ސަރުކާރުން ގޭންގުތަކުގައި އުޅުނު މީހުންނަށް ދިން ޗޮއިސްއާ އެކީ އޭގެ ތެރެއިން ގިނަ މީހުން މިހާރު އުޅެނީ ވިޔަފާރީގައި ނުވަތަ ވަޒީފާތަކުގައި ކަމަށް ހޯމް މިނިސްޓަރު އަލީ އިހުސާން ރޭ ވިދާޅުވެއްޖެ އެވެ.
ރައީސް އޮފީހުން ބޭއްވި "އަހާ ފޯރަމް" ގައި އިހުސާން ވިދާޅުވީ ސަރުކާރުން ގޭންގުތަކަށް ދިން ޗޮއިސްއަކީ ވަޒީފާތަކަށް ގޮސް ވިޔަފާރީގައި އުޅުމަށް ކަމަށްވާއިރު، އޭގެ ތެރެއިން ގިނަ މީހުން އެ މަގު ހިޔާރުކޮށްގެން ރަނގަލަށް އުޅެމުންދާ ކަމަށެވެ.
"އެމީހުންނަށް އަޅުގަނޑުމެން ދީފައި ވާނެ ޗޮއިސްއެއް. އެ ޗޮއިސްއަކީ ހިނގާށޭ، ޒުވާން ކުދިންނޭ ތިއީ. އެހެންވީމަ ކުރިމަގު އަދި އެބައޮތެއް ނުންހެއްޔޭ. މިކަމުން ދުރުހެލިވެ ރަނގަޅު ގޮތުގައި ދިވެހިރާއްޖެއަށް ފައިދާހުރި ގޮތުގައި ވިޔަފާރިތަކުގައި އުޅެ، ވަޒީފާތަކަށް ދާން އެ ފުރުސަތު މިހާރު ދީފައި އޮންނާނީ. އުފާލާއެކު އަޅުގަނޑުމެން ފާހަގަކޮށްލާ ކަމަކީ އޭގެ ތެރެއިން ވަރަށް ގިނަ ކުދިން ހިޔާރުކުރީ އެ މަގު،" މިނިސްޓަރު އިހުސާން ރޭ ވިދާޅުވި އެވެ.
މި ސަރުކާރުން ވެރިކަމާ ހަވާލުވުމަށްފަހު 52 ގޭންގް އޮޕަރޭޝަން ހިންގައި، 10،000 މީހުން ބަލައި ފާސްކޮށް، 517 މީހުން ހައްޔަރުކުރި ކަމަށް އިހުސާން ވިދާޅުވި އެވެ. އޭނާ ވިދާޅުވީ އެމީހުންނާ ގުޅޭ 700 އަށްވުރެ ގިނަ ސައިކަލުވެސް ޓޯކުރި ކަމަށެވެ.
އިހުސާން ވިދާޅުވީ ސަރުކާރުން ކުރަމުންދިޔަ މަސައްކަތާއެކު ކުރިން ފަލަ ސުރުހީތަކަށް އަރަމުންދާ މާރާމާރީގެ ހަބަރުތައް ވަރަށް ބޮޑުތަނުން ކުޑަ ކުރެވިފައިވާ ކަމަށާއި މި ސަރުކާރުގައި މިހާތަނަށް ގޭންގް މާރާމާރީއެއްގައި އެއްވެސް މީހެއްގެ ފުރާނަވެސް ގެއްލިފައި ނުވާ ކަމަށެވެ.
"ކުރީގައި މިކަމުގެ ތެރޭގައި އުޅުނު ޒުވާނުންވެސް ވަރަށް ބޮޑަށް އެކަމަށް އަޅުގަނޑުމެން ދިން ނަސޭހަތާއި އަޅުގަނޑުމެން މި ގައިޑުކޮށްދޭ ދިނުން ވަރަށް ބޮޑަށް ގަބޫލުކޮށްގެން އެކުދިންވެސް މީގެއިން ދުރުވާން ވަރަށް ބޮޑަށް މަސައްކަތްކުރޭ. އެހެންވީމަ ކުރިއަށް އޮތްތާގައިވެސް މިގޮތުގައި މިކަން ދާނެ ކަމަށް އަޅުގަނޑު އުންމީދުކުރަން،" އިހުސާން ވިދާޅުވި އެވެ.
މީގެއިތުރުން ކުޑަކުދިން ބޭނުންކޮށްގެން ހިންގާ ކުށްތައް ހުއްޓުވުމަށްވެސް އެކި މަސައްކަތްތައްކޮށް، އެފަދަ ކުދިން ކުށުގެ ވެށިން ނަގައި އާއިލާތަކާ ހަވާލުކޮށްފައިވާ ކަމަށްވެސް އިހުސާން ވިދާޅުވި އެވެ.
ގޭންގު ކުށްތައް ހުއްޓުވުމަށްޓަކައި އަމަލު ކުރަން ފެށި އާ ގާނޫނުގެ ސަބަބުން ޒުވާނުން ކުށް ކުރާ ގޭންގުތަކާ ދުރުވަމުން އަންނަ ކަމަށް ރައީސް މުހައްމަދު މުއިއްޒު މިދިޔަ ފެބްރުއަރީ މަހު ވިދާޅުވި އެވެ. ނަމަވެސް ޑިސެމްބަރު، 2025، ގައި މުއިއްޒު ވިދާޅުވީ ގޭންގުގެ ގޮތުގައި ކަނޑައަޅާނެ ބަޔަކު މިހާރު ރާއްޖޭގައި ނުއުޅޭ ކަމަށެވެ.
