އ. އިހަވަންދޫ އައިސްޕްލާންޓް ތެރޭގައި އިސްމާއިލް އުމަރު (އިއްސެ) އަނިޔާވެރި ގޮތަކަށް މަރާލި މައްސަލަ ސާބިތުކުރެވޭނެ ކަމުގެ ބޮޑު އުންމީދަކާ އެކު، އެ މައްސަލައިގެ އަޑުއެހުންތައް ކްރިމިނަލް ކޯޓުގައި ނިންމާލައިފި އެވެ.
އައިސްޕްލާންޓްގެ މެކޭނިކެއްގެ ގޮތުގައި މަސައްކަތް ކުރި އުމުރުން 54 އަހަރުގެ އިއްސެ މަރާލާފައި އޮއްވާ ފެނުނީ 2017 ވަނަ އަހަރުގެ ޖޫން މަހުގެ 16 ވަނަ ދުވަހު އެވެ. އިއްސެ މަރާލިތާ އެއް ދުވަސް ފަހުން ކުޅުދުއްފުށީގައި ފިލައިގެން އުޅެނިކޮށް އެ ގަތުލުގެ ތުހުމަތުގައި ބަންގްލަދޭޝް ރައްޔިތެއް ކަމަށްވާ ސުމޮން ހައްޔަރު ކުރި އެވެ.
ސުމޮން ވަނީ ފުލުހުންގެ ތަހުގީގުގައި އަދި ޝަރީއަތުގެ މަޖިލީހުގައި ވެސް އިއްސެ މަރާލި ކަމަށް އިއުތިރާފުވެފަ އެވެ. ނަމަވެސް ޝަރީއަތުގެ އިއުތިރާފުން ރުޖޫއަވީ، ފުލުހުން ބިރު ދައްކައި އަނިޔާކޮށް، މަޖުބޫރުކުރިވި ކަމަށް ބުނެ އެވެ.
ހުލާސާ ބަޔާން އިއްވުމަށް މިއަދު ބޭއްވި އަޑުއެހުމުގައި ދައުލަތުން ބުނީ ކްރިއިމް ސީނުން ލިބުނު ފިންގާ ޕްރިންޓްތައް ސުމޮންއާ ގުޅުވާލެވޭތީއާ، އޭނާ ކުށަށް އިއުތިރާފްވެފައި ވާތީ، އެ ދައުވާ ސާބިތު ކުރެވޭނެ ކަމުގެ އުންމީދު ބޮޑު ކަމަށެވެ.
ސުމޮން މިއާ އޭނަގެ އިއުތިރާފުން ރުޖޫއަވީ ހުލާސާ ބަޔާން އިއްވަން ކައިރިވެފައިވަނިކޮށެވެ. ފުލުހުން އޭނާއަށް އަނިޔާކޮށް މަޖުބޫރުކުރުވުން އިއުތިރާފުވި ކަމަށް ސުމޮން ބުނުމުން، އެކަން ސާފުކުރުމަށް ހާޒިރުކުރި ފުލުހުންގެ ހެކިބަހުގައި ފުށުއެރުންތަކެއް ހުރިކަން ދިފާއުން ފާހަގަކުރި އެވެ. ނަމަވެސް އޭނާގެ މައްޗަށް ކުރާ ދައުވާ ނަފީ ކުރެވޭ ވަރުގެ ދިފާއުއެއް ނެނގިފައެއް ނުވެ އެވެ.
މިއަދުގެ އަޑުއެހުން ނިންމާލީ އެ މައްސަލަ މި މަހު ނިންމާނެ ކަމަށް ބުނެ އެވެ.
މި މައްސަލައިގައި ދެފަރާތުން ހުލާސާ ބަޔާން އިއްވާފައިވާއިރު، ދެން އޮންނާނީ މައްސަލަ ސާބިތުވޭތޯ ނުވަތަ ނޫންތޯ ކަނޑައެޅުމަށް ބާއްވާ އަޑުއެހުމެކެވެ. ދައުވާ ސާބިތުވެއްޖެނަމަ، ދެން އޮންނާނީ ވާރިސުންގެ ހެކިބަސް ނަގައި، ހުކުމް ކުރުމެވެ.
