ސިޔާސީ ޕާޓީތަކުގެ މެމްބަރުންނަށް ނޭނގި ޕާޓީ ބަދަލުވާ މައްސަލައަށް ހައްލެއް ގެނައުމަށް އިލެކްޝަންސް ކޮމިޝަން (އީސީ) އިން މަސައްކަތްކުރަމުންދާ ކަމަށް އެ ކޮމިޝަނުން ބުނެފި އެވެ.
އީސީގެ ރައީސް ފުއާދު ތައުފީގް ވިދާޅުވީ ޕާޓީތަކުގައި ތިބޭ މެމްބަރުންނަށް ނޭނގި އެހެން ޕާޓީތަކަށް ވައްދާ މައްސަލަ ދޭތެރެދޭތެރެއިން ފެންމަތިވާތީ އެކަމަށް ހައްލެއް ގެނައުމަށް އީސީން މަޝްވަރާކުރަމުންދާ ކަމަށެވެ.
"އެގޮތުން މިހާރު، ޕާޓީ ބަދަލުކުރަން ފޯމު ހުށަހެޅީމަ ވެބްސައިޓުގަ އެ ބޭފުޅެއްގެ ނަން ވަކި މުއްދަތަކަށް ފެންނަން ހުރީމަ، އެ މުއްދަތުގެ ތެރޭގައި ޝަކުވާ ހުށަހަޅަން ފުރުސަތު ދެވޭނެ އެބޭފުޅުންނަށް. އޭރުން އެއްވެސް ޝަކުވާއެއް އޮތްނަމަ އެ ޝަކުވާއެއް ހުށަހެޅޭނެ. އެކަހަލަ ކަންކަމަށް އަދި މަޝްވަރާ ކުރަނީ. އެކަމަކު ގޮތެއް ނުނިންމަން،" ފުއާދު ވިދާޅުވި އެވެ.
ފުއާދު ވިދާޅުވީ މެމްބަރުންނަށް ނޭނގި ޕާޓީ ބަދަލުވާ މައްސަލައަކީ ހައްލެއް ގެނައުމަށް ދަތި މައްސަލައެއް ކަމަށެވެ. އެއީ އަސްލު ފޯމެއްތޯ ނުވަތަ ވަގު ފޯމެެއްކަން ކަށަވަރުކުރަން ދަތިތަކެއް ހުރުމުން ކަމަށް ފުއާދު ވިދާޅުވި އެވެ. ފުއާދު ވިދާޅުވީ ފޯމު ހުށަހެޅުމުން އީސީން ގުޅައިގެން ވެސް ޗެކްކުރާ ކަމަށެވެ.
"އެއީ ފިންގަޕްރިންޓް ޖަހާފަ ހުއްޓަސް ކަށަވަރު ކުރެވޭކަށް ނޯވޭ. ދެން ހުރެދާނެ އެ ފޯމުގަ އެހެން ވަގު ފޯނު ނަމްބަރެއް ވެސް. އަޅުގަނޑުމެން ގުޅާއިރަށް އެހެން މީހަކު ފޯނު ނަގާފަ ބުނެފާނެ، މިއީ އެ ފޯމުގަ ނަން ޖަހާފަ ހުރި މީހާއޭ. އެހެންވީމަ ވަރަށް އުނދަގޫ ސިސްޓަމެއް މި އިންނަނީ އަދި،" ފުއާދު ވިދާޅުވި އެވެ.
ފުއާދު މިހެން ވިދާޅުވިއިރު، މޯލްޑިވްސް ރިފޯމް މޫވްމެންޓު (އެމްއާރުއެމް) ގައި ތިބި 800 އެއްހާ މީހުން، އެމީހުންނަށް ނޭނގި އެހެން ޕާޓީއަކަށް ބަދަލުކުރިކަމަށް އެޕާޓީން ވަނީ އިއްޔެ ބުނެފަ އެވެ. އަދި އެއީ ކިހިނެތް ހިނގައިދިޔަކަމެއް އީސީއަށް ވެސް އެމްއާރުއެމްއަށް ވެސް ހޯދިފައެއް ނުވެ އެވެ.
titledesc
މިދިޔަ އަހަރު ހަތް ސިޔާސީ ޕާޓީއަކަށް ވަނުމަށް ޖުމްލަ 52،841 ފޯމް އިލެކްޝަނަށް ހުށަހެޅި އެވެ.
