ފުލުހުން ކުރިއަށް ގެންދާ ބޮޑު އޮޕަރޭޝަނެއްގައި ގިނަ އަދަދެއްގެ މަސްތުވާތަކެތި މާލެ އިން އަތުލައިގެންފި އެވެ.
މި އޮޕަރޭޝަންގައި މަސްތުވާތަކެތި އަތުލައިގެންފައި ވަނީ ސޯސަން މަގާއި ރަތްވިލާ މަގު ގުޅޭ ކަންމަތިންނެވެ. އެ ސަރަހައްދު ބަންދުކޮށް މިރޭ 21:00 އިން ފެށިގެން ފުލުހުން އަންނަނީ ހަރަކާތްތެރިވަމުންނެވެ.
އެ ސަރަހައްދުގައި ހުރި އަދަދުގެ ނޫސްވެރިޔާ މައުލޫމާތު ދިން ގޮތުގައި ގާތްގަނޑަކަށް 15 ކަރުދާސް ފޮށިގަނޑު ފުލުހުން ވަނީ އަތުލައިގެންފަ އެވެ. އަދި، އެ ފޮށިތަކުގެ ތެރެއިން ގިނަ އަދަދެއްގެ ރަބަރު ޕެކެޓުގައި ބަންދުކޮށްފައި ހުރި ހުދު ކުލައިގެ ޕައުޑަރުތަކެއް ފެނިފައިވާ ކަމަށް އޭނާ މައުލޫމާތު ދީފައިވެ އެވެ.
އޭގެ އިތުރުން، ގޯނިތަކެއް ވެސް އަތުލައިގެންފައިވާ ކަމަށް އޭނާ މައުލޫމާތު ދެ އެވެ. ނަމަވެސް، އެ ގޯނީތަކުގެ ތެރޭގައި ހުރީ ކޮން އެއްޗެއް ކަމެއް ސާފުވެފައެއް ނުވެ އެވެ.
މިކަމާ ގުޅިގެން ފުލުހުންގެ ހައްޔަރަށް މިހާތަނަށް މީހަކު ގެންގޮސްފައިވާ ކަމެއް ހާމަކޮށްފައެއް ނުވެ އެވެ. އަދި، އަތުލައިގެންފައި ވަނީ ކިހާ އަދަދެއްގެ މަސްތުވާތަކެތި ކަމެއް އަދި ސާފެއް ނުވެ އެވެ.
މި މައްސަލައިގެ އިތުރު އެއްވެސް ތަފްސީލެއް މިހާތަނަށް އައިއިރު ފުލުހުން ހާމަކޮށްފައެއް ނުވެ އެވެ.
މިފަހުން ފުލުހުން އަންނަނީ ގިނަ އަދަދެއްގެ މަސްތުވާތަކެތި އަތުލައިގަންނަމުންނެވެ. އެގޮތުން، ކަނޑުމަގުންނާއި ވައިގެ މަގުން ވެސް ދާދިފަހުން ރާއްޖެ އަށް އެތެރެކުރަން މަސައްކަތްކުރި ގިނަ އަދަދެއްގެ މަސްތުވާތަކެތި އަތުލައިގެންފައިވެ އެވެ.
