ޕެނަލްޓީގައި ސުޕަ ޔުނައިޓެޑް ސްޕޯޓްސް (ސަސް) ގެ މައްޗަށް 5-4 އިން ކުރިހޯދައި ޓީސީ ސްޕޯޓްސް ކުލަބުން ފުރަތަމަ ފަހަރަށް އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕް ކާމިޔާބު ކޮށްފި އެވެ.
ޓީސީން މުބާރާތުގެ ތަށި އުފުލާލީ މެޗަކުން ބަލިނުވެ އެވެ.
މި މެޗުގެ ކުރިން ވަނީ ދާދި ފަހުން ނިޔާވި، ގައުމީ ފުޓުބޯޅަ ޓީމުގެ ކުރީގެ މިޑްފިލްޑަރު މުހައްމަދު އާރިފް (ބަކާ) ގެ ޝަރަފުގައި އެގްޒަބިޝަން މެޗެއް ކުޅެފަ އެވެ. މި މެޗުގައި އެކަޑަމީތަކުގެ ކުޅުންތެރިންގެ އިތުރުން ގައުމީ ފުޓުބޯޅަ ޓީމުގެ ކުޅުންތެރިން ވަނީ ބައިވެރިވެފަ އެވެ. އަދި މެޗުގެ ކުރިން ވަނީ އެއް މިނެޓުގެ ސުކޫތެއް ގެނެސްފަ އެވެ.
މި މުބާރާތުގެ ގްރޫޕް ސްޓޭޖުގައި މި ދެ ޓީމު ބައްދަލުކުރި މެޗު އެއްވަރުވީ 1-1 ގެ ނަތީޖާ އަކުންނެވެ. މިރޭ ކުޅުނު ފައިނަލް މެޗުގެ ފުރިހަމަ ވަގުތު ހަމަވީ 0-0 ގެ ނަތީޖާ އަކުންނެވެ.
މުޅި މެޗުގައި ވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު, މި ހާފުގައި ސަސް އަށް ލަނޑު ޖަހަން ލިބުނު އެންމެ ރަނގަޅު ފުރުސަތު ތަނަވަސްކޮށްދިނީ މުހައްމަދު އިޒާން އަލީ އެވެ. ޓީސީގެ އޭރިއާ ތެރެއަށް ވަދެ އިޒާން ނަގާދިން ހުރަސް ޖަހާނެ ކުޅުންތެރިއަކުނުވެވީ ބޭކާރެވެ. އޭގެ ފަހުން ޓީސީގެ މުޒްދާން ހަސަން އޭރިއާ ބޭރުން ފޮނުވާލި ބާރު ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މެޗުގެ ދެވަނަ ހާފުގައި ޓީސީން އެ ޓީމުގެ އެޓޭކުތައް ވަރުގަދަކުރިއިރު, މި ހާފުގެ ފަހު ކޮޅު ޓީސީން ވަނީ ގޯލެއް ޖެހޭތޯ މަސައްކަތް ކޮށްފަ އެވެ. އެކަމަކު ސަސްގެ ވަރުގަދަ ޑިފެންސް އެ ޓީމަށް ފޫއަޅުވާލެވޭ ގޮތް ނުވި އެވެ.
މެޗުގެ ފުރިހަމަ ވަގުތު ހަމަވިއިރު, 0-0 ގެ ނަތީޖާ އަކުން އެއްވަރުވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެންނެވެ.
ޕެނަލްޓީގައި ސަސްގެ އަހުމަދު ނަވާފް ފައުޒީ ފޮނުވާލި ޕެނަލްޓީ ޓީސީގެ ކީޕަރު މުހައްމަދު ޝިޔާޒް ދިފާއުކުރިއިރު, ޓީސީގެ އިސްމާއިލް އަފްލާޒް ފޮނުވާލި ޕެނަލްޓީ ދިޔައީ ބޭރަށެވެ.
ޓީސީ މެޗުން މޮޅުވީ ސަސްގެ ސޫޒާން ހަސަން އަހުމަދު ފޮނުވާލި ޕެނަލްޓީ ބޭރަށް ގޮސްގެންނެވެ.
މި މުބާރާތުގައި އެންމެ ގިނަ ގޯލު ޖަހައިގެން ރަން ބޫޓު ހޯދާފައިވަނީ ސަސްގެ އިޒާން އެވެ. އަދި މުބާރާތުގެ ފެއާ ޕްލޭ ޓީމަކީ މާޒިޔާ ސްޕޯޓްސް އެންޑް ރެކްރިއޭޝަން އެވެ.
ޓީސީގެ މި ކާމިޔާބީ ހާއްސަވާ އެއް ފަރާތަކީ އެ ޓީމުގެ ކޯޗު އަހުމަދު ނިމާދު (ނިމާ) އެވެ. އޭނާ މި ވަނީ ޔޫތު ޗެމްޕިއަންޝިޕްގެ ތާރީހުގައި ހާއްސަ ކާމިޔާބެއް ހޯދައިފަ އެވެ. އެއީ ޖެހިޖެހިގެން ދެ މުބާރާތް ދެ ޓީމުގައި ހުރެ ހޯދައިގެންނެވެ. ކްލަބް އީގަލްސް އިން 2022 ވަނަ އަހަރު ސަސް ބަލިކޮށްފައި 19 އަހަރުން ދަށުގެ ޔޫތު ޗެމްޕިއަންޝިޕް ކާމިޔާބުކުރީ ނިމާގެ ކޯޗުކަމުގަ އެވެ. ނިމާ މި ފަހަރު އެ ތަށި މި ހޯދީ ޓީސީގައި ހުރެ އެވެ.
