ވައްކަމުގެ ތުހުމަތު ކުރެވޭ މީހަކު ފަހާ ދުވެގެން ހިފާ ހައްޔަރުކުރި ޕޮލިސް ސާޖަންޓު މުއްސަދު އަސްލަމާ ބައްދަލުކޮށް އޭނާގެ މަސައްކަތަށް ޕޮލިސް ކޮމިޝަނަރު މުހައްމަދު ހަމީދު ތައުރީފު ކުރައްވައިފި އެވެ.
ސާޖަންޓު މުއްސަދަކީ ސޯޝަލް މީޑީއާގައި ވައިރަލް ވެގެން އުޅޭ ވީޑިއޯއެއްގައި ފިލަން ދުވި މީހަކު ހައްޔަރުކުރަން އޭނާ ފަހާ ދުވެ، އެކަން ކާމިޔާބުކުރާ ފުލުސް މީހާ އެވެ.
މިއީ މަދު ފަހަރެއްގައި ނޫނީ ފުލުހުންގެ ކިބައިން ނުފެންނަ ކަމެއް ކަމަށް ބުނެ އާންމުންގެ ގިނަ ބަޔަކު ވެސް އަންނަނީ އޭނާގެ ހިތްވަރަށް ތައުރީފު ކުރަމުންނެވެ.
މުއްސަދާ އެކީ ބޭއްވި ބައްދަލުވުމަށް ފަހު ހަމީދު ކުރެއްވި ޓްވީޓެއްގައި ވިދާޅުވީ ޒިންމާ އަދާކުރަން އޭނާ ކުރި މަސައްކަތުގެ އަގުވަޒަންކުރި ކަމަށެެވެ. އަދި ވިދާޅުވީ، އޭނާއާ މެދު ފަހުރުވެރިވާ ކަމަށެވެ.
ޓްވީޓުގައި ހަމީދު އިތުރަށް ލިޔުއްވާފައި ވަނީ އާންމުންނަށް ހިދުމަތް ކޮށްދޭން މި ނޫނަސް ގިނަ ފުލުހުން އާދަޔާ ހިލާފު މަސައްކަތްތަކެއް ކުރާ ކަމަށެވެ.
މީގެ ސަބަބެއް ކަމަށް ހަމީދު ވިދާޅުވީ މިފަހުން ފްރަންޓުލައިން ޕޮލިސިން މޮޑެލްއަށް ގެނައި ބަދަލުތަކެވެ. އަދި މި ބަދަލުތަކުގެ ރަނގަޅު ނަތީޖާ ފެންނަމުންދާ ކަމަށް އޭނާ ފާހަގަކުރެއްވި އެވެ.
ދައުރުވަމުންދާ ވީޑިއޯގައި ފެންނަނީ މިދިޔަ ހޯމަ ދުވަހުގެ މެންދުރު 12:30 ހާއިރު ޗާންދަނީ މަގުގައި ފުލުހުން ޕެޓްރޯލް ކުރަމުން ދިޔައިރު، ވަގަށް ނަގާފައިވާ ކަމަށް ޝައްކުކުރެވޭ ފޮށިގަނޑެއް ހިފައިގެން އުޅުނު ދިވެހި ފިރިހެނަކު ފެނިގެން އޭނަ ގާތުގައި މަޑުކުރަން ބުނުމުން، މަޑު ނުކޮށް ދުއްވައިގަތުމުން އޭނާ ހިފަހައްޓަން މުއްސަދު ފަހާ ދުވެ އޭނާ އަތުލާ މަންޒަރެވެ.
އެ މައްސަލަ މިހާރު ފުލުހުން ދަނީ ތަހުގީގު ކުރަމުންނެވެ.
