އުރީދޫ ދިވެހި ޕްރިމިއާ ލީގުގައި މިރޭ ސްޕެއިންގެ މިޑްފީލްޑަރު ޓަނާ ޑޮމިންގޭޒް، މާޒިޔާ ސްޕޯޓްސް އެންޑް ރެކްރިއޭޝަނަށް ޖަހައިދިން ފުރަތަމަ ގޯލާ އެކު 2-0 އިން ކްލަބް އީގަލްސް ބަލިކޮށް މާޒިޔާ ލީގުގައި މޮޅުވުމުގެ ރެކޯޑް ދަމަހައްޓައިފި އެވެ.
ސީޒަނުގެ ފުރަތަމަ މުބާރާތް، ޕްރެޒިޑެންޓްސް ކަޕްގައި މާޒިޔާ އިން ނުކުތީ މުހައްމަދު ޝިޔާޒް (މޯހަން)ގެ ކޯޗުކަމުގަ އެވެ. މޯހަންއާ އެކު ފުރަތަމަ ފަސް މެޗުން މޮޅުވި ނަމަވެސް ޕްރެޒިޑެންޓްސް ކަޕް ފައިނަލް ހިމެނޭ ގޮތަށް ފަހު ތިން މެޗުން ވީ ބައްޔެވެ. އެހެންވެ، މާޒިޔާ އިން މޯހަން ވަކިކޮށް އެ މަގާމަށް ގެނައީ ޔޫރަޕާއި އޭޝިއާ އަދި އެފްރިކާގެ މަތީ ފަންތީގައި މަސައްކަތް ކޮށްފައިވާ ކޯޗު ސާބިއާގެ މަޔޮޑްރަގް ޖެސިކް އެވެ.
ޖެސިކްގެ އިރުޝާދުގެ ދަށުން ލީގުގައި ކުޅުނު ދެ މެޗުން އެންމެ ފަހުގެ ޗެމްޕިއަން މާޒިޔާ ވަނީ މޮޅުވެފަ އެވެ. ފުރަތަމަ ސުޕަ ޔުނައިޓެޑް ސްޕޯޓްސް (ސަސް) އަތުންނެވެ. އަދި މިރޭ އީގަލްސް އަތުންނެވެ.
މިރޭގެ މެޗުގެ ފުރަތަމަ ހާފުގައި ދެ ޓީމަށް ވެސް މާ ނުރައްކާތެރި ހަމަލާތަކެއް ފޮނުވާނުލެވުނެވެ. މާޒިޔާގެ ކުރިއަށް ކުޅޭ ސެއިން ވިންސެންޓްގެ ފޯވާޑް ކޮނޭލިއަސް ސްޓެވާޓް (ކޯނޭ) އަށް ލިބޭ ބޯޅަތަކުގައި ގޯލަށް މާ ނުރައްކާކުރެވޭ ގޮތެއްނުވި އެވެ.
އަނެއްކޮޅުން އީގަލްސްގެ ހަސަން ރާއިފް އަހުމަދު (ހަންނަ) އާއި އަހުމަދު ރިޒްވާން (ރިޒޭ) އަށް ލިބޭ ބޯޅަތަކުގައި މާޒިޔާ އިން ވަނީ ރަނގަޅަށް ޑިފެންސްކޮށްފަ އެވެ.
މާޒިޔާ އިން ދެ ވަނަ ހާފް ފެށިގެން ހަތް މިނިޓް ތެރޭ ރަނގަޅު ހަމަލާއެއް ފޮނުވާލި އެވެ. އިބްރާހިމް މަހުދީ (ފޭދޫ އިއްބެ) ބޮލުން ޖެހި ބޯޅަ އީގަލްސްގެ ލެބަނަން ކީޕަރު މުހައްމަދު ތަހާ ވަނީ މަތަކޮށްފަ އެވެ.
މާޒިޔާ އިން ލީޑު ނެގީ މެޗުގެ 67 ވަނަ މިނިޓްގައި ޓަނާ ޖެހި މޮޅު ގޯލުންނެވެ. ހައިޝަމް ހަސަން (ބިޑި) ނެގި ހުރަހަކުން އޭރިއާތެރެއިން ފޭދޫ އިއްބެ ބޮލުގައި ޖެހިފައި ޓަނާ އަށް ލިބުނު ބޯޅަ އޭނާ ވަނީ އެއް ފަހަރުން ވޮލީ އަކުން ގޯލުގެ ދުރު ކަނަށް ފޮނުވާލައިފަ އެވެ. މިއީ ކުރިން ސްޕެނިޝް ލަލީގާގައި ލަސް ޕަލްމާސް އަށް ކުޅުނު ޓަނާ މާޒިޔާ ޖޯޒީގައި ޖެހި ފުރަތަމަ ގޯލެވެ.
ލަނޑު ޖެހުމަށް ފަހު މާޒިޔާގެ ކުޅުންތެރިން އުފާފާޅުކުރަނީ.-- ފޮޓޯ: އަބްދުﷲ އިޔާން/ އަދަދު
ނަތީޖާ ހަމަހަަމަ ކުރަން އީގަލްސް އިން ކުރި އެޓޭކްތަކުގައި އަލިމަގެއް ނުފެނުނެވެ. ހަންނަ އާއި ރިޒޭގެ އިތުރުން އީގަލްސްގެ އެޓޭކްގައި ކުރިއަށް ކުޅެމުންދިޔަ އަހުމަދު ހަސަން (އައްމަޑޭ) އަށް ލިބުނު ބޯޅަތަކުގައި މާޒިޔާގެ ގޯލުގައި ހުރި ނޭޕާލްގެ ކިރަން ކުމާރް ޝެމްޝޮން ޓެސްޓްކޮށްލެވޭ ގޮތެއްނުވި އެވެ.
މާޒިޔާ އިން އިތުރު ވަގުތުގައި ދެ ވަނަ ގޯލެއް ޖެހި އެވެ. މި ލަނޑު ޖެހީ ބަދަލު ކުޅުންތެރިއެއްގެ ގޮތުގައި ކުުޅެން އެރި ނާއިޒް ހަސަން (ދާދު) އެވެ. އީގަލްސް ޑިފެންސް ފަހަތަށް އައި ބޯޅައެއްގައި އެ ޓީމުގެ ކީޕަރު ތޯހާ ކުރިއަށް އަރައި ބޮލުން ފޮނުވާލުމުން ހާފުގެ މެދެއްހާ ހިސާބުން ލިބުނީ ދާދު އަށެވެ. އެ ބޯޅަ ހިފައިގެން އޭރިއާތެރެއަށް ވަދެ ދާދު ޖެހި ޝޮޓް ވަނީ ގޯލުގެ މަތީ ކަނަށެވެ.
މިއީ އީގަލްސްގެ ވަގުތީ ހެޑް ކޯޗެއްގެ ޒިންމާ ނަގައިގެން ހުރި އަހުމަދު ނިމާދު (ނިމާ)، ހުއްޓައި އީގަލްސްގެ ޓީމެއް ފަހުގެ ތާރީހެއްގައި ބަލިވި ފުރަތަމަ ފަހަރެވެ. މިދިޔަ ސީޒަނުގައި އީގަލްސްގެ ކޯޗަކަށް ހުރެފައި މޯހަން ވަކިވި ފަހުން ވަގުތީ ކޯޗެއްގެ ގޮތުގައި އީގަލްސް ގޮވައިގެން ނުކުމެ، ނިމާ ވަނީ މާޒިޔާއާ އެއްވަރުކޮށްފަ އެވެ. އީގަލްސް އަށް ދާދި ފަހުން ނިމުނު 19 އަހަރުން ދަށުގެ ޔޫތު މުބާރާތުގެ ޗެމްޕިއަންކަން ހޯދައިދިނީ ނިމާގެ ކޯޗުކަމުގަ އެވެ. އެއީ މެޗަކުން ބަލިނުވެ، ހޯދި ކާމިޔާބެކެވެ.
ދިވެހި ޕްރިމިއާ ލީގުގައި މާދަމާ ހަވީރު ދަ ގްރާންޑޭ ސްޕޯޓްސް ކްލަބް ކުޅޭނީ ޔުނައިޓެޑް ވިކްޓްރީ (ޔޫވީ)އާ އެވެ. އަދި މާދަމާރޭ ކްލަބް ގްރީން ސްޓްރީޓްސް އިން ނުކުންނާނީ ކްލަބް ވެލެންސިއާއާ ދެކޮޅަށެވެ.
