ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއްވި މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރު އައިމިނަތު އީމާން ނިޔާވި ކަމަށް އޭޑީކޭ ހޮސްޕިޓަލުން މިއަދު ހެނދުނު ނިންމައިފި އެވެ.
އެ ހޮސްޕިޓަލުގެ މެނޭޖިން ޑިރެކްޓަރު އަފާލް އަހުމަދު "އަދަދު"އަށް ވިދާޅުވި ގޮތުގައި އީމާން ނިޔާވި ކަމަށް ނިންމާފައި ވަނީ މިއަދު ހެނދުނު 7:42ގަ އެވެ.
އިއްޔެ ދެ ފަހަރެއްގެ މަތިން އީމާން ނިޔާވެއްޖެ ކަމަށް މީޑިއާ އަދި ސޯޝަލް މީޑިއާގައި ހަބަރު ދައުރުވެފައިވެ އެވެ. މީޑިޔާތަކުން އެގޮތަށް ރިޕޯޓް ކުރީ މާލެ ސިޓީ ކައުންސިލްގެ މީޑިއާ ޑިރެކްޓަރު، މަރިޔަމް ޝިއުނާ އެފަދައިން މައުލޫމާތު ހިއްސާކުރުމުންނެވެ.
ނަމަވެސް, ފަހުން އޭޑީކޭއިން ވަނީ އޭނާ ނިޔާވި ކަމަށް ކަނޑަނާޅާ ކަމަށް ބުނެ، އެ ހަބަރުތައް ދޮގުކޮށްފަ އެވެ. އެއާ އެކު ސިޓީކައުންސިލުން ވެސް ވަނީ މައުލޫމާތުގެ ސައްހަކަން ޔަގީންނުކޮށް މީޑިއާތަކާ ހިއްސާކުރެވުނު ކަމަށްޓަކައި މާފަށް އެދިފަ އެވެ.
ހޮސްޕިޓަލުން އޭރު އެހެން ބުނީ އީމާންއާމެދު ޑޮކްޓަރުން އުއްމީދު ކަނޑާލައި ވެންޓިލޭޓަރުން ނަގަން ނިންމާފައިވަނިކޮށް, ޑޮކްޓަރުންނަށް އޭނާގެ ފަރާތުން އުއްމީދެއް ފެނުމާ ގުޅިގެންނެވެ. ނަމަވެސް, ވެންޓިލޭޓަރުގައި ފަރުވާ ދެމުން ދިޔަ އީމާންއަށް އެކްސިޑެންޓުން ލިބުނު ޒަހަމްތަކުން އަރައިނުގަނެވި, މިއަދު ހެނދުނު އޭނާ ނިޔާވެއްޖެ ކަމަށް އެންމެފަހުން ޑޮކްޓަރުން ކަނޑައެޅީ އެވެ.
އީމާން އެކްސިޑެންޓްވީ ހުޅުމާލޭގައި ކުލަ ނުލައި ހުރި ބަންޕަރެއް މަތިން ބާރު ސްޕީޑުގައި ސައިކަލް ދުއްވާފައި ދަނިކޮށް ކަހާލުމުގެ ސަބަބުންނެވެ. އިއްޔެ ހަވީރު ހިނގި އެ އެކްސިޑެންޓުގައި އީމާންގެ ބޮލަށް ބޮޑެތި އަނިޔާތަކެއްވެ، ސިކުނޑިއަށް ލޭ އެޅިފައިވާ ކަމަށް ޑޮކްޓަރުންނާ ހަވާލާދީ މާލެ ސިޓީ ކައުންސިލްގެ އޮފިޝަލުން ވަނީ މީގެ ކުރިން ބުނެފަ އެވެ.
