އުރީދޫ ދިވެހި ޕްރިމިއާ ލީގުގައި މިރޭ ތަޖުރިބާކާރު ޑިފެންޑަރު، އަބްދުﷲ ހަނީފް (ބެންޖޯ) ތަފާތު ދައްކައި ދަ ގްރާންޑޭ ސްޕޯޓްސް ކްލަބް އަތުން ފަހަތުން އަރައި 2-1 އިން ސުޕަ ޔުނައިޓެޑް ސްޕޯޓްސް (ސަސް) މޮޅުކޮށްދީފި އެވެ.
ބެންޖޯ، 37، މިރޭގެ މެޗުގެ މޮޅު ކުޅުންތެރިޔާގެ މަގާމު ހޯދީ އޭރިއާބޭރުން ޖެހި މޮޅު ގޯލާއި ސަސް މޮޅުކޮށްދޭން ކާމިޔާބުކުރި ހިލޭ ޖެހުމުގެ ސަބަބުންނެވެ. ސަސް އަށް މި މޮޅާ އެކު ގާތްގަނޑަކަށް ލީގުގެ ފުރަތަމަ ބުރުގައި ވަނީ ގަދަ ހައެއް ކަށަވަރުވެފަ އެވެ.
މި މޮޅާ އެކު ސަސް ހަ ވަނައިގައި އޮތީ ހަތް މެޗުން ހަތް ޕޮއިންޓާ އެކު އެވެ. ހަތް ވަނައިގައި އޮތް ކްލަބް ގްރީން ސްޓްރީޓްސް އިން މާދަމާ ހަވީރު ކްލަބް އީގަލްސް އަތުން ހަ ވަރަަކަށް ގޯލުގެ ތަފާތު މޮޅުވެގެން ނޫން ގޮތަކަށްވ މި ބުރު ނިމޭއިރު ގަދަ ހަޔަކަށް ނޭރޭނެ އެވެ. ދަ ގްރާންޑޭ މި ސީޒަނުގައި މިހާތަނަށް ޕްރެޒިޑެންޓްސް ކަޕާއި ލީގު ހިމެނޭ ގޮތަށް ކުޅުނު 14 މެޗުން ވެސް އަދި މޮޅެއް ނުލިބެ އެވެ.
ގަލޮޅު ދަނޑުގައި މިރޭ ކުޅުނު މެޗުގެ 16 ވަނަ މިނިޓްގައި ދަ ގްރާންޑޭ އިން ލީޑުނެގީ އިސްމާއިލް ނަޒީހު ޖެހި ގޯލުންނެވެ. ސަސްގެ އޭރިއާތެރެއިން އެ ޓީމުގެ ގޯލްކީޕަރު މުހައްމަދު ޝަފީއު (ޗެކް) ބޯޅަ ސަލާމަތްކުރަން ޖެހި ބޯޅަ ކަނަށް ވަނީ ނަޒީހު ފައިގައި ޖެހި މިސްރާބު ބަދަލުވެގެން ގޮސް އެވެ. އޭގެ އެއް މިނިޓް ކުރިން ނަޒީހު ޖެހި ބޯޅައެއް ޗެކް ހުއްޓުވި އެވެ. އެކަމަކު، ދެ ވަނަ ފަހަރަށް ނަޒީހަށް ލިބުނު ބޯޅައިގައި ފެނުނީ ނަސީބު ވެސް ރަނގަޅުކޮށެވެ.
ގޯލު ޖަހައި ދަ ގްރާންޑޭ ކުޅުންތެރިން އުފާފާޅުކުރަނީ.-- ފޮޓޯ: އެފްއޭއެމް
ސަސް އިން ފުރަތަމަ ހާފުގައި ގޯލެއް ޖަހަން ކުރި އެޓޭކްތައް ކާމިޔާބެއްނުވި އެވެ. އެ ޓީމުން ނަތީޖާ އަނބުރާލީ މެޗުގެ ފަހު 15 މިނިޓް ތެރޭ ބެންޖޯ ދެއްކި ތަފާތުންނެވެ. ބެންޖޯ ޖެހި ފުރަތަމަ ގޯލަކީ މި ފަހަރުގެ ލީގުގައި އެންމެ ދުރުން ޖެހި ގޯލެވެ. ހާފުގެ މެދެއްހާ ހިސާބުން ބެންޖޯ ޖެހި ބޯޅަ ގޯލަށް ވަންއިރު، ދަ ގްރާންޑޭގެ ކީޕަރު ހަސަން މުއާޒް ހުރީ ހަރަކާތް ހުއްޓިފަ އެވެ.
މި މެޗުން ސަސް އަށް ތިން ޕޮއިންޓް ހޯދައިދިން ގޯލު ވެސް ޖެހީ ބެންޖޯ އެވެ. މެޗުގެ 85 ވަަނަ މިނިޓްގައި ދަ ގްރާންޑޭގެ އޭރިއާ ރޮނގުމަތިން ލިބުނު ހިލޭ ޖެހުމަކުން ބެންޖޯ ފޮނުވާލި ބޯޅަ ވަނީ ގޯލުގެ ކަނަށެވެ. އެ ގޯލަށް ފަހު ސަސްގެ ކުޅުންތެރިންނާއި އޮފިޝަލުން ވަރަށް ބޮޑަށް އުފާފާޅުކުރި އެވެ. އޭގެ ދެ މިނިޓް ފަހުން ސަސް އަށް ތިން ވަނަ ގޯލެއް ޖަހައިދޭން މުހައްމަދު ސަހާއު (ބޭލް) ޖެހި ބޯޅަ ދިޔައީ ގޯލު ކުރިމަތިން ހުރަސްވެގެންނެވެ.
މި ފަހަރުގެ ސީޒަނުގައި ބެންޖޯ އަންނަނީ ރަނގަޅު ކުޅުމެއް ދައްކައި، މެޗުތަކުގެ މޮޅު ކުޅުންތެރިޔާގެ މަގާމު ވެސް ހޯދަމުންނެވެ. ބެންޖޯ ވަނީ މިހާތަނަށް މި ފަހަރުގެ ލީގުގައި ހަތް މެޗުން ތިން ގޯލު ޖަހައިފަ އެވެ.
ލީގުގައި މާދަމާ ހަވީރު ކުޅޭ މެޗުގައި ގްރީން ސްޓްރީޓްސް ބައްދަލުކުރާނީ އީގަލްސްއާ އެވެ. އަދި މާދަމާރޭ މާޒިޔާ ސްޕޯޓްސް އެންޑް ރެކްރިއޭޝަނުން ނުކުންނާނީ ކްލަބް ވެލެންސިއާއާ ދެކޮޅަށެވެ. މިއީ ޕްރެޒިޑެންޓްސް ކަޕް ފައިނަލަށް ފަހު މި ދެ ޓީމުގެ ފުރަތަމަ ކުރިމަތިލުމެވެ.
