ދިރޭތަކެތީގެ ތެރެއިން ހިމާޔަތް ކޮށްފައިވާ ތަކެތި ކަނޑައެޅުމުގައި ބަލާނެ ރަސްމީ މިންގަނޑު ގަވާއިދުގައި ހިމަނައި އާންމުކޮށްފި އެވެ.
އެ ގަވައިދަށް މިހާރު ގެނެސްފައިވާ އިސްލާހުގައި ބުނީ ނެތިދިޔުމުގެ ބިރު ހީވެފައިވާ ދިރޭތަކެތީގެ ތެރެއިން ރާއްޖޭގެ މާހައުލަށް ނޭޓިވް ދިރޭތަކެއްޗާއި، ރާއްޖެއަށް ހިޖުރަކުރާ ދިރޭތަކެތީގެ ތެރެއިން، ނެތިދިޔުމުގެ ބިރުހީވެފައިވާ ދިރޭތަކެތި ކަނޑައަޅާނީ "ގައިޑްލައިންސް ފޯ ޔޫޒިން ދަ އައިޔޫސީއެން ރެޑް ލިސްޓް ކެޓަގަރީޒް އެންޑް ކްރައިޓީރިއާ" ގައި ބަޔާންކޮށްފައިވާ އުސޫލުތަކާ އެއްގޮތްވާ ގޮތުގެ މަތިން ކަމަށެވެ.
ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭތަކެއްޗާބެހޭ ގަވާއިދަށް ގެނެސްފައިވާ އިސްލާހުގައި ބުނާ ގޮތުން ހިމާޔަތްކޮށް ރައްކާތެރިކޮށްފައިވާ ދިރޭތަކެއްޗާމެދު އަމަލުކުރާނެ ގޮތުގެ އުސޫލުތަކާއި މެނޭޖްމަންޓް ޕްލޭނެއް އެ ގަވާއިދަށް އަމަލުކުރަން ފަށާތާ ހަ މަސްދުވަހުގެ ތެރޭގައި، އެޖެންސީގެ މަޝްވަރާއާއެކު އެކުލަވަލަން ޖެހެ އެވެ.
އަދި އެ މެނޭޖްމަންޓް ޕްލޭންތައް، މަދުވެގެން ފަސް އަހަރުން އެއް ފަހަރު އެޖެންސީން މުރާޖާ ކުރަން ވެސް ޖެހެ އެވެ.
ނެތިދިއުމުގެ ބިރު ހީވެފައިވާ ދިރުންތަކާއި އެ ތަކެއްޗަށް ކުރިމަތިވެފައިވާ ނުރައްކާތައް ދެނެގަނެ، އެ މިންގަނޑުތައް ބަހާލާފައި ވަނީ 14 ކެޓަގަރީއަކަށެވެ. އެއީ؛
- ނެތިގޮސްފައިވާ
- ގުދުރަތީ މާހައުލުން ނެތިގޮސްފައިވާ
- ނެތިދިއުމުގެ ނުރައްކާ ކުރިމަތިވެފައިވާ ކެޓަގަރީތައް
- ނާޒުކު ފައްތަރެއް/ ހާލަތެއްގައިވާ
- ނެތިދިއުމުގެ ބިރު ކުރިމަތިވެފައިވާ
- ނެތިދިއުމުގެ ނިރައްކަލަށް ހުށަހެޅިފައިވާ
- ނެތިދިއުމުގެ ނުރައްކާ ކުރިމަތިވެދާނެ
- ހާލަތު ރަނގަޅު
- އެކަށީގެންވާ ވަރަށް މައުލޫމާތު ނެތް
- އެއްވެސް ކެޓަގަރީއަކަށް ނުފެތޭ
- މީޒާންކޮށްފައި ނުވާ
- ނެތިދިއުމުގެ ނުރައްކާ
- އެކަށީގެންވާ ވަރަށް މައުލޫމާތު ލިބެންހުރި
- މީޒާންކޮށްފައިވާ
"ނޭޝަނަލް ރެޑްލިސްޓް" ހެދުމުގެ މަސައްކަތް އެންވަޔަރްމެންޓް މިނިސްޓްރީން މިހާރު ވަނީ ފަށައިފަ އެވެ. ގިނަ ގައުމުތަކުގައި "ރެޑް ލިސްޓް" އެކުލަވާލަނީ އިންޓަނޭޝަނަލް ޔޫނިއަން، އައިޔޫސީއެންގެ އެ އުސޫލުތަކާ އެއްގޮތަށެވެ.
ނެތިދިޔުމުގެ ބިރުހީވެފައިވާ ދިރޭތަކެތި ހިމެނުމަށް ލިސްޓެއް ކަންޑައެޅުމުގެ މަސައްކަތް ކުރަމުން ދާއިރު، ދާދި ފަހުން ވަނީ ރާއްޖެ އެތެރެކުރި ދޫނިތަކެއް ފިޝަރީޒް މިނިސްޓްރީން މަރާލި މައްސަލައެއް ފެންމަތިވެފަ އެވެ.
މަރާލި 120 ދޫނީގެ ތެރޭގައި އިންޓަނޭޝަނަލް ޔޫނިއަން ފޯ ކޮންވަޒޭޝަން އޮފް ނޭޗާގެ ރެޑް ލިސްޓުގައި ނެތިދާނެ ކަމުގެ ބިރު ބޮޑު ލިސްޓުގައި ހިމެނޭ ސަދަން މިލީ އެމެޒޯން ނޫނީ އެމެޒޯނާ ފެރިސޯނާގެ ދޫނިތަކެއް ހިމެނެ އެވެ. އެކަމަކު އެތަނުގައި ހުރި ހުރިހާ ބާވަތެއްގެ ދޫންޏަކީ ކޮން ވައްތަރުތަކެއް ދޫނި ކަމެއް ސާފެއް ނުވެ އެވެ.
