އެކި ފަހަރު މަތިން އުޅެގެން ވެސް މަގުމަތީގައި ތަކެތި ބެހެއްޓުން ނުހުއްޓުވިގެން އުޅޭ ނީލަން ފިހާރަތަކާ ދިމާލަށް މަގުމަތީގައި ހުރި ތަކެތި ނަގާ، މާލޭ ސިޓީ ކައުންސިލުން އެ ސަރަހައްދު ސާފުކޮށްފި އެވެ.
ނީލަން ފިހާރަތައް ހުންނަ ފަޅު މަތީ މަގުގައި ތަކެތި ބެހެއްޓުމުގެ މައްސަލައަކީ، ކުރީގެ އެއް ނަމްބަރު ކުނި ކޮށި އެ ސަރަހައްދުގައި ހުރި ޒަމާނުއްސުރެން ހައްލު ނުވެގެން އުޅޭ މައްސަލައެކެވެ.
މީގެ ކުރިން ވެސް އެކި ފަހަރު މަތިން މި ސަރަހައްދު މަގުމަތީގައި ބަހައްޓާފައި ހުރި އެއްޗެހި ނަގާ ސާފުކުރި އެވެ. އެހެން ނަމަވެސް ސާފުކުރާ ދުވަސްވަރު މެނުވީ ނީލަން ފިހާރަތައް ހުންނަ މަގުގެ ދެ ފަޅީގައި ލަކުޑި ފަތިތަކާއި ފަރުނީޗަރާއި ފާޑުފާޑުގެ ސާމާނު އަބަދު ވެސް ހުރެ އެވެ.
އެންމެ ފަހުން މި ސަރަހައްދުގައި ހުރި ތަކެތި ނެގުމުގެ މަސައްކަތް މާލެ ސިޓީ ކައުންސިލުން ކުރީ 2020 ގެ އޭޕްރީލު މަހެވެ.
އޭރު އެކަން ކުރީ މަގުމަތީގައި ބަހައްޓާފައި ހުރި މުދަލުގެ ސަބަބުން ޓްރެފިކަށް ދަތިވާތީ އާއި އާންމުންގެ ޝަކުވާ ލިބެމުންދާތީ ކަމަށް ބުނެ އެވެ. އަދި، އެ ސަރަހައްދުގައި ކުނި ބެހެއްޓުމަކީ މަނާ ކަމެއް ކަން ހަނދުމަކޮށްދިނެވެ.
ފަޅުމަތީ މަގުގައި ނީލަން ފިހާރަތައް ހުންނަ ސަރަހައްދު: ސާފުކުރާ ދުވަސްވަރު މެނުވީ އަބަދުވެސް މަގުގެ ދެ ފަޅީގައި މުދާ ބަހައްޓާފައި ހުރޭ. -- ފޮޓޯ: އަބްދުﷲ އިޔާން/އަދަދު
އެކަމަކު މިފަހަރު ވެސް މަގުތައް މަތިން 67 ޓަނުގެ ކުނި ނެގި ކަމަށް ސިޓީ ކައުންސިލުން ބުންޏެވެ. ފުލުހުންނާއި ގުޅިގެން ސިޓީ ކައުންސިލުން މި މަސައްކަތް ފެށީ މި މަހުގެ 10 ވަނަ ދުވަހުގެ ހަވީރު 6:00 ގެ ކުރިން ތަކެތި ނަގަން ފުރުސަތު ދިނުމަށް ފަހުގަ އެވެ.
މިފަހަރު ވެސް ސިޓީ ކައުންސިލުން ވަނީ މަގުމަތީގައި ކުނި ބެހެއްޓުމަކީ މަނާ ކަމެއް ކަމަށް އިލްތިމާސްކޮށްފަ އެވެ. އަދި ބުނީ މަގުމަތީގައި ބަހައްޓާފައި ހުންނަ ތަކެތި ނެގުމަށް ފަހު ކުނީގެ ގޮތުގައި ނައްތާލާނެ ކަމަށެވެ.
އެތަނުގައި ހުރި ގޮޅިތަކަކީ މާލޭ މުނިސިޕަލްޓީ ދުވަސްވަރު ނީލަން ފިހާރަ ހިންގަން 2002 ހިސާބުގައި ދޫކޮށްފައި ހުރި ގޮޅިތަކެކެވެ. މިތަން ހުސްކުރުމުގެ މަސައްކަތް ހައުސިން މިނިސްޓްރީން 2017 ގައި ފެށި ކަމަށް ނޫސްތަކުން ރިޕޯޓުކޮށްފައި ވެ އެވެ. ނަމަވެސް، އެކަމެއް ނުކުރެ އެވެ.
އެ ސަރަހައްދަކީ މީގެ ކުރިން އެކި ފަހަރު މަތިން ނުރައްކާތެރި ހާދިސާތައް ވެސް ހިނގާފައިވާ ސަރަހައްދެކެވެ.
