ގައުމީ ބާސްކެޓްބޯޅަ ލީގުގައި ޗެމްޕިއަން ކުއީންސް ބާސްކެޓްބޯޅަ ކުލަބާއި ސައިކްލޯން ބާސްކެޓްބޯޅަ ކުލަބު ވާދަކުރި މެޗު ފޯރިގަދަ ކުޅުމަކަށް ފަހު ސައިކްލޯން ކާމިޔާބުކޮށްފި އެވެ.
ފަނަރަ ވަނަ ގައުމީ ބާސްކެޓްބޯޅަ ލީގުގައި މި އަހަރު ހަ ޓީމަކުން ވާދަކުރެ އެވެ. އެއީ ކުއީންސް، ސައިކްލޯން، އެލީޓް ސްޕޯޓްސް ކުލަބު، ލަޔަނެސް ސްޕޯޓްްސް ކުލަބު، ބެންޗް ސްޕޯޓްސް ކުލަބު އަދި ކީންސް ސްޕޯޓްސް ކުލަބެވެ.
އަންހެން ޑިވިޝަންގައި މިހާތަނަށް ކުޅުނު އެންމެ ފޯރިގަދަ އަދި ވާދަވެރި މެޗު ޗެމްޕިއަން ކުއީންސްއާ ވާދަކޮށް ސައިކްލޯނުން ވަނީ 64-62 ޕޮއިންޓުން ކާމިޔާބުކޮށްފަ އެވެ. ކުއީންސް އަކީ އެންމެ ފަހުން 2019 ވަނަ ބޭއްވި ގައުމީ ލީގާއި ގައުމީ ބާސްކެޓްބޯޅަ މުބާރާތުގެވެސް ޗެމްޕިއަނެވެ. މި ދެ މުބާރާތް ވެސް ކުއީންސް ކާމިޔާބުކުރީ އެއްވެސް މެޗަކުން ބަލިނުވެ އެވެ.
މެޗުގެ ފުރަތަމަ ތިން ކުއާޓާ ނިމުނުއިރު ކުއީންސް އޮތީ 11 ޕޮއިންޓްގެ ލީޑެއްގަ އެވެ. ފަހު ކުއާާޓާގައި އެޓީމަށް 12 ޕޮއިންޓްގެ ލީޑެއް ވެސް ލިބުނެވެ. ނަމަވެސް ބިދޭސީ ކުޅުންތެރިޔާ އަނާ ބޮރޮންޔަކް، ޝައިލާން އަފްޒަލް އަދި ފާތިމަތު އިޔާދާގެ މޮޅު ކުޅުމާއިއެކު ސައިކްލޯނުން ފަހު ކުއާޓާގައި އެކަނި 21 ޕޮއިންޓް ހޯދި އެވެ. ކުއީންސް އަށް މި ކުއާޓާގައި އެއްކުރެވުނީ އެންމެ އަށް ޕޮއިންޓެވެ. އެ ޓީމުން މި ކުއާޓާގައި ސްކޯކުރަން ލިބުނު ގިނަ ފުރުސަތުތަކެއް ބޭކާރުކޮށްލި އެވެ.
މި މެޗުގެ މޮޅު ކުޅުންތެރިޔާގެ މަގާމް ލިބުނީ ކުއީންސްގެ އާމިނަތު ޝިއުރާ އަބްދުލްބާރީ އަށެވެ. އޭނާ 27 ޕޮއިންޓް ހޯދައިދީ 25 ރީބައުންޑް ނަގައި 5 އެސިސްޓް ކުރިއެވެ. ސައިކްލޯނަށް ބަލާއިރު، އަނާ ވަނީ އެ ޓީމަށް 30 ޕޮއިންޓް ހޯދައިދީ 12 ރިބައުންޑް ނަގައިދީފަ އެވެ.
މުބާރާތުގެ އަންހެން ޑިވިޝަންގައި ކުޅުނު އެހެން މެޗުތަކަށް ބަލާއިރު، ބެންޗުން ވަނީ ކީންސްގެ މައްޗަށް 124 ޕޮއިންޓް 21 ޕޮއިންޓުން ކުރި ހޯދައިފަ އެވެ. މެޗުގައި ބެންޗުގެ އިފާ އާތިފް އެޓީމަށް 52 ޕޮއިންޓް ހޯދައިދިންއިރު، އާމިނަތު އިސްރާއު ބެންޗަށް 48 ޕޮއިންޓް ހޯދައިދިނެވެ. ކީންސްއަށް އެންމެ ރަނގަޅު ކުޅުމެއް ދައްކައިދިނީ އެޓީމަށް 12 ޕޮއިންޓް ހޯދައިދިން އައިޝަތު އުމޭރާއެވެ.
އަންހެން ޑިވިޝަންގައި އެލީޓުން ވެސް ވަނީ އެ ޓީމު ކުޅުނު ދެވަނަ މެޗު ކާމިޔާބުކޮށްފަ އެވެ. ލަޔަނެސްއާ ވާދަކޮށް އެ ޓީމުން މި މެޗު ކާމިޔާބުކުރީ 75-49 ޕޮއިންޓުންނެވެ. މެޗުގައި އެލީޓްގެ އައިޝަތު އިނާޝާ އެޓީމަށް 18 ޕޮއިންޓް ހޯދައިދިންއިރު، ލީމް އަލީ ޝާހިދު އެޓީމަށް 15 ޕޮއިންޓް ހޯދައިދިނެވެ. ލަޔަނެސް އަށް އެންމެ ރަނގަޅު ކުޅުމެއް ދައްކައިދިނީ 14 ޕޮއިންޓް ހޯދައިދިން އައިޝަތު ޔާނިއާ އެވެ.
މުބާރާތުގައި މިއަދު ކުޅޭނީ ފިރިހެން ފިރިހެން ބައިގެ ތިން މެޗެވެ. ހަވީރު ކުޅޭނީ ދެ ވަނަ ޑިވިޝަންގެ ނައިޓްސް ބީސީ އާއި ވައިޕާސް ބީސީ އެވެ. މިރޭ ކުޅޭނީ ފުރަތަމަ ޑިވިޝަންގެ ދެ މެޗެވެ. ފުރަތަމަ މެޗުގައި ރެޕްޓާސް ބީސީ ނުކުންނާނީ ސްޓިންގާސް ބީސީއާ ދެކޮޅަށެވެ. އަދި ފަހު މެޗުގައި ބައުސް ނުކުންނާނީ ޗެމްޕިއަން ކިންގްސް ބީސީއާ ދެކޮޅަށެވެ.
