މާލޭގައި ހިންގާ ޑްރަގް ކެފޭތަކުން އާންމުކޮށް 1118 ދިވެހިން ހިދުމަތް ހޯދަންދާ ކަމަށް ފުލުހުން ބުނެފި އެވެ.
މާލޭގައި މަސްތުވުމަށް ހާއްސަ ސާޅީހަށް ވުރެ ގިނަ ކެފޭ އޮޕަރޭޓް ކުރަމުން ދާއިރު މި އޮޕަރޭޝަންގައި އެކަނި މިހާތަނަށް ހުރިހާ ތަނެއް ވަނީ ބަންދުކޮށްފަ އެވެ. އެއީ ޖުމްލަ 46 ތަނެވެ. އެންމެ ފަހު ހަތަރު ތަން ބަންދު ކުރީ ރޭގެ ވަގުތެއްގަ އެވެ. އެ ތަންތަން ހިންގާ ގެތަކުގެ ނަންތަކާއެކު ފުލުހުން މިއަދު ވަނީ ނޫސްވެރިންނަށް ހާމަކޮށްފަ އެވެ.
ނޫސްވެރިންނާއެކު މިއަދު ބޭއްވި ހާއްސަ ބައްދަލުވުމެއްގައި ފުލުހުން ބުނީ މަސްތުވާން ކެފޭތަކަށްދާ މީހުންގެ ތެރެއިން 305 މީހުންނަކީ ޑުރަގް ފަރުވާއިން ވަކި ކޮށްފައިވާ މީހުން ކަަމަށެވެ. އަދި ޑްރަގް ކެފޭތަކަށްދާ މީހުންގެ ތެރެއިން 217 މީހަކީ ރިހިބިލިޓޭޝަން ފަރުވާ ދިނުމަށް ކޯޓްތަކުން އަމުރު ކޮށްފައިވާ މީހުން ކަމަށެވެ.
އޭގެ ތެރެއިން 141 މީހަކީ ދެވަނަ ހުކުމެއް ކޮށްފައިވާ މީހުން ކަމަށް ވާއިރު މައްސަލަ އަނބުރާ ފޮނުވާލާފައިވާ 101 މީހަކުވެސް މީގެ ތެރޭގައި ހިމެނެ އެވެ.
މަސްތުވާ ކެފޭތަކުން އާއްމުކޮށް ހިދުމަތް ހޯދާ 139 ބިދޭސީއަކު ވެސް އުޅޭއިރު ގިނައީ ބަންގްލަދޭޝް މީހުންނެވެ. ޖުމްލަ 134 ބަންގްލަދޭޝް މީހުން އެ ތަންތަނުން ކޮންމެ ދުވަހަކު ހިދުމަތް ހޯދާއިރު ދެން އެ ތަންތަނަށް ދަނީ އިންޑިއާ ތިން މީހަކާއި ލަންކާގެ ދެ މީހެކެވެ.
އާންމުކޮށް މަސްތުވާންދާ ތިން ގެ އެއް:
- މ. ސައްމާމުއާގެ
- މއ. ސެވަންއެންޑްހައުސް
- މ. ދެރަހަ
ކޮންމެ ދުވަހަކު ގަވައިދުން މަސްތުވާ ކެފޭތަކަށްދާ 1118 ދިވެހިންގެ ތެރޭގައި އެންމެ ގިނައީ މާލެ އަށް ނިސްބަތްވާ މީހުންނެވެ. އެ މީހުންގެ ތެރޭގައި 50 އަހަރުން މަތީގެ 56 މީހަކު ހިމެނެ އެވެ. އޭގެ ތެރޭގައި 57 އަންހެނުންވެސް ހިމެނެއިރު 14 ކުޑަކުދިންވެސް ހިމެނެ އެވެ.
2015 ވަނަ އަހަރުން ފެށިގެން މިދިޔަ އަހަރުގެ ނިޔަލަށް މަސްތުވާތްކެތީގެ ބޮޑެތި މައްސަލަތަކުގައި ޖުމްލަ 146 ބިދޭސީއަކު ހިމެނެ އެވެ. އެ މުއްދަތުގައި ބަނގުރާ ވިއްކާ ވިޔަފާރި ކުރުމުގައި 525 ބިދޭސީން ހިމެނޭ ކަމަށް ފުލުހުންގެ ތަފާސްހިސާބުތަކުން ދައްކަ އެވެ.
