައްޔަރުކޮށްފަ އެވެ. ނަމަވެސް އޭގެ ތެރެއިން ވަރަށް ގިނަ "ބޮޑުން" ވަނީ އެކި ސަބަބުތަކާހުރެ މިނިވަންވެފަ އެވެ.
ރާއްޖޭގައި މަސްތުވާތަކެތި ބޭނުން ކުރާ 7،496 މީހުން ދިރިއުޅޭ ކަމަށް މީގެ 2011 ވަނަ އަހަރު އދ. ގެ އޮފީހަކުން ކުރި ދިރާސާއަކުން ދައްކަ އެވެ. އޭގެ 10 އަހަރު ފަހުން މިހާރު އަދަދުތައް އިތުރުވެފައިވާނެ ކަމަށް ބެލެވުނު ނަމަވެސް އެކަމަށް ހަދާފައިވާ ފަހުގެ ދިރާސާއެއް ނެތެވެ.
