މަސްތުވާތަކެތީގެ މައްސަލަތަކުގައި ނިޒާމުގެ ތެރޭގައި ހުރި ލޫޕްހޯލްތައް ބޭނުންކޮށްގެން ގަސްދުގައި ގޯސް ހަދާ ފުލުހުންގެ މައްސަލައެއް ރިޕޯޓުކޮށްފައި ނެތް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވުމުން، ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ނުރުހުން ފާޅުކުރައްވައިފި އެވެ.
ކޯޓުތަކުގައި މައްސަލަތައް ލަސްވާ މައްސަލައާ ގުޅޭ ގޮތުން ކަމާ ބެހޭ އިދާރާތަކުގެ ވެރިންނާއެކު ރައްޔިތުންގެ މަޖިލީހުގެ ޖުޑިޝަރީ ކޮމިޓީން މިދިޔަ މަހުގެ ތެރޭގައި ބޭއްވި ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ބަންޑާރަ ނައިބު އިބްރާހިމް ރިފްއަތު ވިދާޅުވީ، ގޯސް ހަދާ ފަރާތްތައް ފުލުހުންގެ އިދާރާ އާއި ތަހުގީގީ އެހެން އިދާރާތަކުގައި ވެސް އެބަތިބި ކަމަށެވެ.
އޭނާ ވިދާޅުވީ އެފަދަ ފަރާތްތަކުން ގޯސް ހަދަނީ ރޭވިގެން އިންތިޒާމްވެގެން ކުރާ ކަމެއްގެ ގޮތުގަ އެވެ.
ނަމަވެސް، ބަންޑާރަ ނައިބު ކުރެއްވި ތުހުމަތު އެކި ފަހަރު މަތިން ހޯމް މިނިސްޓަރު ވަނީ ދޮގުކުރައްވައި، ފުލުހުންގެ މުއައްސަސާ ދިފާއުކުރައްވައިފަ އެވެ.
ތ. އަތޮޅުގެ ދެ ރަށެއްގައި ޕޮލިސް ސްޓޭޝަން އެޅުމުގެ މަސައްކަތާ ގުޅޭ ގޮތުން އެ ދާއިރާގެ މެމްބަރު އަބްދުﷲ ރިޔާޒް ކުރެއްވި ސުވާލަށް ޖަވާބު ދެއްވަން މަޖިލީހުގެ މިއަދުގެ ޖަލްސާއަށް ހޯމް މިނިސްޓަރު ހާޒިރުވެވަޑައިގެންނެވިއިރު، އޭޖީގެ ތުހުމަތުތަކާ ގުޅޭ ސުވާލުތައް މިއަދު ވެސް އަމާޒުވި އެވެ.
މިގޮތުން، ރާއްޖެއަށް ފުޅާ ދާއިރާއެއްގައި މަސްތުވާތަކެތި އެތެރެކުރާ މީހުން، ތަހުގީގުގައި ހެދޭ ގޯސްތަކުން ދޫވާ މައްސަލައާ ގުޅުވައި ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު ކުރެއްވި ސުވާލަށް ޖަވާބު ދެއްވަމުން އިމްރާން ވިދާޅުވީ އެފަދަ މައްސަލަތަކުގައި ފުލުހުން ގަސްދުގައި ގޯސް ހެދި ކަމުގެ އެއްވެސް މައްސަލައެއް ހުށަހެޅިފައި ނުވާ ކަމަށެވެ.
އިމްރާން ވިދާޅުވި ގޮތުގައި ފުލުހުންގެ މަސައްކަތްތައް ހަރުދަނާކޮށް ޒިންމާކުރުވުމަށް ނިޒާމް މިހާރު ހަރުދަނާކުރެވިފައިވާ ކަމަށެވެ.
މިގޮތުން، ފުލުހަކާ މެދު ތުހުމަތެއް ނޫނީ މައްސަލައެއް ހުށަހެޅިއްޖެނަމަ، އެކަމެއް ތަހުގީގުކޮށް އެ ފުލުހަކާ މެދު ފިޔަވަޅު އަޅަމުންދާކަމަށް މިނިސްޓަރު ވިދާޅުވި އެވެ.
"...އެހެންވީމާ އަޅުގަނޑަށް ދަންނަވާކަށް ނުކެރޭނެ ފުލުހުން ގަސްދުގައި ތަހުގީގުތައް ގަޑުބަޑުކުރެއޭ،" އިމްރާން ވިދާޅުވި އެވެ.
އިމްރާން ދެއްވި ޖަވާބާމެދު ހިތްހަމަނުޖެހުން ފާޅުކުރައްވައި، ރިޔާސަތުގައި އިންނެވި ނަޝީދު ވިދާޅުވީ ހުވާގެ މަތީގައި ހުންނަވައިގެން ބަންޑާރަ ނައިބު މަޖިލީހުގައި ފުލުހުންނާބެހޭ ގޮތުން އެފަދަ ވާހަކައެއް ވިދާޅުވުމަކީ "ހުރިހާ ތަނަކަށް" ރިޕޯޓު ކުރެވުނީ ކަމަށް ގަބޫލުކުރައްވާ ކަމަށެވެ.
"ދެން ސިޓީއަކުން ހުށަނާޅާކަމަށް ވިދާޅުވެ އެކަމާމެދު އަމަލު ނުކުރައްވާ ހުންނަވަންޖެހޭނެ ކަމަށް އަޅުގަނޑަކަށް ނުފެނޭ،" ނަޝީދު ވިދާޅުވި އެވެ.
އޭގެ ފަހުން ވެސް އެ މައްސަލާގައި އެހެން މެމްބަރުންގެ ސުވާލުތައް އަމާޒުވި ނަމަވެސް، އިމްރާން ވަނީ ފުލުހުން ދިފާއު ކުރައްވައިފަ އެވެ.
އެގޮތުން، ހާއްސަކޮށް މަސްތުވާތަކެތީގެ މައްސަލަތަކުގައި ފުލުހުންނަށް ބޮޑެތި ގޮންޖެހުންތައް ކުރިމަތިވާ ކަމަށާއި، ނަމަވެސް އެ ގޮންޖެހުންތަކުގެ ތެރެއިން ވެސް ފުލުހުން މުހިންމު ކާމިޔާބީތަކެއް ހޯދިފައިވާކަމަށް އިމްރާން ތަކުރާރުކޮށް ވިދާޅުވި އެވެ.
