މަސްތުވާތަކެއްޗާ ގުޅޭ ހުރިހާ މައުލޫމާތެއް އެއްތަނަކުން ލިބޭ ފުލުހުންގެ އިންޓަގްރޭޓެޑް ޑްރަގް އެންފޯސްމަންޓް ޑޭޝްބޯޑް މިއަދު ލޯންޗުކޮށްފި އެވެ.
އިންޓްގްރޭޓެޑް ޑޭޝްބޯޑަކީ މަސްތުވާތަކެތީގެ މައްސަލަތަކާ ގުޅޭ ތަފާސްހިސާބާއި އެ މައްސަލަތަކާ ގުޅޭ ތަފާތު އިތުރު މައުލޫމާތާއި ޑޭޓާތައް އެއްތާކުން ފަސޭހައިން ފެންނާނެހެން ތައްޔާރުކޮށްފައިވާ ސިސްޓަމެކެވެ.
އެ ޕޯޓަލަކީ މި އަހަރު ފެށުނީއްސުރެ ބޭނުން ކުރަމުންދާ ޕޯޓަލެކެވެ. ނަމަވެސް އެ ޕޯޓަލް ރަސްމީކޮށް ބޭނުން ކުރަން ފަށާފައި ވަނީ މިއަދު ނޫސްވެރިންނާއެކު ބޭއްވި ހާއްސަ ރަސްމިއްޔާތެއްގަ އެވެ. އެ ޕޯޓަލް އިފްތިތާހުކޮށްދެއްވާފައި ވަނީ ޕޮލިސް ކޮމިޝަނާ މުހައްމަދު ހަމީދެވެ.
އޭގެ މައިގަނޑު މަގުސަދަކީ ފުލުހުންގެ މުއައްސަސާއިން ކުރެވޭ މަސައްކަތްތަކުގެ އަސްލު މައުލޫމާތު އާންމުންނަށް ފޯރުކޮށްދިނުމަށް ގާއިމް ކުރެވުނު ޕޯޓަލެއް ކަމަށް ފުލުހުން ބުންޏެވެ.
"އެގޮތުން އުންމީދަކީ ކުރިއަށް އޮތް ތަނުގައި އަތޮޅު ކޮމާންޑާ ލެވެލްގައި ފެށިގެން ހުރިހާ ޑިޒިޝަނެއް ނެގުމަށްޓަަކައި އެ ބޭފުޅަކު އެ ކްލިކް ކޮށްލައްވާ އަތޮޅެއް ނޫނީ ރަށަކާ ގުޅޭގޮތުން ހުރިހާ މައުލޫމާތެއް ލިބޭނެ ޑޭޝްބޯޑެއް،" ފުލުހުން ބުންޏެވެ.
އެ ޕޯޓަލް ލޯންޗު ކޮށްދެއްވުމަށްފަހު ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވީ އެ ޕޯޓަލުގެ ސަބަބުން، މަސްތުވާތަކެއްޗާ ދެކޮޅަށް ހިންގާ އޮޕަރޭޝަންތައް މިހާރަށް ވުރެ ހަރުދަނާވެ، އެކަންކަމާގުޅޭ ސިޔާސަތުތައް ވެސް އިތުރަށް ވަރުގަދަކުރަން ފުރުސަތު ލިބޭނެ ކަމަށެވެ.
"މި ޕޯޓަލުން އަޅުގަނޑުމެންނަށް އެއްކުރެވޭ ޑޭޓާއިން އިތުރަށް ފުރިހަ މަކަމެއް ގެނެވިގެންދާނެ. އަޅުގަނޑުމެން އުއްމީދުކުރަނީ މި ޑޭޓާ އަޅުގަނޑުމެން ނެޝެނަލީ އިންޓަގްރޭޓްކުރެވޭ ވަރުގެ ޑޭޓާބޭސްއަކަށް ހެދުން،" ހަމީދު ވިދާޅުވި އެވެ.
މިއަދު ލޯންޗްކުރި އިންޓެގްރޭޓެޑް ޑޭޝްބޯޑުގެ ސަބަބުން، ވަކިވަކި ރަށްރަށާއި އަތޮޅުތަކުގައި މަސްތުވާތަކެތީގެ ހާލަތު އޮތް މިންވަރު އެވިޑެންސް ބޭސްޓް ޑޭޓާ މެދުވެރިކޮށް ފަސޭހައިން ބަލާލެވޭނެ އެވެ.
