ރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން އެ ކެމިކަލްތައް ވިއްކުމަށް "ކެމިކަލް ވިއްކުމުގެ ހުއްދަ" ނެގުމަށާއި ނުރައްކާތެރި ކެމިކަލް ވިއްކުމަށްޓަކައި އެ ކެމިކަލްތައް ސްޓޯކުރާ ނުވަތަ ބަހައްޓާ ތަންތަން މަކުޑި ޕޯޓަލް ގައި ރަޖިސްޓްރީކުރުމަށް އިތުރު ފުރުސަތެއް ދީފި އެވެ.
ޑިފެންސް މިނިސްޓްރީން ބުނީ ކެމިކަލް ވިއްކުމުގެ ހުއްދަ ނެގުމަށާއި ކެމިކަލް ސްޓޯކުރާ ތަން މަކުޑި ޕޯޓަލްގައި ރަޖިސްޓްރީކުރަން ދިން މުއްދަތު ހަމަވިއިރު ހުއްދަ ނަގައި ރަޖިސްޓްރީތައް ހަދާފައިވަނީ މަދު ކުންފުނިތަކުންކަން ފާހަގަކުރެވިފައިވާ ކަމަށެވެ.
މިގޮތުން ރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން ކެމިކަލް ވިއްކުމުގެ ހުއްދަ ނެގުމަަށާއި އެ ކެމިކަލްތައް ވިއްކުމަށް ސްޓޯކުރާ ތަންތަން މަކުޑި ޕޯޓަލްގައި ރަޖިސްޓްރީކުރުމުގެ މުއްދަތު މިއަދުން ފެށިގެން އެއް މަސް ދުވަހަށް އިތުރުކުރެވިފައިވާ ކަމަށް މިނިސްޓްރީން ބުންޏެވެ.
މީގެއިތުރުން މިނިސްޓްރީން ބުނީ އެއް މަސް ދުވަހުގެ ތެރޭގައި ރަޖިސްޓްރީ ނުކޮށް ކެމިކަލް ވިއްކަމުންދާ ފަރާތްތަކާމެދު ނުރައްކާތެރި ކެމިކަލާ ބެހޭ ގަވާއިދުގެ ދަށުން ފިޔަވަޅު އަޅައި، އެ ފަރާތްތަކަށް ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ އިތުރަށް ދެވެން ނޯންނާނެ ކަމަށެވެ.
ނުރައްކާތެރި ކެމިކަލް އެތެރެކޮށް ގެންގުޅުމާއި ގުދަން ކުރުމުގައި އަމަލު ކުރަން ރާއްޖޭގައި ހެދިފައިވާ ގާނޫނުތަކާއި ގަވާއިދުތަކަށް އަމަލުލކުރޭތޯ ބަލައި މީހުން ހޭލުންތެރި ކުރަން، ހާއްސަ މަސައްކަތްތަކެއް ޑިފެންސް މިނިސްޓްރީން ކުރިއަށް ގެންދެ އެވެ.
ނުރައްކާތެރި ކެމިކަލް ގެންގުޅޭ ފަރާތްތަކުން ގަވާއިދާ އެއްގޮތަށް އަމަލުކުރޭތޯ ބެލުމަށްޓަކައި، ވުޒާރާއަށް ފެނިއްޖެ ހިނދެއްގައި ގާނޫނުގެ ދަށުން މިނިސްޓްރީއަށް ލިބެ އެވެ.
