އެތުލީޓުންނާއި ކުޅިވަރު އާއިލާ ބަލައިގަނެ، ހިތްވަރުދީ، އަދި އަގުވަޒަންކުރުމަކީ ކޮންމެހެން ކުރަންޖެހޭ ކަމެއް ކަމަށް ސްޕޯޓްސް މިނިސްޓަރު އަހްމަދު މަހްލޫފް ވިދާޅުވެއްޖެ އެވެ.
މިރޭ ކުރިޔަށްދާ މޯލްޑިވްސް ސްޕޯޓްސް އެވޯޑްސްގައި ވާހަކަ ދައްކަމުން މަހްލޫފް ވިދާޅުވީ ހުރިހާ މައިދާނަކުން މިންތީގެ ހަމަހަމަކަން ގާއިމުކުރަން ރާއްޖެ ކުރަމުންދާ ދަތުރުގެ ބައިވެރިން ކަމުގައި، ދިވެހި ކުޅިވަރު އާއިލާ ވެސް ވެފައިވާ ކަމަށެވެ.
"އަންހެން އެތުލީޓުންނަށް މީގެ ކުރިން ދެމުން އައީ ފިރިހެން އެތުލީޓުންނަށް ދިން އެލަވަންސްގެ ބައިކުޅަ ބައި. ނަމަވެސް މިރޭ މި ހަފްލާގައި ބައިވެރިވާ ކޮންމެ އަންހެން އަދި ކޮންމެ ފިރިހެން އެތުލީޓަކަށް ވެސް އެލަވަންސް ލިބެމުންދާނީ އެއްވަރަކަށް، އެއް ހަމަޔަކަށް," މިރޭ މަހްލޫފް ވިދާޅުވި އެވެ.
ސްޕޯޓްސް އެވޯޑްއަކީ ޖެނުއަރީ 2020، ގައި ޔޫތު މިނިސްޓްރީން ބޭއްވި "ރަން އަހަރު" ޖަލްސާގައި ލޯންޗުކުރި އެވޯޑެކެވެ. އެހެން ނަމަވެސް، ކޮވިޑާ ގުޅިގެން އެވޯޑް ފަސްވި އެވެ. އަދި މި އެވޯޑަށް ޖަޖުން ކަނޑައަޅައި އިއުލާނުކޮށްފައިވަނީ މިދިޔަ މަހުގަ އެވެ.
"ސްޕޯޓްސް އެވޯޑް ކޮވިޑާ ގުޅިގެން ފަސްވެގެންދިޔުމަށް ފަހު މިރޭ ދޭން ފެށިފައިވާ ކަމީ މިކަމުގެ ސަބަބުން އެތުލީޓުންނާ ކުޅިވަރުގެ އާއިލާ އަށް ބޮޑު އަދި ތަފާތު ބަދަލެއް ގެނުވާނެ ކަމެއް،" މިރޭ މަހްލޫފް ވިދާޅުވި އެވެ.
މިރޭގެ އެވޯޑް ހަފްލާގައި ބޭރު ގައުމުތަކުގެ މިނިސްޓަރުންނާއި ދުނިޔޭގެ ފެންވަރުގައި ފާހަގަކޮށްލެވޭ ސްޕޯޓްސް ލެޖެންޑުން ބައިވެރިވެ އެވެ. އޭގެ ތެރޭގައި ސްރީލަންކާ، ބަންގްލަދޭޝްގެ ސްޕޯޓްސް މިނިސްޓަރުން ހިމެނެ އެވެ.
"އެކުވެރި ބައެއް ގައުމުތަކުގެ ވަޒީރުންނާއި ދުނިޔޭގެ ވަރުގަދަ ލެޖެންޑުންނާ އެކު، އެހެން ބައެއް ގައުމުތަކެކޭ އެއްފަދައިން މިއަދު މިއަޅަނީ ކުޑަ ގައުމަކުން ކުރިއަށް އަޅާ ބޮޑު ފިޔަވަޅެއް،" އޭނާ މިރޭ ވިދާޅުވި އެވެ.
މިރޭގެ ސްޕޯޓްސް އެވޯޑްސް ހަފްލާ އާއެކު މުޅި ދުނިޔެ އަށް ރާއްޖެ އިޝްތިހާރު ވެގެންދާނެ ކަމަށް މަހްލޫފް ވިދާޅުވި އެވެ. އަދި، މި ހަފްލާގައި ބައިވެރިވި އެއްވެސް ކުޅިވަރު ލެޖެންޑަކު އެޕިއަރެންސް ފީއެއް ނަގާފައި ނުވާ ކަމަށް ވެސް މަހްލޫފް ވިދާޅުވި އެވެ.
މިރޭގެ އެވޯޑްސްގައި ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް، ނެދަލެންޑްގެސް ކުރީގެ ފުޓްބޯޅަ ތަރި އެޑްގާ ޑާވިޑްސް އަދި ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯގެ އިތުރުން އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ، ޓީޓީ ތަރި ޒޯރާން ޕްރިމޯރަކް އާއި ސްރީލަންކާގެ ކްރިކެޓް ލެޖެންޑް ސަނަތު ޖަޔަސޫރިޔާ އާއި އިންޑިއާގެ ކްރިކެޓް ލެޖެންޑް ސުރޭޝް ރައިނާ، ބްރެޒިލްގެ ވޮލީ ޗެމްޕިއަން ގިލްބާޓޯ ގޮޑޯއި (ގީބާ)، ސެނެގާލްގެ ކުރިގެ ފުޓްބޯޅަ ތަރި ހަލީލޫ ފަޑީގާ، ޕްރޮފެޝަނަލް ވީލް ޗެއާ ޓެނިސް އެތުލީޓް ގޯޑަން ރީޑް އަދި ސްރީ ލަންކާގެ ނެޓްބޯޅަ ލެޖެންޑް ތަރްޖިނީ ސިވަލިންގަމް، ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް، ޕޫލް ބިލިއާޑްގެ ދުނިޔޭގެ ޗެމްޕިއަން އޮސްޓްރިއާގެ އަލްބިން އޫޝާން އަދި ކުރީގެ ދުނިޔޭގެ އެންމެ މޮޅު ރެފްރީ ޖަރުމަނުގެ މާކަސް މާކް ބައިވެރިވެ އެވެ. މީގެ އިތުރުން، މަޝްހޫރު ކުޅިވަރު ނޫސްވެރިޔާ ފަބްރީޒިއޯ ރޮމާނޯ ވެސް ބައިވެރިވެ އެވެ.
