ރާއްޖެއަށް އެތެރެކުރާ ތެލުގެ ކޮލިޓީ ޓެސްޓުކޮށް, ކަށަވަރުކުރާ ފިއުލް ޓެސްޓިން ލެބޯޓްރީއެއް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން މިއަދު ހުޅުވައިފި އެވެ.
އެސްޓީއޯ ޓްރޭޑް ސެންޓަރުގައި ހުޅުވި އެ ލެބޯޓްރީއަކީ ބާޒާރުން ލިބެން ހުރި ތެލުގެ ބާވަތްތަކުގެ ކޮލިޓީ ދެނެގަތުމަށާއި ދަށް ކޮލިޓީ ތެލުގެ މައްސަލަ ހައްލުކުރަން، އެސްޓީއޯއިން ހަރަދުކޮށްގެން އެޅި ލެބޯޓްރީއެކެވެ. އެ ލެބޯޓްރީ މެނޭޖުކޮށް ހިންގާނީ ޖިއޯ ކެމް މިޑްލް އީސްޓް ކުންފުނިންނެވެ.
ޔޫއޭއީގެ ޑުބާއިގައި މަރުކަޒުވެފައިވާ ޖިއޯ ކެމްއަކީ 1999 އިން ފެށިގެން ފުޅާދާއިރާއެއްގައި ތެލުގެ އުފެއްދުންތަކާއި ކެމިކަލް އިންސްޕެކްޓު ކުރުމާއި ޓެސްޓު ކުރުމުގެ ހިދުމަތް ދެމުންދާ ކުންފުންޏެކެވެ. މިހާރު ވެސް 17 ގައުމެއްގައި ޖިއޯ ކެމުން ދަނީ ފިއުލް ޓެސްޓިން ހިދުމަތް ދެމުންނެވެ.
އެސްޓީއޯ ޖިއޯ ކެމް ލެބޯޓްރީން ޖެޓް ފިއުލްގެ އިތުރުން ޕެޓްރޯލާއި ޑީސަލުގެ ކޮލިޓީ އެޝުއަރަންސް ޓެސްޓުތައް ހެދެ އެވެ.
އެސްޓީއޯއިން ބުނި ގޮތުގައި ބައިނަލްއަގުވާމީ ފެންވަރުގެ މި ލެބޯޓްރީން ދޫކުރާ ސެޓިފިކެޓަކީ ބައިނަލްއަގުވާމީ ފެންވަރުގައި ބަލައިގަންނަ ސެޓިފިކޭޝަނެކެވެ. އަދި ލެބުން ހިދުމަތް ހޯދާ މީހުންނަށް ފަސޭހައިން އަވަހަށް ނަތީޖާ ލިބޭނެ ކަމަށާއި ގިނަ ހަރަދުތަކެއް ވެސް ސަލާމަތްކުރެވޭނެ ކަމަށް ބުންޏެވެ.
މިހާރު ރާއްޖޭގައި ތެޔޮ ޓެސްޓު ކުރެވޭނެ ގޮތެއް ނެތް އިރު، ޓެސްޓު ކުރަން ބޭނުންވެއްޖެ ހާލަތެއްގައި ޖެހެނީ އެހެން ގައުމަކަށް ފޮނުވާށެވެ. މިސާލަކަށް ޖެޓް ފިއުލަކީ ވަކި މިންގަނޑުތަކަކަށް ނުފެތޭ ހާލަތުގައި ބޭނުން ނުކުރެވޭ އެއްޗަކަށް ވީތީ، ޓެސްޓު ކުރަން މަޖުބޫރެވެ. މިކަން ކުރަން ޖެހެނީ ބޭރަށް ފޮނުވައިގެންނެވެ.
އެކަމަކު އެސްޓީއޯގެ ލެބޯޓްރީން ޓެސްޓު ކުރަން ފެށުމުން، މިހާރު ޖެޓް ފިއުލް ޓެސްޓު ކުރަން ދާ ހަރަދުން ބޮޑު ބަޔެއް ސަލާމަތް ކުރެވޭނެ އެވެ.
މި ލެބޯޓްރީ ހުޅުއްވައިދެއްވުމަށް ފަހު އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ވިދާޅުވީ އެސްޓީއޯ ލެބޯޓްރީން ހެޔޮ އަގުގައި އަވަހަށް ނަތީޖާ ލިބޭނެ ކަމަށެވެ. އެހެންކަމުން މިއީ ބޮޑު ފަސޭހައަކަށް ވެގެން ދާނެ ކަމަށް އޭނާ ވިދާޅުވި އެވެ.
"ޓެސްޓުތަކުގެ އަގު ބޭރު ތަންތަނަށް ވުރެ ހެޔޮވާނެ. އެކި ޓެސްޓުތައް އުޅޭނީ އެކި އަގުގައި. ލެބޯޓަރީގެ ސަބަބުން ރައްޔިތުންނަށް ވަރަށް ފައިދާ ވާނެ،" އަމްރު ވިދާޅުވި އެވެ.
ޖިއޯ ކެމް ފިއުލް ޓެސްޓިން ލެބޯޓްރީގައި ބޭނުންކުރާ މެޝިނެއް. -- ފޮޓޯ: އެސްޓީއޯ
ޖިއޯ ކެމްގެ ލެބޯޓްރީގައި މަސައްކަތް ކުރާނީ އެ ކުންފުނީގެ ސަޓިފައިޑް ކެމިސްޓުންނެވެ. އެކަމަކު މުސްތަގުބަލުގައި މި ލެބޯޓްރީގައި މަސައްކަތް ކުރާނެ ދިވެހިން ބިނާކުރަން އެ ކުންފުނީގެ ވިސްނުން އެބަހުއްޓެވެ. އެސްޓީއޯއިން ވެސް ވަނީ މީހުން ބިނާކުރަން އެއްބާރުލުން ދޭނެ ކަމަށް ބުނެފަ އެވެ.
މި ލެބޯޓްރީއަކީ އައިއެސްއޯ/އައިއީސީ މިންގަނޑަށް ފެތޭ ލެބޯޓްރީއެކެވެ. މިހެންކަމުން މި ލެބޯޓްރީން ދޫކުރަން ޓެސްޓުތައް ދުނިޔޭގެ ކޮންމެ ތަނަކުން ވެސް ބަލައިގަންނާނެ ކަމަށް އެސްޓީއޯއިން ބުންޏެވެ.
