ހުޅުމާލޭ ފުރަތަމަ ފިޔަވަހި (ފޭސް 1) ގެ ބައެއް ސަަރަހައްދުތަކުން ގަޑިއެއްހާއިރު ވަންދެން މިއަދު ހަވީރު ކަރަންޓު ކެނޑިއްޖެ ެވެ.
ކަރަންޓު ކެނޑުނުކަން ކަށަވަރުކޮށްދެމުން ސްޓެލްކޯއިން ބުނީ ކަރަންޓު ކެނޑުނީ ދިމާވި ޓެކްނިކަލް މައްސަލައަކާ ގުޅިގެން ކަމަށެވެ. އެ ކުންފުނިން ވަނި ކަރަންޓު ކެނޑުނު ހުރިހާ ސަރަހައްދަކަށް ކަރަންޓު ފޯރުކޮށްދީފައިވާ ކަމަށް ބުނެފަ އެވެ.
މި ފަހަކަށް އައިސް މާލޭ ސަރަހައްދުން ދޭތެރެއަކުން ކަރަންޓު ކެނޑޭ މައްސަލަތައް ގިނަ އެވެ. މި މަހުގެ 16 ގައި ވެސް މާލެ އާއި ހުޅުމާލޭގެ ދެ ފިޔަވަހި ހިމެނޭހެން ބޮޑު ސަރަހައްދަކުން ކަރަންޓު ކެނޑުނެވެ.
ސްޓެލްކޯއިން ބުނާ ގޮތުގައި އާންމުކޮށް މި ކަހަލަ މައްސަލަތައް ދިމާ ވަނީ ކޮންމެ ވެސް މަސައްކަތެއް ކުރަން ކޮނުމުގެ ތެރޭގައި ކޭބަލްއަކަށް ގެއްލުމެއް ލިބިގެން ނޫނީ ޓްރާންސްފޯމަރަކަށް ކޮންމެ ވެސް ކަމެއް ދިމާވެގެންނެވެ.
މިހެން ނަމަވެސް، މިދިޔަ އަހަރުގެ ޖޫންގައި މުޅި މާލެ، ހުޅުމާލެ އަދި ހުޅުލެއިން އެއްފަހަރާ ކަރަންޓު ކެނޑުނެވެ.
އެ ފަހަރު ކަރަންޓު ކެނޑުނު ސަރަހައްދުތަކަށް އެ ދުވަހު ކަރަންޓު ދެވުނީ ގާތްގަނޑަކަށް ފަސް ގަޑިއިރު ފަހުންނެވެ. ސްކޫލްތަކުގެ ކިޔެވުން ވެސް އެ ދުވަހު ބަންދު ކުރި އެވެ. އަދި ވަރަށް ގިނަ ވިޔަފާރިތައް ވެސް އެ ދުވަހު މެދުކަނޑައިލި އެވެ.
މި މައްސަލަ ޖިނާއީ މައްސަލައެއްގެ ގޮތުގައި ތަހުގީގުކުރަން ބުނި ނަމަވެސް، އެ ފަހުން ތަހުގީގެ މައުލޫމާތެއް ނުދެ އެވެ. މިހާރު އެ މައްަސަލަ ތަހުގީގުކުރާ ކަމެއް ވެސް ކަށަވަރެއް ނޫނެވެ.
މާލެ ސަރަހައްދުގެ އިތުރުން ދެން އެންމެ އާބާދީ ބޮޑު އައްޑޫ ސިޓީގައި މި މައްސަލަ މާ ގޯހެވެ. އަދި، ބައެއް ރަށްރަށުގައި ވެސް މި މައްސަލަ ދިމާވެ އެވެ.
