މޯލްޑިވްސް ސްޕޯޓްސް އެވޯޑްސްގެ ހޮސްޕިޓާލިޓީ ޕާޓްނަރަކަށް ކްރޮސް ރޯޑްސް ހަމަޖައްސައި މިއަދު އެއްބަސްވުމުގައި ސޮއިކޮށްފި އެވެ.
"މޯލްޑިވްސް ސްޕޯޓްސް އެވޯޑްސް 2022" ބޭއްވުމަށް ހަމަޖެހިފައިވަނީ އަންނަ މަހުގަ 17 ވަނަ ދުވަހު މާލޭ ކުޅިވަރު އެކުވެނި ޓްރެކް ދަނޑުގަ އެވެ. މި އެވޯޑުގެ ހޮސްޕިޓާލިޓީ ޕާޓްނަރު ކްރޮސް ރޯޑްސްއާ އެކު އެއްބަސްވުމުގައި ސޮއިކުރި މިއަދު އެކަމަށްޓަކައި ގަލޮޅު ދަނޑުގެ ވީއައިޕީ ރޫމުގައި އޮތް އިވެންޓެއްގަ އެވެ. ޔޫތު މިނިސްޓްރީގެ ފަރާތުން އެއްބަސްވުމުގައި ސޮއިކުރީ މިނިސްޓަރު އަހުމަދު މަހުލޫފު އެވެ. ކްރޮސް ރޯޑްސްގެ ފަރާތުން ސޮއިކުރެއްވީ މެނޭޖިން ޑިރެކްޓަރު ޓޮލްގާ އުނާން އެވެ.
މިއަދު ބޭއްވި އިވެންޓްގެ ތެރެއިން ކްރޮސްރޯޑްގެ މެނޭޖިން ޑިރެކްޓަރު ޓޮލްގާ (ކ) އާއި މިނިސްޓަރު މަހުލޫފް.-- ފޮޓޯ: މުހައްމަދު ޝާބިން/ އަދަދު
އެއްބަސްވުމުގައި ސޮއިކުރުމަށް ފަހު މިނިސްޓަރު މަހުލޫފް ވިދާޅުވީ ކްރޮސްރޯޑްސްއާ އެކު މި އިވެންޓް އިތުރަށް ފުރިހަމަވާނެ ކަމަށް ގަބޫލުކުރައްވާ ކަމަށެވެ، މިނިސްޓްރީން ކުރާ މަސައްކަތްތަކުގައ ކްރޮސްރޯޑްސް އިން އަބަދުވެސް އެހީތެރިކަމާއި އެއްބާރުލުން ލިބޭ ކަމަށް މަހުލޫފް ވިދާޅުވި އެވެ.
މި އިވެންޓް އިތުރަށް ފުރިހަމަކުރުމަށްޓަކައި އެންމެ ބޮޑަށް ފާހަގަކޮށްލެވެނީ ދުނިޔޭގެ ކުޅިވަރުގެ ދާއިރާގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރު ސަހުސިއްޔަތުން ރާއްޖެ އައުމަށްވަނީ ހަމަޖެހިފައިވުމެވެ.
މިނިސްޓަރު މަހުލޫފު ވިދާޅުވީ މިއަދު ގާއިމްކުރެވުނު އެއްބަސްވުމުގެ ދަށުން މި އެވޯޑަށް ވަޑަައިގަންނަވާ ފާރާތްތަކުގެ ތިބުމުގެ އިންތިޒާމްތަކާއި އެހެނިހެން ކަންކަން ހަމަޖެހިގެންދާނީ ކްރޮސްރޯޑްސް އިން ކަމަށެވެ. މިނިސްޓަރު ވިދާޅުވީ ކްރޮސްރޯޑްސްގައި މި އެވޯޑަށް އަންނަ ތަރިން ތިބުމަކީ ރާއްޖޭގެ ކުޅިވަރާއި ޓުއަރިޒަމް އަށް ވެސް ލިބޭނެ ބޮޑު ކުރިއެރުމެއް ކަމަށެވެ.
"ލަފާ މިކުރަނީ 15 ވަރަކަށް ކުޅިވަރާއި ގުޅުން ހުރި ފަރާތެއް މި އެވޯޑަށް އަންނާނެ ކަމަށް. މި ހުރިހާ ބޭފުޅުންގެ ހުރިހާ ކަމެއް ހަމަޖައްސާނީ ކްރޮސްރޯޑްސް އިން" މިނިސްޓަރު ވިދާޅުވި އެވެ.
ދާދި ފަހުން ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީގެ ރައީސް ބްރެޒިލްގެ އަރީ ގްރާސާ ރާއްޖެ ވަޑައިގެން ހުންނެވީ ކްރޮސްރޯޑްސްގަ އެވެ. ރާއްޖޭގައި ބީޗްވޮލީބޯޅަ ފުޅާކުރަން ކުރާ މަސައްކަތުގައި ކްރޮސްރޯޑްސް އަކީ އިސް ބައިވެރިއެކެވެ.
މިއަދުގެ އިވެންޓްގެ ތެރެއިން ޓޮލްގާ ވާހަކަ ދައްކަވަނީ.-- ފޮޓޯ: މުހައްމަދު ޝާބިން/ އަދަދު
ކްރޮސްރޯޑްސްގެ މެނޭޖިން ޑިރެކްޓަރު ޓޮލްގާ ވިދާޅުވީ ރާއްޖެ އަކީ ދުނިޔޭގެ ފެންވަރުގެ ކުޅިވަރު އިވެންޓްތައް ބޭއްވޭނެ ތަނެއް ކަމަށެވެ. އެކަން ސާބިތުކޮށްދޭން ކްރޮސް ރޯޑްސް އަށް ލިބިފައިމިވާ ފުރުސަތުގެ ބޭނުންހިފަން ޓޮލްގާ ހުންނެވީ ތައްޔާރަށެވެ، މިނިސްޓަރު މަހުލޫފުގެ ތަސައްވުރަށް ބަލާއިރު ރާއްޖޭގައި ކުޅިވަރުގެ ބޮޑެތި އިވެންޓްތައް ބޭއްވިދާނެ ކަމަށް ގަބޫލުކުރާ ކަމަށެވެ.
އޭނާ ވިދާޅުވީ ކްރޮސްރޯޑްސްއަކީ ކުޅިވަރުގެ ސަގާފަތް ކުރިއެރުމަށް އަބަދުވެސް އެއްބާރުލުން ދޭނެ ތަނެއްކަމަށާއި، މި ތާރިޙީ އިވެންޓްގައި ބައިވެރިވެވޭތީ އުފާކުރާކަމަށެވެ.
އެވޯޑުގައި އަހަރުގެ އެންމެ މޮޅު ކުޅިވަރު އެތުލީޓް (އަންހެން/ފިރިހެން)، ކޮންމެ ކުޅިވަރެއް ވަކިވަކިން އެންމެ މޮޅު ކުޅުންތެރިޔާ (އަންހެން/ފިރިހެން) ހޮވާނެ އެވެ.
އޭގެ އިތުރުން ސްޕެޝަލް އެބިލިޓީ އެތުލީޓް (އަންހެން/ފިރިހެން)، އެންމެ މޮޅު ކޯޗު (އަންހެން/ފިރިހެން)، އަހަރުގެ އެންމެ މޮޅު ޓެކްނިކަލް އޮފިޝަލް (އަންހެން/ފިރިހެން)، އެންމެ މޮޅު ސިއްހީ އެހީތެރިޔާ (އަންހެން/ފިރިހެން)، އެންމެ އުންމީދީ އެތުލީޓް (އަންހެން/ފިރިހެން)، އެންމެ މޮޅު ކުޅިވަރު ނޫސްވެރިޔާ، އެންމެ މޮޅު ކުޅިވަރު ފޮޓޯގްރާފަރު، އަހަރުގެ އެންމެ ފާހަގަކޮށްލެވޭ ކުޅިވަރު އެސޯސިއޭޝަން، އެންމެ ފާހަގަކޮށްލެވޭ ސްޕޯޓްސް ބްރޯޑްކާސްޓަރު، އެންމެ ފާހަގަކޮށްލެވޭ ސްޕޯޓްސް އޮންލައިން މީޑިއާ އަދި ލައިފް ޓައިމް އެޗީވްމަންޓް އެވޯޑް ދީނުމަށްވަނީ ހަމަޖެހިފަ އެވެ.
މި އެވޯޑްތަކަށް ނަން ހުށަހެޅުމަށް މިހާރު ފުރުސަތު ހުޅުވާލާފައިވާއިރު، ނަންތައް ނޮމިނޭޓްކުރާނީ ކުޅިވަރު އެސޯސިއޭޝަންތަކުންނެވެ. އެސޯސީއޭޝަންތަކުން ހުށަހަޅާ ނަންތަކުގެ ތެރެއިން އެވޯޑް ލިބޭ ފަރާތެއް ހޮވާނީ އެކަމަށް ކަނޑައަޅާފައިވާ ޖަޖުންގެ ޕެނަލަކުންނެވެ.
"މޯލްޑިވްސް ސްޕޯޓްސް އެވޯޑްސް 2022" ގެ އޮންލައިން މީޑިއާ ޕާޓްނަރަކަށް ހަމަޖައްސާފައިވަނީ "އަދަދު" އޮންލައިން އެވެ. އަދި ބްރޯޑްކާސްޓިން ޕާޓްނަރަކަށް ހަމަޖައްސާފައިވަނީ ރާއްޖެ ޓީވީ އެވެ.
