ފުލުހުން ރޭ ހިންގި ބޮޑު އޮޕަރޭޝަނެއްގައި ސޯސަންމަގުން ދިޔަ ޕިކަޕެއް ހުއްޓުވައި އަތުލައިގަތް މަސްތުވާތަކެއްޗަކީ ވައިގެ މަގުން ރާއްޖެ އަށް އެތެރެކުރި ތަކެތި ކަމަށައި އޭގެ ބަރުދަނުގައި 17 ކިލޯ ހުރި ކަމަށް ފުލުހުން ބުނެފި އެވެ.
އެ އޮޕަރޭޝަންގައި މަސްތުވާތަކެތި އަތުލައިގެންފައި ވަނީ ސޯސަންމަގާއި ރަތްވިލާ މަގު ގުޅޭ ކަންމަތިންނެވެ. އެ ސަރަހައްދު ބަންދުކޮށް ރޭ 21:00 އިން ފެށިގެން ދަންވަން ދެން ފުލުހުން ހަރަކާތްތެރިވި އެވެ.
އެކަމާ ގުޅިގެން ފުލުހުން ބުނީ އެ އޮޕަރޭޝަން ހިންގާފައި ވަނީ ވައިގެ މަގުން ރާއްޖެއަށް މަސްތުވާތަކެތި އެތެރެކޮށްފައިވާ ކަމަށް ކަސްޓަމްސުން ދިން މައުލޫމާތަކާ ގުޅިގެން ކަމަށެވެ.
"އެ އޮޕަރޭޝަނުގައި 17 ކިލޯގެ މަސްތުވާތަކެތި ހޯދައި ފުލުހުންގެ ބެލުމުގެ ދަށަށް ވަނީ ގެންގޮސްފައި،" ފުލުހުން ބުންޏެވެ.
އެ މައްސަލައާ ގުޅިގެން 27 އަހަރާއި 37 އަހަރާ ދެމެދުގެ ހަތަރު ފިރިހެނަކު ވަނީ ހައްޔަރުކޮށްފަ އެވެ. އެއީ ދިވެހި ދެ ފިރިހެނުންނާއި ބަންގްލަދޭޝްގެ ދެ ފިރިހެނުންނެވެ.
ރޭ އަތުލައިގަތް މަސްތުވާތަކެތި ހުރީ ގާތްގަނޑަކަށް 15 ކަރުދާސް ފޮށިގަނޑުގަ އެވެ. އެ ފޮށިތަކުގެ ތެރެއިން ގިނަ އަދަދެއްގެ ރަބަރު ޕެކެޓުގައި ބަންދުކޮށްފައި ހުރި ހުދު ކުލައިގެ ޕައުޑަރުތަކެއް ފެނުނު ކަމަށް އެ ސަރަހައްދުގައި އެވަގުތު ހުރި އަދަދުގެ ނޫސްވެރިޔާ މައުލޫމާތު ދިނެވެ.
އޭގެ އިތުރުން، ގޯނިތަކެއް އަތުލައިގެންފައިވާ ނަމަވެސް މި ތަކެތީގެ ތެރޭގައި ހިމެނެނީ މަސްތުވާތަކެތީގެ ކޮން ބާވަތެއް ކަމެއް ސާފުވެފައެއް ނުވެ އެވެ.
