ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީ އަދި އޭނާގެ އާއިލާގެ ބައެއް މެންބަރުންގެ ހިއްސާ އޮންނަ ކުންފުންޏަކުން އާންމުންގެ އަތުން ފައިސާ ނަގައިގެން ހިންގަމުންދިޔަ ސްކީމުގައި، މަކަރުން ފައިސާ ހޯދާ ޕޮންޒީ ސްކީމާ ވައްތަރު ކަންކަން ހުރުމުން ތަހުގީގު ކުރަން ފަށާފައިވާ ކަމަށް ފުލުހުން މިރޭ ބުނެފި އެވެ.
ވަކި ކުންފުންޏެއްގެ ނަން ނުބުނެ، ކިންގްސް ކެޕިޓަލް ހޯލްޑިންގުން ހިންގި ސްކީމުގެ ވާހަކައަށް ނިސްބަތްކޮށް ފުލުހުން ނެރުނު ބަޔާނުގައި ބުނެފައި އޮތީ، އެކަން ކުރަމުންދިޔައީ "ގިނަ އަދަދެއްގެ ރައްޔިތުންގެ މާލީ މަސްލަހަތަށް ބުރޫއަރާ ގޮތަށް" ކަމަށް ކަމާބެހޭ އިދާރާތަކުން ބުނެފައިވާ ކަމަށެވެ.
"ދިވެހިރާއްޖޭގައި އަމިއްލަ ކުންފުންޏަކުން ގިނަ އަދަދެއްގެ ރައްޔިތުންގެ މާލީ މަސްލަހަތަށް ބުރޫއަރާ ގޮތަށް ޕޮންޒީ ސްކީމަކާ އެއްގޮތްވާގޮތަށް މުއާމަލާތުތަކެއް ހިންގަމުންދާ ކަމަށް ކަމާބެހޭ އިދާރާތަކުން ފުލުހުންގެ ސަމާލު ކަމަށް ގެނެސްފައިވޭ،" އެ ނޫސްބަޔާނުގައި ބުނެފައިވެ އެވެ.
އަލްހާނުގެ ކުންފުނިން އާންމުންގެ އަތުން ނަގާފައި ވަނީ ކިހާ އަދަދެއްގެ ފައިސާކަން ބުނެފައެއް ނުވެ އެވެ. އެ ސްކީމް އިސްތިހާރު ކުރަމުންދިޔައީ އިންވެސްޓަރުންނަށް އާދަޔާ ހިލާފް ބޮޑެތި ރިޓާން ލިބޭނެ ކަމަށް ވައުދުވަމުންނެވެ. އެ މައްސަލައިގައި ކިންގްސް ފޮރެކްސްގެ ބޭންކް އެކައުންޓު ވެސް އޮތީ ފްރީޒްކޮށްފަ އެވެ.
ކިންގްސްގެ މައްސަ؛ލަ ތަހުގީގު ކުރަމުންދާ ކަމަށް ބުނުމުގެ އިތުރުން ފުލުހުންގެ ބަޔާނުގައި އާންމުންގެ ފަރާތުން އެދިފައި ވަނީ އިންވެސްޓު ކުރާއިރު ގާނޫނާ ހަމަތަކުގެ މަތިން ހަރަކާތްތެރިވާ ބަޔަކާއެކު ކުރިއަށް ދިޔުމަށެވެ.
"އާންމު ރައްޔިތުން ތަފާތު މިއުޗުއަލް ފަންޑާއި ސްކީމްތަކުގައި އިންވެސްޓުކުރުމުގައި މިބާވަތުގެ ކަންކަމާގުޅޭ ފަންނީ މައުލޫމާތާއި މާކެޓް ރިސްކުތަކަށް ފަރުވާތެރިވުމަށް ދަންނަވަން. އަދި ކަމާބެހޭ ގާނޫނީ އޮނިގަނޑުތަކާ އެއްގޮތަށް ރަޖިސްޓްރީކުރެވި ލައިސަންސް ނުވަތަ އެކަށީގެންވާ ހުއްދަ އޮންނަ އިތުބާރުކުރެވޭ ފަރާތްތަކުގައި ނޫނީ ފައިސާ އިންވެސްޓު ނުކުރުމަށް ވެސް ދަންނަވަން،" އެ ބަޔާނުގައިވެ އެވެ.
އޭނާގެ ކުންފުނިން މަކަރުވެރި އެއްވެސް ހަރަކާތެއް ނުކުރާ ކަމަށް އަލްހާން ފަހުމީ ގެންދަވަނީ ތަކުރާރުކޮށް ވިދާޅުވަމުންނެވެ. އަދި ކުންފުނީގެ އެކައުންޓު ފްރީޒު ކުރި މައްސަލައިގައި ބޭންކް އޮފް މޯލްޑިވްސްގެ މައްޗަށް ދައުވާ ކުރާނެ ކަމަށް ވެސް އޮތީ ވިދާޅުވެފަ އެވެ.
